ക്യൂബയെക്കുറിച്ചുള്ള അമേരിക്കൻ പ്രസിഡന്റ് ഡൊണാൾഡ് ട്രംപിന്റെ പരാമർശത്തിന് പിന്നാലെ യുഎൻ പൊതുസഭയിൽ നാടകീയ രംഗങ്ങൾ. ക്യൂബയിലെ കമ്മ്യൂണിസ്റ്റ് ഭരണകൂടം വീഴുമെന്നും രാജ്യത്തേക്ക് സ്വാതന്ത്ര്യം വരുമെന്നും ട്രംപ് പ്രഖ്യാപിച്ചതിന് പിന്നാലെ ക്യൂബൻ പ്രതിനിധി സംഘം സമ്മേളന ഹാളിൽ നിന്ന് ഇറങ്ങിപ്പോയി. സെപ്റ്റംബർ 22ന് യുഎൻ പൊതുസഭയെ അഭിസംബോധന ചെയ്ത് സംസാരിക്കവെയാണ് ട്രംപ് ക്യൂബയെ ‘പരാജയപ്പെട്ട രാജ്യം’ എന്ന് വിശേഷിപ്പിക്കുകയും ഭരണകൂടത്തിൽ അടിസ്ഥാനപരമായ മാറ്റമാണ് തന്റെ ഭരണകൂടം ലക്ഷ്യമിടുന്നതെന്നും വ്യക്തമാക്കിയത്.

ക്യൂബൻ ഭരണകൂടം ഇതുവരെ നേരിട്ടതിൽവെച്ച് ഏറ്റവും വലിയ സമ്മർദത്തിലാണെന്നും അത് മുൻപെങ്ങുമില്ലാത്തവിധം തകരുമെന്നും ട്രംപ് പറഞ്ഞു. “കമ്മ്യൂണിസം അമേരിക്കയിലേക്ക് വരില്ല, പക്ഷേ സ്വാതന്ത്ര്യം ക്യൂബയിലേക്ക് വരും” എന്നും അദ്ദേഹം വ്യക്തമാക്കി. ക്യൂബയിൽ അടിസ്ഥാനപരമായ മാറ്റമാണ് തന്റെ ഭരണകൂടവും ലക്ഷ്യമിടുന്നതെന്നും അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോ ക്യൂബയുമായി ചർച്ചകൾ നടത്തുന്നുണ്ടെന്നും ട്രംപ് പറഞ്ഞു.

നിലവിൽ ക്യൂബ കടുത്ത സാമ്പത്തിക-രാഷ്ട്രീയ പ്രതിസന്ധിയിലൂടെയാണ് കടന്നുപോകുന്നതെന്നും, ചരിത്രത്തിലെ ഏറ്റവും വലിയ സമ്മർദ്ദത്തിലാണ് അവിടത്തെ കമ്മ്യൂണിസ്റ്റ് ഭരണകൂടമെന്നും ഭാവിയിൽ എന്തു സംഭവിക്കുമെന്ന് കാത്തിരുന്നു കാണാമെന്നുമാണ് ട്രംപ് പ്രസ്താവിച്ചത്.
ട്രംപിന്റെ പ്രസംഗത്തിനിടെ ക്യൂബൻ വിദേശകാര്യ മന്ത്രി ബ്രൂണോ റോഡ്രിഗസ് പാരില്ലയുടെ നേതൃത്വത്തിലുള്ള പ്രതിനിധി സംഘം ഹാളിൽ നിന്ന് പുറത്തുപോയി.

അതേസമയം, അമേരിക്കയും ക്യൂബയും തമ്മിലുള്ള ബന്ധം ദീർഘകാലമായി സംഘർഷഭരിതമാണ്. ആറു പതിറ്റാണ്ടിലേറെയായി അമേരിക്ക ക്യൂബയ്ക്കെതിരെ വ്യാപാര ഉപരോധം തുടരുന്നുണ്ട്. സെപ്റ്റംബറിൽ പുതിയ ഉപരോധ നടപടികൾക്കെതിരെ റോഡ്രിഗസ് അമേരിക്കയുടെ സമ്മർദത്തെ വിമർശിക്കുകയും അമേരിക്കൻ ശ്രമങ്ങൾ പരാജയപ്പെടുമെന്ന് പറയുകയും ചെയ്തിരുന്നു.