ഫോമായുടെ വിജയത്തിന് അടിത്തറ കൂട്ടായ പ്രവർത്തനം

ഹൂസ്റ്റൺ: ഫോമായുടെ ഒൻപതാമത് അന്താരാഷ്ട്ര കൺവെൻഷന്റെ വിജയത്തിന് പിന്നിൽ ദേശീയ നേതൃത്വത്തിന്റെയോ എക്സിക്യൂട്ടീവ് കമ്മിറ്റിയുടെയോ മാത്രം പ്രവർത്തനമല്ല, 101 അംഗസംഘടനകളും 15 റീജിയനുകളും നാഷണൽ കമ്മിറ്റിയും റീജിയണൽ വൈസ് പ്രസിഡന്റുമാരും ആയിരക്കണക്കിന് പ്രവർത്തകരും ചേർന്നുള്ള കൂട്ടായ പരിശ്രമമാണെന്ന് ഫോമായുടെ ജനറൽ സെക്രട്ടറി ബൈജു വർഗീസ് പറഞ്ഞു. സമാപന സമ്മേളനത്തിൽ സ്വാഗതപ്രസംഗം നടത്തുകയായിരുന്നു അദ്ദേഹം.

2008-ൽ രൂപംകൊണ്ട ഫോമാ ചരിത്രത്തോടൊപ്പം വളർന്നുകൊണ്ടിരിക്കുന്ന സംഘടനയാണെന്നും, 2018-ന് ശേഷം നടന്ന ആദ്യത്തെ വലിയ കൺവെൻഷൻ വിജയകരമായി സംഘടിപ്പിക്കാൻ കഴിഞ്ഞത് പ്രസിഡന്റ് ബേബി മണക്കുന്നേലിന്റെ നേതൃത്വത്തിലുള്ള ടീമിന്റെ സമർപ്പിത പ്രവർത്തനത്തിന്റെ ഫലമാണെന്നും അദ്ദേഹം പറഞ്ഞു. ചുമതലയേറ്റ സമയത്ത് 84 അംഗസംഘടനകളായിരുന്ന ഫോമ ഇന്ന് 101 അംഗസംഘടനകളിലേക്കും 12 റീജിയനുകളിൽ നിന്ന് 15 റീജിയനുകളിലേക്കും വളർന്നത് സംഘടനയുടെ ശക്തമായ വളർച്ചയുടെ തെളിവാണെന്നും അദ്ദേഹം ചൂണ്ടിക്കാട്ടി.

വനിതാ ശാക്തീകരണത്തിന് ഫോമാ നൽകിയ പ്രാധാന്യവും അദ്ദേഹം എടുത്തുപറഞ്ഞു. മലയാളി സംഘടനകളുടെ ചരിത്രത്തിൽ ആദ്യമായി സംഘടിപ്പിച്ച വിമൻസ് സമ്മിറ്റ് വലിയ വിജയമായിരുന്നുവെന്നും, വിമൻസ് ഫോറത്തിന്റെ എല്ലാ പ്രവർത്തനങ്ങൾക്കും ദേശീയ എക്സിക്യൂട്ടീവ് പൂർണ പിന്തുണ നൽകിയെന്നും അദ്ദേഹം പറഞ്ഞു. വരും വർഷങ്ങളിലും വനിതാ പ്രവർത്തനങ്ങൾക്ക് ഇതേ പിന്തുണ തുടരുമെന്നും അദ്ദേഹം ഉറപ്പുനൽകി.

ഫോമായുടെ വളർച്ചയ്ക്ക് ശക്തമായ സംഘടനാ സംവിധാനമാണ് അടിത്തറയെന്ന് അദ്ദേഹം പറഞ്ഞു. അംഗസംഘടനകളെ കൃത്യമായ മാനദണ്ഡങ്ങൾ പാലിച്ചാണ് ഫോമായിൽ ഉൾപ്പെടുത്തുന്നതെന്നും, അതുവഴിയാണ് സംഘടനയുടെ ജനാധിപത്യ സംവിധാനവും വിശ്വാസ്യതയും നിലനിർത്തുന്നതെന്നും അദ്ദേഹം വിശദീകരിച്ചു.

കൺവെൻഷൻ വിജയിപ്പിക്കാൻ സഹകരിച്ച ഏവർക്കും പ്രസിഡന്റ് മണക്കുന്നേൽ നന്ദി അറിയിച്ചു. എക്സിക്യൂട്ടീവ് കമ്മിറ്റി, റീജിയണൽ നേതാക്കൾ, അംഗസംഘടനകൾ, ഡെലിഗേറ്റുമാർ, സ്പോൺസർമാർ, സന്നദ്ധപ്രവർത്തകർ, പങ്കെടുത്ത എല്ലാ പ്രതിനിധികൾക്കും പ്രസിഡന്റ് നന്ദി രേഖപ്പെടുത്തി. ചില ചെറിയ പരാതികൾ ഉണ്ടായിരുന്നെങ്കിലും കുടുംബാന്തരീക്ഷത്തിൽ അതെല്ലാം പരിഹരിച്ച് മികച്ച കൺവെൻഷൻ നടത്താൻ കഴിഞ്ഞതിൽ അഭിമാനമുണ്ടെന്നും അദ്ദേഹം പറഞ്ഞു. വിമൻസ് സമ്മിറ്റ് വിജയകരമായി നടപ്പാക്കിയതിന് അദ്ദേഹം വനിതാ അംഗങ്ങളെ പ്രത്യേകം അഭിനന്ദിച്ചു.
[12:02 pm, 2/8/2026] Meettu: അമേരിക്കൻ മലയാളികൾ കേരളത്തിന്റെ വികസന പങ്കാളികളാകണം: കെ.കെ. ശൈലജ
ഹൂസ്റ്റൺ: അമേരിക്കൻ മലയാളികൾ കേരളത്തിന്റെ വികസനത്തിലും ആരോഗ്യരംഗത്തിന്റെ പുരോഗതിയിലും കൂടുതൽ പങ്കാളികളാകണമെന്ന് മുൻ ആരോഗ്യമന്ത്രി കെ.കെ. ശൈലജ ആഹ്വാനം ചെയ്തു. അമേരിക്കൻ മലയാളി സംഘടനയുടെ സമ്മേളനത്തിൽ സംസാരിക്കവെ, കേരളത്തിൽ നിക്ഷേപത്തിന് മികച്ച സാധ്യതകളുണ്ടെന്നും പ്രവാസികൾ ആത്മവിശ്വാസത്തോടെ സംസ്ഥാനത്ത് നിക്ഷേപങ്ങൾ നടത്തണമെന്നും അവർ പറഞ്ഞു.

സമ്മേളനത്തിലെ വിവിധ പരിപാടികളിൽ പങ്കെടുക്കാൻ കഴിഞ്ഞതിൽ സന്തോഷമുണ്ടെന്ന് പറഞ്ഞ ശൈലജ, പ്രത്യേകിച്ച് ഹെൽത്ത് സമ്മിറ്റാണ് തന്നെ ഏറ്റവും ആകർഷിച്ചതെന്ന് വ്യക്തമാക്കി. ആരോഗ്യമന്ത്രിയായിരുന്ന അനുഭവത്തിന്റെ അടിസ്ഥാനത്തിൽ ആരോഗ്യരംഗത്തെ എല്ലാ സംരംഭങ്ങളും തനിക്ക് ഏറെ പ്രിയപ്പെട്ടതാണെന്നും അവർ പറഞ്ഞു. ഡോ. എം. വി. പിള്ളയുടെ നേതൃത്വത്തിലും നിർദേശങ്ങളിലുമായി കേരളത്തിൽ ഇന്റർനാഷണൽ വൈറോളജി ഇൻസ്റ്റിറ്റ്യൂട്ട് സ്ഥാപിക്കാനും ആർ.സി.സിയിലെ കുട്ടികളുടെ വാർഡ് നവീകരിക്കാനുമുള്ള പ്രവർത്തനങ്ങളിൽ പ്രവാസി മലയാളികളുടെയും ഫോമായുടെയും സംഭാവന നിർണായകമായിരുന്നുവെന്നും അവർ അനുസ്മരിച്ചു.

കേരളത്തിൽ പ്രകൃതി വിഭവങ്ങളും ഊർജസ്രോതസ്സുകളും ജലസമ്പത്തും മികച്ച ഗതാഗത സൗകര്യങ്ങളും ഉൾപ്പെടെ നിക്ഷേപത്തിന് അനുകൂലമായ എല്ലാ സാഹചര്യങ്ങളും നിലവിലുണ്ടെന്ന് ശൈലജ ചൂണ്ടിക്കാട്ടി. ഇതിനകം തന്നെ നിരവധി പ്രവാസികൾ കേരളത്തിൽ സംരംഭങ്ങൾ ആരംഭിച്ചിട്ടുണ്ടെന്നും കൂടുതൽ പേർ ഈ അവസരം പ്രയോജനപ്പെടുത്തണമെന്നും അവർ അഭ്യർഥിച്ചു.

സംഘടനയുടെ ആതിഥേയത്വത്തെയും പ്രവർത്തകരുടെ സമർപ്പണത്തെയും അഭിനന്ദിച്ച ശൈലജ, പഴയ നേതൃത്വത്തിന്റെ പ്രവർത്തനങ്ങളെ പ്രശംസിക്കുകയും പുതിയ ഭാരവാഹികൾ ഐക്യത്തോടെയും പരസ്പര സഹകരണത്തോടെയും മുന്നോട്ട് പോകണമെന്നും അഭിപ്രായപ്പെട്ടു. കേരളത്തോടുള്ള സ്നേഹവും അഭിമാനവും പ്രവാസി മലയാളികൾ എന്നും നിലനിർത്തണമെന്നും അവർ പറഞ്ഞു.