രണ്ട് ജൂബിലികൾ ഒന്നിച്ച് ആഘോഷിക്കാനായതിൽ സന്തോഷം: മാർ ജേക്കബ് അങ്ങാടിയത്ത്

ഷിക്കാഗോ: അമേരിക്കയിലെ സീറോ-മലബാർ സഭയുടെ രജതജൂബിലി ആഘോഷം കഴിഞ്ഞ 25 വർഷത്തെ നേട്ടങ്ങളുടെ അനുസ്മരണമാത്രമല്ല, ഭാവിയിലേക്കുള്ള പുതിയ ദൗത്യബോധത്തിന്റെ പ്രഖ്യാപനമാണെന്ന് മുൻ ഷിക്കാഗോ സീറോ-മലബാർ രൂപതാധ്യക്ഷൻ മാർ ജേക്കബ് അങ്ങാടിയത്ത് പറഞ്ഞു. ഷിക്കാഗോ സീറോ-മലബാർ രൂപതയുടെ രജതജൂബിലി കൺവൻഷന്റെ സമാപന സമ്മേളനത്തിൽ സംസാരിക്കുകയായിരുന്നു അദ്ദേഹം.

രൂപതയുടെ രജതജൂബിലിയും തന്റെ മെത്രാഭിഷേക രജതജൂബിലിയും ഒരുമിച്ച് ആഘോഷിക്കാനായതിൽ ദൈവത്തോടും വിശ്വാസിസമൂഹത്തോടും അദ്ദേഹം നന്ദി രേഖപ്പെടുത്തി. രജതജൂബിലി ആഘോഷം വിജയകരമായി സംഘടിപ്പിച്ച രൂപതാധ്യക്ഷൻ ബിഷപ്പ് ജോയ് ആലപ്പാട്ട്, സംഘാടക സമിതി, വൈദികർ, സന്യാസിസമൂഹം, സന്നദ്ധപ്രവർത്തകർ, വിശ്വാസികൾ എന്നിവരുടെ സേവനങ്ങളെ അദ്ദേഹം അഭിനന്ദിച്ചു.

സീറോ-മലബാർ സഭയുടെ തലവനായ മാർ റാഫേൽ തട്ടിൽ ആദ്യമായി അമേരിക്കൻ രൂപതയുടെ ജൂബിലി ആഘോഷത്തിൽ പങ്കെടുത്തത് ചരിത്രപരമായ നിമിഷമാണെന്നും, അദ്ദേഹത്തിന്റെ സാന്നിധ്യം മുഴുവൻ സമൂഹത്തിനും ആത്മീയ പ്രചോദനമായെന്നും മാർ അങ്ങാടിയത്ത് പറഞ്ഞു.

കൺവൻഷനിൽ നടന്ന വിശ്വാസികളുടെ പ്രദക്ഷിണം അമേരിക്കയിലെ സീറോ-മലബാർ സമൂഹത്തിന്റെ ഐക്യത്തിന്റെയും വിശ്വാസത്തിന്റെയും സാക്ഷ്യമായി മാറിയതായും അദ്ദേഹം അഭിപ്രായപ്പെട്ടു.

ഭാവിയിൽ സഭയുടെ വളർച്ചയ്ക്കായി മൂന്ന് പ്രധാന മുൻഗണനകളാണ് മാർ അങ്ങാടിയത്ത് മുന്നോട്ടുവച്ചത്.

ഒന്നാമതായി, യുവജനങ്ങളെ സഭയുടെ എല്ലാ തലങ്ങളിലുമുള്ള നേതൃത്വത്തിലേക്ക് കൂടുതൽ ഉയർത്തിക്കൊണ്ടുവരണം. ഇടവകകളിലും മിഷനുകളിലും വിവിധ ശുശ്രൂഷകളിലും യുവാക്കൾക്ക് ഉത്തരവാദിത്തങ്ങൾ നൽകുകയും, സഭയുടെ ഭാവി നേതൃത്വം അവരെ വിശ്വസിച്ച് ഏൽപ്പിക്കുകയും വേണമെന്ന് അദ്ദേഹം പറഞ്ഞു.

രണ്ടാമതായി, പ്രവാസി സമൂഹമെന്ന തിരിച്ചറിയലിനപ്പുറം ശക്തമായ മിഷനറി ചൈതന്യം വളർത്തിയെടുക്കണം. 'നാം കുടിയേറ്റക്കാരായിരിക്കാം; എന്നാൽ അതോടൊപ്പം ക്രിസ്തുവിന്റെ സാക്ഷ്യം ലോകത്തിലേക്ക് എത്തിക്കേണ്ട മിഷനറിമാരുമാണ്. നമ്മുടെ വിശ്വാസം സമൂഹത്തിന്റെ അതിർത്തികളിലേക്കും എത്തിക്കേണ്ട ഉത്തരവാദിത്തം നമുക്കുണ്ട്,' അദ്ദേഹം ഓർമിപ്പിച്ചു.

മൂന്നാമതായി, സഭയുടെ ആത്മീയജീവിതം കൂടുതൽ ആഴപ്പെടുത്തേണ്ടതുണ്ടെന്ന് അദ്ദേഹം പറഞ്ഞു. ദിവ്യബലിയോടുള്ള സ്നേഹവും സീറോ-മലബാർ ആരാധനാപാരമ്പര്യത്തോടുള്ള വിശ്വസ്തതയും വ്യക്തിപരവും കുടുംബപരവുമായ പ്രാർഥനാജീവിതവും ശക്തിപ്പെടുത്തണമെന്ന് അദ്ദേഹം ആഹ്വാനം ചെയ്തു.

'ഈ ജൂബിലി ആഘോഷം ഒരു സമാപനമല്ല, പുതിയൊരു തുടക്കമാണ്. യുവജനങ്ങളെയും കുടുംബങ്ങളെയും കേന്ദ്രമാക്കി, മിഷൻ ചൈതന്യത്തോടെയും ആത്മീയ നവീകരണത്തോടെയും അമേരിക്കയിലെ സീറോ-മലബാർ സഭ മുന്നേറട്ടെ,' എന്ന് ആശംസിച്ചുകൊണ്ടാണ് മാർ ജേക്കബ് അങ്ങാടിയത്ത് തന്റെ സന്ദേശം സമാപിച്ചത്.

രണ്ട് ജൂബിലികൾ ഒന്നിച്ച് ആഘോഷിക്കാനായതിൽ സന്തോഷം: മാർ ജേക്കബ് അങ്ങാടിയത്ത്

Subscribe and Support Your Regional Media Outlets. Your Support Helps Us Stay Afloat and Continue Serving the Community

PATHRANGAL

US WEBSITES

EMalayalee Available in MediaAppUSA