പാസ്റ്ററൽ സെന്റർ മുതൽ സീനിയർ ലിവിങ് പദ്ധതിവരെ; അടുത്ത 25 വർഷത്തേക്കുള്ള വികസനപദ്ധതികൾ

ഷിക്കാഗോ: അമേരിക്കയിലെ സീറോ-മലബാർ സഭയുടെ അടുത്ത 25 വർഷത്തെ വളർച്ച ലക്ഷ്യമിട്ട് ആത്മീയ, സാമൂഹിക, സാമ്പത്തിക മേഖലകളെ ഉൾക്കൊള്ളുന്ന നിരവധി വികസന പദ്ധതികൾ ഷിക്കാഗോ സീറോ-മലബാർ രൂപതയുടെ രജതജൂബിലി കൺവൻഷനിൽ പ്രഖ്യാപിച്ചു. രൂപതയുടെ ഭാവി പദ്ധതികൾ അവതരിപ്പിച്ച പ്രൊക്കുറേറ്റർ ഫാ. കുര്യൻ നെടുവേലി ചാലുങ്കൽ സഭയുടെ വളർച്ച ആഘോഷിക്കുന്നതിൽ മാത്രം ഒതുങ്ങാതെ ഭാവി തലമുറയ്ക്കായുള്ള ദീർഘവീക്ഷണത്തോടെയുള്ള പദ്ധതികളാണ് ഇനി നടപ്പാക്കുകയെന്ന് പറഞ്ഞു.

സഭയുടെ ഏറ്റവും പ്രധാനപ്പെട്ട ഭാവി പദ്ധതിയായി പാസ്റ്ററൽ സെന്റർ സ്ഥാപിക്കലിനെ അദ്ദേഹം വിശേഷിപ്പിച്ചു. രൂപതയുടെ വിവിധ ശുശ്രൂഷകളും വിശ്വാസപരിശീലന പ്രവർത്തനങ്ങളും കുടുംബ-യുവജന അപ്പസ്തോലേറ്റുകളും ഏകോപിപ്പിക്കുന്ന കേന്ദ്രമായി ഇത് പ്രവർത്തിക്കുമെന്ന് അദ്ദേഹം പറഞ്ഞു.

ചാരിറ്റി പ്രവർത്തനങ്ങൾ വിപുലീകരിക്കും
രൂപതയുടെ ചാരിറ്റി ഫണ്ടിലൂടെ അമേരിക്കയിൽ സാമ്പത്തിക, ആരോഗ്യ, വ്യക്തിപരമായ പ്രതിസന്ധികൾ നേരിടുന്ന കുടുംബങ്ങൾക്ക് നൽകിയുവരുന്ന സഹായം തുടരുമെന്ന് ഫാ. കുര്യൻ പറഞ്ഞു. രണ്ടാം ഘട്ടത്തിൽ നിയമപരമായ വ്യവസ്ഥകൾ പാലിച്ചുകൊണ്ട് അമേരിക്കയ്ക്കു പുറത്തുള്ള ദരിദ്രർക്കും പാർശ്വവത്കരിക്കപ്പെട്ട സമൂഹങ്ങൾക്കും സഹായം വ്യാപിപ്പിക്കുമെന്നും അദ്ദേഹം അറിയിച്ചു.

എൻഡോവ്‌മെന്റ് ഫണ്ടും മിഷൻ ഡെവലപ്മെന്റ് ഫണ്ടും
2023-ൽ ആരംഭിച്ച എൻഡോവ്‌മെന്റ് ഫണ്ട് കൂടുതൽ ശക്തിപ്പെടുത്തും. പുതുതായി ആരംഭിക്കുന്ന മിഷനുകൾക്കും സാമ്പത്തികമായി പിന്നാക്കം നിൽക്കുന്ന ഇടവകകൾക്കും പിന്തുണ നൽകുന്നതിനായി പ്രത്യേക മിഷൻ ഡെവലപ്മെന്റ് ഫണ്ട് രൂപീകരിക്കുമെന്നും അദ്ദേഹം അറിയിച്ചു.

'സാമ്പത്തിക പരിമിതികൾ കാരണം ഒരു മിഷനും പിന്നിലാകാൻ പാടില്ല' എന്നതാണ് ഈ പദ്ധതിയുടെ ലക്ഷ്യമെന്ന് അദ്ദേഹം വ്യക്തമാക്കി.

നാല് മേഖലകളിൽ സീനിയർ സെന്ററുകൾ
വയോജന സമൂഹത്തിന്റെ വർധിച്ചുവരുന്ന ആവശ്യങ്ങൾ കണക്കിലെടുത്ത് ഷിക്കാഗോ, ടെക്സാസ്, ഫ്ലോറിഡ, ന്യൂജേഴ്‌സി എന്നീ നാല് മേഖലകളിൽ സീനിയർ സെന്ററുകളോ സീനിയർ ലിവിങ് സംവിധാനങ്ങളോ സ്ഥാപിക്കാനുള്ള സാധ്യതാ പഠനം ആരംഭിക്കും . അടുത്ത ഏതാനും വർഷങ്ങൾക്കുള്ളിൽ ഈ പദ്ധതി യാഥാർഥ്യമാക്കാനാണ് രൂപത ലക്ഷ്യമിടുന്നതെന്നും അദ്ദേഹം പറഞ്ഞു.

ക്രെഡിറ്റ് യൂണിയനും ബിസിനസ് കണക്റ്റും
സമൂഹത്തിന്റെ സാമ്പത്തിക ശാക്തീകരണത്തിനായി കമ്മ്യൂണിറ്റി അടിസ്ഥാനത്തിലുള്ള ക്രെഡിറ്റ് യൂണിയൻ ആരംഭിക്കുന്നതും രൂപതയുടെ ഭാവി പദ്ധതികളിലുണ്ട്.

അതോടൊപ്പം സംരംഭകരെയും വിവിധ മേഖലകളിലെ പ്രൊഫഷണലുകളെയും ബന്ധിപ്പിക്കുന്ന ബിസിനസ് കണക്റ്റ് പദ്ധതിക്ക് ഇതിനകം തുടക്കമായതായി അദ്ദേഹം അറിയിച്ചു. ബിസിനസ് സഹകരണവും തൊഴിൽ അവസരങ്ങളും നിക്ഷേപ ശൃംഖലകളും വികസിപ്പിക്കുകയാണ് ഇതിന്റെ ലക്ഷ്യം.

ഇന്ത്യയിൽ 'ഹോം ആൻഡ് സെന്റർ'
ഇന്ത്യയിൽ എത്തുന്ന ബിഷപ്പുമാർക്കും വൈദികർക്കും സഭാംഗങ്ങൾക്കും താമസത്തിനും ആതിഥേയത്വത്തിനുമായി 'ഹോം ആൻഡ് സെന്റർ' എന്ന പുതിയ പദ്ധതിയും രൂപത ആവിഷ്‌കരിക്കുന്നുണ്ട്. ആത്മീയവും സാംസ്കാരികവുമായ ഇടപെടലുകളുടെ കേന്ദ്രമായും ഇത് പ്രവർത്തിക്കുമെന്ന് അദ്ദേഹം പറഞ്ഞു.

ഡിജിറ്റൽ വിശ്വാസപരിശീലനം
ഡിജിറ്റൽ യുഗത്തിന്റെ ആവശ്യങ്ങൾ മുൻനിർത്തി ഓൺലൈൻ വിശ്വാസപരിശീലനം, ആത്മീയ ഉള്ളടക്കങ്ങൾ, വെർച്വൽ പഠനപരിപാടികൾ, നൂതന പഠനസാങ്കേതികവിദ്യകൾ എന്നിവ ഉൾക്കൊള്ളുന്ന ഡിജിറ്റൽ ഫെയ്ത്ത് ഇനിഷ്യേറ്റീവ് ആരംഭിക്കുമെന്നും ഫാ. കുര്യൻ അറിയിച്ചു.

സമാപനത്തിൽ, 'നമ്മുടെ പ്രതിബദ്ധത കഴിഞ്ഞ 25 വർഷത്തെ നേട്ടങ്ങൾ ആഘോഷിക്കുന്നതിൽ മാത്രമല്ല. ഭാവിയെ വിശ്വാസത്തോടെയും പ്രത്യാശയോടെയും നിർമിക്കുന്നതിലുമാണ്. ഭൂതകാലത്തോടുള്ള നന്ദിയും വർത്തമാനകാലത്തോടുള്ള വിശ്വാസവും ഭാവിയോടുള്ള പ്രത്യാശയുമായി അടുത്ത 25 വർഷത്തെ മിഷന്റെയും സേവനത്തിന്റെയും വളർച്ചയുടെയും യാത്രയിലേക്ക് ധൈര്യത്തോടെ മുന്നേറാം. കാഴ്ചയിലൂടെയല്ല, വിശ്വാസത്തിലൂടെയാണ് നാം നടക്കേണ്ടത്,' എന്ന് ഫാ. കുര്യൻ നെടുവേലി ചാലുങ്കൽ പറഞ്ഞു.

പാസ്റ്ററൽ സെന്റർ മുതൽ സീനിയർ ലിവിങ് പദ്ധതിവരെ; അടുത്ത 25 വർഷത്തേക്കുള്ള വികസനപദ്ധതികൾ

Subscribe and Support Your Regional Media Outlets. Your Support Helps Us Stay Afloat and Continue Serving the Community

PATHRANGAL

US WEBSITES

EMalayalee Available in MediaAppUSA