വർഗീസ് മാളിയേക്കൽ പാസ്റ്ററൽ സെന്ററിനായി ഒരു ലക്ഷം ഡോളർ സംഭാവന നൽകി

ഷിക്കാഗോ: അമേരിക്കയിലെ സീറോ-മലബാർ സഭയുടെ അടുത്ത 25 വർഷം യുവതലമുറയുടെ നേതൃത്വത്തിലുള്ള മിഷനറി സഭയുടെ വളർച്ചയുടേതായിരിക്കണമെന്ന് പ്രമുഖ വ്യവസായിയും സഭാ പ്രവർത്തകനുമായ വർഗീസ് മാളിയേക്കൽ. രജതജൂബിലി കൺവൻഷന്റെ സമാപന സമ്മേളനത്തിൽ , രൂപതയുടെ ഭാവി പ്രവർത്തനങ്ങൾ ഏകോപിപ്പിക്കുന്നതിനായി സ്ഥാപിക്കുന്ന പാസ്റ്ററൽ സെന്ററിനായി 100,000 ഡോളറിന്റെ ചെക്ക് നൽകിയ ശേഷം സംസാരിക്കുകയായിരുന്നു അദ്ദേഹം .

ഭാര്യ ഷീലയോടൊപ്പം ബിഷപ്പ് ബിഷപ്പ് ജോയ് ആലപ്പാട്ടിന് ഒരു ലക്ഷം ഡോളറിന്റെ ചെക്ക് കൈമാറിയപ്പോൾ സമ്മേളന ഹാൾ കൈയടികളോടെ ആ പ്രഖ്യാപനത്തെ സ്വീകരിച്ചു. കൺവൻഷന്റെ മുഖ്യ സ്പോണ്സര്മാരിൽ ഒരാളുമായിരുന്നു അദ്ദേഹം.

കഴിഞ്ഞ 25 വർഷത്തെ ചരിത്രത്തിൽ അമേരിക്കയിലെ സീറോ-മലബാർ സമൂഹം സ്വന്തം വ്യക്തിത്വം കണ്ടെത്താനുള്ള പരിശ്രമങ്ങളുടെ കഥയാണ് കാണുന്നതെന്ന് അദ്ദേഹം പറഞ്ഞു. ആദ്യകാലത്ത് ലത്തീൻ സഭയുടെയും ലത്തീൻ രൂപതകളുടെയും ഉദാരമായ പിന്തുണയാണ് സീറോ-മലബാർ സഭയുടെ വളർച്ചയ്ക്ക് അടിത്തറയായതെന്നും അദ്ദേഹം അനുസ്മരിച്ചു.

ഇന്ന് ശക്തമായ രൂപതയും ഇടവകകളും വിശ്വാസസമൂഹവുമുള്ള സഭയായി വളർന്നത് നിരവധി വൈദികരുടെയും സന്യാസിസമൂഹത്തിന്റെയും വിശ്വാസികളുടെയും ത്യാഗഫലമാണെന്നും അദ്ദേഹം പറഞ്ഞു.

എന്നാൽ കൺവൻഷനിലെ രണ്ടാം തലമുറ യുവജനങ്ങളുമായുള്ള സംവാദങ്ങളാണ് സഭയുടെ ഭാവിദിശ കൂടുതൽ വ്യക്തമായി കാണിച്ചുതന്നതെന്ന് അദ്ദേഹം വ്യക്തമാക്കി.

'യുവതലമുറ ആഗ്രഹിക്കുന്നത് പ്രവാസികളുടെ സഭയല്ല, മിഷനറി സഭയാണ്. അമേരിക്കയിൽ ജനിച്ച തലമുറകളെയും വിവിധ കാലഘട്ടങ്ങളിൽ കുടിയേറിയ കുടുംബങ്ങളെയും ഒരുമിപ്പിക്കുന്ന ശക്തമായ സഭയാണ് അവർ സ്വപ്നം കാണുന്നത്. യുവാക്കൾക്ക് നേതൃത്വം നൽകുകയും തീരുമാനങ്ങൾ എടുക്കാൻ അവസരം ഒരുക്കുകയും ചെയ്യുന്ന സഭയാകണം അത്. അതോടൊപ്പം സീറോ-മലബാർ സഭയുടെ ആരാധനാപാരമ്പര്യത്തിലും ആത്മീയതയിലും ഉറച്ചുനിൽക്കുകയും അമേരിക്കൻ സാമൂഹിക-സാംസ്കാരിക പശ്ചാത്തലത്തിൽ സജീവമായി പ്രവർത്തിക്കുകയും വേണം,' അദ്ദേഹം അഭിപ്രായപ്പെട്ടു.

അമേരിക്കയിൽ നിന്നുതന്നെ കൂടുതൽ വൈദിക ദൈവവിളികൾ ഉയർന്നുവരണമെന്നും, അടുത്ത 25 വർഷത്തിനുള്ളിൽ അമേരിക്കയിൽ ജനിച്ച ഒരു സീറോ-മലബാർ ബിഷപ്പിനെ കാണാൻ കഴിയുമെന്ന പ്രതീക്ഷയും അദ്ദേഹം പങ്കുവച്ചു.

സഭയുടെ വളർച്ചയ്ക്ക് ആത്മീയ പ്രവർത്തനങ്ങൾ മാത്രം മതിയാകില്ലെന്നും, അതിനെ പിന്തുണയ്ക്കുന്ന അടിസ്ഥാനസൗകര്യങ്ങളും സ്ഥാപനങ്ങളും അനിവാര്യമാണെന്നും അദ്ദേഹം ചൂണ്ടിക്കാട്ടി. വിശ്വാസപരിശീലനവും നവസുവിശേഷവൽക്കരണവും യുവജന ശുശ്രൂഷകളും കൂടുതൽ ശക്തിപ്പെടുത്താൻ സ്ഥിരമായ പാസ്റ്ററൽ സെന്റർ സ്ഥാപിക്കേണ്ടത് രൂപതയുടെ ഏറ്റവും അടിയന്തര ആവശ്യങ്ങളിലൊന്നാണെന്ന് അദ്ദേഹം പറഞ്ഞു.

ധനസമാഹരണത്തിനായി പൊതുവെ ആരോടും അഭ്യർത്ഥിക്കാറില്ലെന്ന് പറഞ്ഞ വർഗീസ് മാളിയേക്കൽ, ഈ പദ്ധതിക്കായി മാത്രം ആ നിലപാട് മാറ്റുകയാണെന്ന് വ്യക്തമാക്കി. വിശുദ്ധ ലൂക്കായുടെ സുവിശേഷത്തിലെ 'കൊടുക്കുവിൻ; നിങ്ങൾക്കും ലഭിക്കും' എന്ന വചനവും 'ആർക്ക് അധികം ലഭിച്ചുവോ അവരിൽ നിന്ന് അധികം പ്രതീക്ഷിക്കപ്പെടും' എന്ന സന്ദേശവും ഉദ്ധരിച്ച അദ്ദേഹം, രൂപതയുടെ ഭാവി നിർമാണത്തിനായി എല്ലാവരും ഉദാരമായി കൈകോർക്കണമെന്ന് അഭ്യർഥിച്ചു.

തുടർന്ന്, 'ഈ മഹത്തായ പദ്ധതിക്ക് ഒരു തുടക്കമെന്ന നിലയിൽ ഞാനും ഭാര്യ ഷീലയും ചേർന്ന് പാസ്റ്ററൽ സെന്ററിനായി 100,000 ഡോളറിന്റെ സംഭാവന സമർപ്പിക്കുന്നു,' എന്ന് പ്രഖ്യാപിച്ചപ്പോൾ സമ്മേളനത്തിൽ പങ്കെടുത്തവർ എഴുന്നേറ്റ് നിന്ന് കൈയടികളോടെ അദ്ദേഹത്തെ ആദരിച്ചു.

പാസ്റ്ററൽ സെന്റർ യാഥാർഥ്യമാകുന്നതിലൂടെ യുവജന ശുശ്രൂഷ, വിശ്വാസപരിശീലനം, കുടുംബ അപ്പസ്തോലേറ്റ്, നവസുവിശേഷവൽക്കരണം എന്നിവ കൂടുതൽ കാര്യക്ഷമമായി ഏകോപിപ്പിക്കാൻ രൂപതയ്ക്ക് സാധിക്കുമെന്ന് സമ്മേളനത്തിൽ വിലയിരുത്തപ്പെട്ടു.

വർഗീസ് മാളിയേക്കൽ പാസ്റ്ററൽ സെന്ററിനായി ഒരു ലക്ഷം ഡോളർ സംഭാവന നൽകി

Subscribe and Support Your Regional Media Outlets. Your Support Helps Us Stay Afloat and Continue Serving the Community

PATHRANGAL

US WEBSITES

EMalayalee Available in MediaAppUSA