ഫോമാ കൺവെൻഷനിലെ സാഹിത്യസെമിനാർ: വായനയാണ് എഴുത്തുകാരന്റെ അടിത്തറ; അനുഭവവും ഭാവനയും ചേർന്നാലേ സാഹിത്യം ജനിക്കൂ

ഹൂസ്റ്റൺ: ഫോമാ കൺവെൻഷന്റെ ഭാഗമായി സംഘടിപ്പിച്ച സാഹിത്യസെമിനാർ വായനയുടെ പ്രാധാന്യം, എഴുത്തുകാരന്റെ രൂപീകരണം, സാഹിത്യത്തിന്റെ സാമൂഹിക ഉത്തരവാദിത്തം എന്നീ വിഷയങ്ങളിൽ ശ്രദ്ധേയമായ ചർച്ചകൾക്ക് വേദിയായി. അമേരിക്കൻ മലയാളി സാഹിത്യലോകത്തെ പ്രമുഖരായ എഴുത്തുകാരും മാധ്യമപ്രവർത്തകരും പങ്കെടുത്ത സെമിനാറിൽ സാഹിത്യരംഗത്തെ വെല്ലുവിളികളും പ്രവാസി മലയാളികളുടെ ഭാഷാസംരക്ഷണത്തിന്റെ ആവശ്യകതയും വിശദമായി ചർച്ച ചെയ്തു.

നടനും എഴുത്തുകാരനുമായ തമ്പി ആന്റണി ആയിരുന്നു മോഡറേറ്റർ. മനോഹർ തോമസ്, എ.സി. ജോർജ്, സുരേന്ദ്രൻ നായർ, പ്രേമ തെക്കേക്ക് , പി.ടി. തോമസ്, ജോർജ് ജോസഫ്, ഗോപിനാഥ കുറുപ്പ് തുടങ്ങിയവർ അനുഭവങ്ങൾ പങ്കിട്ടു

സാഹിത്യസമ്മേളനങ്ങൾ സംഘടിപ്പിക്കുന്നതിന്റെ ബുദ്ധിമുട്ടുകളും പ്രവാസലോകത്ത് എഴുത്തുകാരെ ഒരുമിപ്പിക്കുന്നതിലെ വെല്ലുവിളികളും തമ്പി ആന്റണി ചൂണ്ടിക്കാട്ടി. സാഹിത്യത്തിന് കൂടുതൽ പ്രാധാന്യം നൽകുന്ന സ്ഥിരം വേദികൾ സംഘടനകൾ ഒരുക്കേണ്ടതിന്റെ ആവശ്യകതയും, അദ്ദേഹം ചൂണ്ടിക്കാട്ടി. മികച്ച സാഹിത്യപരിപാടികൾ ആസൂത്രണം ചെയ്യുന്നതിന് മുൻകൂട്ടിയുള്ള ഏകോപനവും എഴുത്തുകാരുമായുള്ള സജീവ ആശയവിനിമയവും അനിവാര്യമാണെന്നും അദ്ദേഹം അഭിപ്രായപ്പെട്ടു.

ഒരു എഴുത്തുകാരനാകണമെങ്കിൽ ആദ്യം ഒരു മികച്ച വായനക്കാരനാകണം എന്ന സന്ദേശമാണ് സെമിനാറിലെ പ്രധാന ആഹ്വാനം. അമേരിക്കയിലെ മലയാളി സമൂഹത്തിൽ എഴുത്തുകാരുടെ എണ്ണം വർധിക്കുന്നുണ്ടെങ്കിലും വായനക്കാരുടെ സജീവ പങ്കാളിത്തം കുറയുന്നതിൽ ആശങ്ക രേഖപ്പെടുത്തി. ഒരു പുസ്തകമോ ലേഖനമോ കവിതയോ വായിച്ചശേഷം വായനക്കാർ അഭിപ്രായങ്ങൾ രേഖപ്പെടുത്തുകയും വിമർശനാത്മകമായി വിലയിരുത്തുകയും ചെയ്യുന്നത് എഴുത്തുകാരന് ലഭിക്കുന്ന ഏറ്റവും വലിയ അംഗീകാരമാണെന്നും പലരും അഭിപ്രായപ്പെട്ടു.

ജീവിതനിരീക്ഷണവും അനുഭവങ്ങളും സാഹിത്യസൃഷ്ടിയുടെ അടിസ്ഥാനമാണെന്ന് ചൂണ്ടിക്കാട്ടിയ പ്രഭാഷകർ, അനുഭവം മാത്രം മതിയാകില്ലെന്നും അതിനൊപ്പം സർഗാത്മക ഭാവനയും ചേർന്നാലേ മികച്ച സാഹിത്യം ജനിക്കൂവെന്നും പറഞ്ഞു. പുസ്തകവായന മനുഷ്യനെ പുതിയ ലോകങ്ങളിലേക്ക് നയിക്കുകയും മറ്റുള്ളവരുടെ അനുഭവങ്ങൾ സ്വന്തം ജീവിതത്തിന്റെ ഭാഗമാക്കാൻ സഹായിക്കുകയും ചെയ്യുന്നതായി അവർ വിശദീകരിച്ചു.

പത്രപ്രവർത്തനവും സാഹിത്യവും തമ്മിലുള്ള ബന്ധവും സെമിനാറിൽ ചർച്ചയായി. റിപ്പോർട്ടിംഗ് യാഥാർഥ്യങ്ങളെ അവതരിപ്പിക്കുമ്പോൾ സാഹിത്യം ഭാവനയുടെ ചിറകിലേറി മനുഷ്യഹൃദയങ്ങളെ സ്പർശിക്കുന്ന കലാസൃഷ്ടിയായി മാറുന്നു. മികച്ച പത്രപ്രവർത്തകർ പിന്നീട് ശ്രദ്ധേയരായ സാഹിത്യകാരന്മാരായി വളർന്ന ഉദാഹരണങ്ങളും ചൂണ്ടിക്കാട്ടി.

പ്രവാസലോകത്ത് മലയാളഭാഷയും സാഹിത്യവും നിലനിർത്തുന്നതിൽ മാധ്യമങ്ങളുടെയും സാഹിത്യവേദികളുടെയും പങ്ക് നിർണായകമാണെന്ന് അഭിപ്രായമുയർന്നു. അമേരിക്കയിൽ മലയാളഭാഷയ്ക്കും എഴുത്തുകാർക്കും വേദിയൊരുക്കുന്ന മാധ്യമപ്രവർത്തകരുടെയും സാഹിത്യസംഘടനകളുടെയും സേവനത്തെ അഭിനന്ദിച്ചു.

ഒരു വ്യക്തിയുടെ ജീവിതത്തെ പുതിയ തലമുറയിലേക്ക് ശക്തമായി എത്തിക്കാനുള്ള കഴിവാണ് സാഹിത്യത്തിനും കലാസൃഷ്ടികൾക്കും ഉള്ളതെന്ന് ചൂണ്ടിക്കാണിക്കുന്നതിന് 'എന്ന് നിന്റെ മൊയ്തീൻ' എന്ന സിനിമ ഉദാഹരണമായി ജോർജ് ജോസഫ് പരാമർശിച്ചു. മനുഷ്യജീവിതത്തെ ഉയർത്തിപ്പിടിക്കുകയും സമൂഹത്തിന് മൂല്യങ്ങൾ പകർന്നുനൽകുകയും ചെയ്യുന്ന സൃഷ്ടികളാണ് യഥാർഥ സാഹിത്യമെന്നും അഭിപ്രായപ്പെട്ടു.

പ്രവാസി മലയാളികളുടെ സാഹിത്യാഭിരുചി വളർത്താനും വായനാസംസ്കാരം ശക്തിപ്പെടുത്താനും എഴുത്തുകാരെയും വായനക്കാരെയും കൂടുതൽ അടുപ്പിക്കുന്ന വേദികൾ തുടർന്നും സംഘടിപ്പിക്കണമെന്ന് ആഹ്വാനം ചെയ്തുകൊണ്ടാണ് സാഹിത്യസെമിനാർ സമാപിച്ചത്.

ഫോമാ കൺവെൻഷനിലെ സാഹിത്യസെമിനാർ: വായനയാണ് എഴുത്തുകാരന്റെ അടിത്തറ; അനുഭവവും ഭാവനയും ചേർന്നാലേ സാഹിത്യം ജനിക്കൂ

Subscribe and Support Your Regional Media Outlets. Your Support Helps Us Stay Afloat and Continue Serving the Community

PATHRANGAL

US WEBSITES

EMalayalee Available in MediaAppUSA