അമേരിക്ക സൈനിക സമ്മർദം കുറയ്ക്കാൻ പ്രാരംഭ നടപടികൾ സ്വീകരിക്കുകയാണെങ്കിൽ, ഹോർമുസ് കടലിടുക്ക് ഏഴ് ദിവസത്തിനകം തുറക്കാൻ തയാറാണെന്ന് ഇറാൻ അറിയിച്ചു. വാഷിംഗ്ടണുമായി നയതന്ത്ര ചർച്ചകൾ പുനരാരംഭിക്കാൻ ടെഹ്റാൻ ശ്രമങ്ങൾ നടത്തുന്നതിനിടയിലാണ് മുതിർന്ന ഇറാനിയൻ സർക്കാർ ഉദ്യോഗസ്ഥൻ ക്യോഡോ ന്യൂസിനോട് ഇക്കാര്യം വ്യക്തമാക്കിയത്.

ഇരു രാജ്യങ്ങളും തമ്മിലുള്ള ശത്രുതയ്ക്ക് ശാശ്വതമായി വിരാമം കുറിക്കുക ലക്ഷ്യമിട്ടുള്ള പുതിയ ചർച്ചകൾക്ക് ആഹ്വാനം ചെയ്യുന്നതാണ് ഈ നിർദേശം. മധ്യസ്ഥർ വഴിയാണ് ഈ സന്ദേശം അമേരിക്കയ്ക്ക് കൈമാറിയിട്ടുള്ളത്.

ഈ ആഴ്ച നടക്കുന്ന ഐക്യരാഷ്ട്രസഭ ജനറൽ അസംബ്ലി യോഗങ്ങൾക്കിടയിൽ മധ്യസ്ഥ ചർച്ചകളിൽ ഉൾപ്പെട്ടിട്ടുള്ള രാജ്യങ്ങളുമായി ബന്ധപ്പെടാൻ ടെഹ്റാൻ പദ്ധതിയിടുന്നുണ്ടെന്ന് റിപ്പോർട്ടിൽ പറയുന്നു.

അമേരിക്കൻ ഉപരോധം പിൻവലിക്കുകയും സൈനിക നടപടികൾ ലഘൂകരിക്കുകയും ചെയ്താൽ ആഗോള എണ്ണവ്യാപാരത്തിന് നിർണായകമായ ഹോർമുസ് കടലിടുക്ക് തുറന്നുനൽകുമെന്നാണ് ഇറാൻറെ നിലപാട്.

മധ്യസ്ഥർ വഴി അമേരിക്കയ്ക്ക് ഇതുസംബന്ധിച്ച നിർദ്ദേശങ്ങൾ കൈമാറിയിട്ടുണ്ടെന്നും, നിലവിലെ പ്രതിസന്ധിക്ക് പരിഹാരം കാണാൻ ഇത് മികച്ചൊരു തുടക്കമാകുമെന്നും ഇറാൻ കരുതുന്നു.

അമേരിക്കയുമായുള്ള വർധിച്ചുവരുന്ന സംഘർഷങ്ങൾക്കും ഡെലിഗേഷൻ അംഗങ്ങളുടെ വിസയുമായി ബന്ധപ്പെട്ട തർക്കങ്ങൾക്കുമിടയിൽ, 81-ാമത് യുഎൻജിഎ സമ്മേളനത്തിൽ പങ്കെടുക്കാനായി ഇറാൻ പ്രസിഡന്റ് മസൂദ് പെസെഷ്കിയൻ നേരത്തെ തന്നെ ന്യൂയോർക്കിലേക്ക് തിരിച്ചിരുന്നു.

ബുധനാഴ്ച ജനറൽ അസംബ്ലിയെ അഭിസംബോധന ചെയ്യാൻ നിശ്ചയിച്ചിട്ടുള്ള പെസെഷ്കിയൻ, സമ്മേളനത്തിന്റെ ഇടവേളകളിൽ വിദേശ നേതാക്കളുമായും മറ്റ് ഉദ്യോഗസ്ഥരുമായും കൂടിക്കാഴ്ച നടത്തുമെന്നാണ് പ്രതീക്ഷിക്കുന്നത്.

പ്രസിഡന്റ് പെസെഷ്കിയനും യു എസ് പ്രസിഡന്റ് ഡോണൾഡ് ട്രംപും തമ്മിൽ കൂടിക്കാഴ്ച ഉണ്ടാകാനുള്ള സാധ്യത ഉദ്യോഗസ്ഥൻ തള്ളിക്കളഞ്ഞു. എന്നാൽ വാഷിംഗ്ടണിന്റെ ഭാഗത്തുനിന്ന് ആത്മാർത്ഥതയും പ്രതിബദ്ധതയും ഉണ്ടായാൽ നയതന്ത്ര നീക്കങ്ങളിൽ പുരോഗതി ഉണ്ടാകാൻ സാധിക്കുമെന്ന് അദ്ദേഹം വ്യക്തമാക്കി.