ഫോമാ ആരോഗ്യസെമിനാർ: ആരോഗ്യരംഗത്ത് ആഗോള സഹകരണത്തിനും പ്രതിരോധാരോഗ്യത്തിനും ആഹ്വാനം

ഹൂസ്റ്റൺ: ഫോമാ ദേശീയ കൺവെൻഷന്റെ ഭാഗമായി സംഘടിപ്പിച്ച ആരോഗ്യസെമിനാർ കേരളത്തിന്റെ ആരോഗ്യരംഗത്തെ നേട്ടങ്ങൾ, ഭാവി വെല്ലുവിളികൾ, ആഗോള സഹകരണത്തിന്റെ സാധ്യതകൾ എന്നിവ ചർച്ചചെയ്ത ശ്രദ്ധേയ വേദിയായി. മുൻ ആരോഗ്യ മന്ത്രി കെ.കെ. ശൈലജ സെമിനാർ ഉദ്ഘാടനം ചെയ്തു. പ്രശസ്ത ഓങ്കോളജിസ്റ്റ് ഡോ. എം.വി. പിള്ള മുഖ്യപ്രഭാഷണം നടത്തി. ആരോഗ്യരംഗത്തെ വിദഗ്ധർ, ഡോക്ടർമാർ, നഴ്സുമാർ, ആരോഗ്യപ്രവർത്തകർ, അമേരിക്കൻ മലയാളികൾ എന്നിവർ വലിയ തോതിൽ പങ്കെടുത്തു.

ഉദ്ഘാടന പ്രസംഗത്തിൽ കെ.കെ. ശൈലജ കേരളത്തിന്റെ പൊതുജനാരോഗ്യ സംവിധാനത്തെ കൂടുതൽ ശക്തിപ്പെടുത്തേണ്ടതിന്റെ ആവശ്യകത ചൂണ്ടിക്കാട്ടി. പകർച്ചവ്യാധികളെ നേരിടാൻ തോന്നയ്ക്കലിൽ അഡ്വാൻസ്ഡ് വൈറോളജി ഇൻസ്റ്റിറ്റ്യൂട്ട് സ്ഥാപിച്ചത് ദീർഘവീക്ഷണമുള്ള തീരുമാനമായിരുന്നുവെന്ന് അവർ പറഞ്ഞു. ആന്റിമൈക്രോബിയൽ റെസിസ്റ്റൻസ് (AMR) നേരിടുന്നതിനുള്ള സംസ്ഥാന ആക്ഷൻ പ്ലാൻ, ട്രോമ കെയർ പദ്ധതികൾ, ഹൈവേ ലൈഫ് സേവിംഗ് ആംബുലൻസ് ശൃംഖല, സിമുലേഷൻ പരിശീലന കേന്ദ്രങ്ങൾ, ക്യാൻസർ ചികിത്സാ സൗകര്യങ്ങളുടെ വികസനം എന്നിവ ആരോഗ്യരംഗത്തെ സുപ്രധാന മുന്നേറ്റങ്ങളാണെന്നും അവർ വ്യക്തമാക്കി. ആരോഗ്യസംരക്ഷണം ആശുപത്രികളിൽ ഒതുങ്ങുന്നതല്ല; ജീവിതശൈലി, ഭക്ഷണരീതി, പരിസ്ഥിതി, ശാസ്ത്രീയ ബോധവൽക്കരണം എന്നിവയും അതിന്റെ ഭാഗമാണെന്നും അവർ ഓർമ്മിപ്പിച്ചു. 'എല്ലാവർക്കും ആരോഗ്യം' എന്ന ആശയവും ഐക്യരാഷ്ട്രസഭ മുന്നോട്ടുവയ്ക്കുന്ന 'വൺ ഹെൽത്ത്' സമീപനവും സമൂഹം ഏറ്റെടുക്കേണ്ട സമയമാണിതെന്നും ശൈലജ ടീച്ചർ പറഞ്ഞു.

മുഖ്യപ്രഭാഷണം നടത്തിയ ഡോ. എം.വി. പിള്ള, ഹൂസ്റ്റൺ ലോക മെഡിക്കൽ രംഗത്തിന്റെ പ്രധാന കേന്ദ്രങ്ങളിലൊന്നാണെന്നും, അത്തരമൊരു നഗരത്തിൽ ആരോഗ്യസെമിനാർ സംഘടിപ്പിച്ചതിലൂടെ ഫോമാ ഉയർന്ന ലക്ഷ്യമാണ് മുന്നോട്ടുവച്ചിരിക്കുന്നതെന്നും പറഞ്ഞു. കേരളത്തിന്റെ ആരോഗ്യ മാതൃക ലോകശ്രദ്ധ നേടിയെങ്കിലും ദീർഘായുസ് വർധിക്കുന്നതോടെ പ്രായാധിക്യരോഗങ്ങളും ക്യാൻസർ പോലുള്ള ജീവിതശൈലി രോഗങ്ങളും വലിയ വെല്ലുവിളിയായി മാറുകയാണെന്ന് അദ്ദേഹം ചൂണ്ടിക്കാട്ടി. അതിനാൽ പ്രതിരോധാരോഗ്യത്തിനും ഗവേഷണത്തിനും കൂടുതൽ പ്രാധാന്യം നൽകേണ്ടതുണ്ടെന്നും അദ്ദേഹം അഭിപ്രായപ്പെട്ടു.

ഫോമാ വർഷങ്ങൾക്കുമുമ്പ് റീജിയണൽ ക്യാൻസർ സെന്ററിലെ ശിശു കാൻസർ വിഭാഗത്തിനായി സമാഹരിച്ച ധനസഹായം വലിയ മാറ്റം സൃഷ്ടിച്ചതായി ഡോ. പിള്ള അനുസ്മരിച്ചു. ഒരുകാലത്ത് നിലത്ത് കിടന്ന് ചികിത്സ തേടേണ്ടിവന്ന കുട്ടികൾക്ക് ഇന്ന് ആധുനികവും സൗഹൃദപരവുമായ ചികിത്സാ അന്തരീക്ഷം ഒരുക്കാൻ ആ സഹായം നിർണായകമായിരുന്നുവെന്ന് അദ്ദേഹം പറഞ്ഞു. അമേരിക്കൻ മലയാളികളുടെ സന്നദ്ധസേവന മനോഭാവം കേരളത്തിന്റെ ആരോഗ്യരംഗത്ത് ഇനിയും കൂടുതൽ ഇടപെടലുകൾക്ക് വഴിയൊരുക്കണമെന്നും, പുതിയ ഫോമാ നേതൃത്വവും കാൻസർ പരിചരണത്തിനും പ്രതിരോധ ഓങ്കോളജി പദ്ധതികൾക്കും പിന്തുണ തുടരണമെന്നും അദ്ദേഹം അഭ്യർഥിച്ചു.

പ്രതിരോധ ഓങ്കോളജിക്കായി രാജ്യത്തെ ആദ്യത്തെ ദേശീയ ഇൻസ്റ്റിറ്റ്യൂട്ട് (NIPO) ആരംഭിക്കുന്നതായും, രോഗം വന്നശേഷമുള്ള ചികിത്സയേക്കാൾ രോഗപ്രതിരോധത്തിനാണ് ഇനി കൂടുതൽ പ്രാധാന്യം നൽകേണ്ടതെന്നും ഡോ. പിള്ള പറഞ്ഞു. കേരളത്തിലെ ക്യാൻസർ രോഗവ്യാപനത്തെക്കുറിച്ചുള്ള പുതിയ പഠനങ്ങൾ, സ്ത്രീകളുടെ ജീവിതശൈലിയിലെ മാറ്റങ്ങൾ ഉൾപ്പെടെയുള്ള വിഷയങ്ങളിൽ കൂടുതൽ ഗവേഷണം നടത്തേണ്ടതുണ്ടെന്നും അദ്ദേഹം വ്യക്തമാക്കി.

അറിവും അനുഭവവും സാമൂഹിക പ്രതിബദ്ധതയും സമന്വയിപ്പിച്ച ആരോഗ്യസെമിനാർ, കേരളത്തിന്റെയും പ്രവാസി മലയാളികളുടെയും ആരോഗ്യരംഗത്തെ കൂട്ടായ പ്രവർത്തനങ്ങൾക്ക് പുതിയ ദിശാബോധം നൽകുന്നതായി പങ്കെടുത്തവർ വിലയിരുത്തി.

ഫോമാ ആരോഗ്യസെമിനാർ: ആരോഗ്യരംഗത്ത് ആഗോള സഹകരണത്തിനും പ്രതിരോധാരോഗ്യത്തിനും ആഹ്വാനം

Subscribe and Support Your Regional Media Outlets. Your Support Helps Us Stay Afloat and Continue Serving the Community

PATHRANGAL

US WEBSITES

EMalayalee Available in MediaAppUSA