കണ്ണൂര്‍: ഡല്‍ഹി കേന്ദ്രീകരിച്ച് മാരക ലഹരിവസ്തുവായ എം.ഡി.എം.എ നിര്‍മിച്ച് നല്‍കിയിരുന്ന വിദേശ വനിതകളെ കണ്ണൂര്‍ സിറ്റി പൊലീസ് സ്‌ക്വാഡ് സാഹസികമായി പിടികൂടി. നൈജീരിയ സ്വദേശിനി ചിനെലോ ലിലിയന്‍, ക്യാമറൂണ്‍ സ്വദേശിനി ഫിലോമെനെ ചാന്‍സെലിന്‍ എന്നിവരെയാണ് ഡല്‍ഹി ബുരാരിയില്‍ വെച്ച് സിറ്റി പോലിസ് പിടികൂടിയതെന്ന് റേഞ്ച് ഡിഐജി കെ. കാര്‍ത്തിക് വാര്‍ത്താ സമ്മേളനത്തില്‍ അറിയിച്ചു.

ന്യൂമാഹിയില്‍ വെച്ച് 0.6 ഗ്രാം എംഡിഎംഎയുമായി രജിനാസ് എന്നയാള്‍ പിടിയിലായതാണ് കേസില്‍ വഴിത്തിരിവായത്. ഇയാളെ ചോദ്യം ചെയ്തതില്‍നിന്ന് ലഹരി എത്തിച്ചത് മുഹമ്മദ് സമീലാണെന്ന് വ്യക്തമാവുകയും, തുടര്‍ന്ന് സമീലിന്റെ വീട്ടില്‍നിന്നും വാഹനത്തില്‍നിന്നുമായി 185 ഗ്രാം എംഡിഎംഎ പൊലീസ് പിടിച്ചെടുക്കുകയും ചെയ്തു.

സമീലിന്റെ ഫോണ്‍, ബാങ്ക് രേഖകള്‍ പരിശോധിച്ചതോടെയാണ് 'തബു' എന്ന മുജ്തബയെക്കുറിച്ചുള്ള വിവരങ്ങള്‍ പുറത്തുവന്നത്. ലഹരി ഇടനിലക്കാര്‍ വഴി ആളൊഴിഞ്ഞ  കേന്ദ്രങ്ങളില്‍ എംഡിഎംഎ ഒളിപ്പിച്ചുവെച്ച് ലൊക്കേഷന്‍ മാത്രം കൈമാറുന്ന രീതിയായിരുന്നു തബുവിന്റേത്. ശാസ്ത്രീയ അന്വേഷണത്തിനൊടുവില്‍ ബെംഗളൂരുവില്‍ വെച്ച് തബുവിനെയും പൊലീസ് കസ്റ്റഡിയിലെടുത്തു.

ഡല്‍ഹിയില്‍നിന്ന് പാര്‍സല്‍ വഴിയാണ് ഇവര്‍ നാട്ടിലേക്ക് ലഹരി കടത്തിയിരുന്നത്. ഈ കണ്ണിയിലൂടെ ലഭിച്ച തെളിവുകളാണ്വിദേശ വനിതകളിലേക്ക് പൊലീസിനെ എത്തിച്ചത്. പ്രതികള്‍ സിം കാര്‍ഡുകള്‍മാറ്റിയും ഇരുപതോളം ബാങ്ക് അക്കൗണ്ടുകള്‍ വഴിയും കോടികളുടെ ഇടപാടുകളാണ് നടത്തിയിരുന്നത്. കണ്ണൂര്‍ സിറ്റി പോലീസിന്റെ സ്‌ക്വാഡ് അംഗങ്ങള്‍ 10 ദിവസത്തോളം ഡല്‍ഹിയില്‍ താമസിച്ച് നടത്തിയ അന്വേഷണത്തിലാണ് പ്രതികളെ കണ്ടെത്തിയത്.

അമ്പതോളം വ്യാജ ആധാര്‍ കാര്‍ഡുകളും 15 പാന്‍ കാര്‍ഡുകളും ചെക്ക്  ബുക്കുകളും വ്യാജ ഡിഗ്രി സര്‍ട്ടിഫിക്കറ്റുകളും ഇവര്‍ ഉപയോഗിച്ചിരുന്നതായി പോലീസ് കണ്ടെത്തി. വിദേശത്തുനിന്ന് പാര്‍സല്‍ ആയാണ് ഇവര്‍ക്ക് മയക്കുമരുന്ന് നിര്‍മാണ സാമഗ്രികള്‍ ലഭിക്കുന്നതെന്നും ഡിഐജി പറഞ്ഞു. കൂടുതല്‍ അന്വേഷണം നടത്തി വരികയാണെന്നും ഡിഐജി അറിയിച്ചു. കമ്മീഷണറുടെ ഓഫീസില്‍ നടന്ന വാര്‍ത്താസമ്മേളനത്തില്‍ സിറ്റി പോലീസ് കമ്മീഷണര്‍ വിജയ് ഭാരത് റെഡ്ഡി, തലശ്ശേരി എ എസ് പി നന്ദഗോപന്‍ എന്നിവരും സംബന്ധിച്ചു.