സോഷ്യൽ മീഡിയ താരവും മുൻ ബിഗ് ബോസ് മത്സരാർത്ഥിയും കൊല്ലം സുധിയുടെ ഭാര്യയുമായ രേണു സുധി ഗുരുതരാവസ്ഥയിലാണെന്ന് വെളിപ്പെടുത്തി ഇൻഫ്ലുവൻസറും അവതാരകയുമായ ശാരിക കെ.ബി. ഇൻസ്റ്റഗ്രാമിൽ പങ്കു വച്ച വിഡിയോയിലൂടെയാണ് ശാരിക ഇക്കാര്യം വെളിപ്പെടുത്തിയിരിക്കുന്നത്. ഏറെ നാളായി കാൻസർ പോരാട്ടത്തിലാണ് രേണു.

അഞ്ചു കീമോകൾക്കു ശേഷം രേണുവിന്റെ ആരോഗ്യം വഷളായിരിക്കുകയാണ്. രേണു ഇപ്പോൾ കോട്ടയം മെ‍ഡിക്കൽ കോളേജിൽ ഐസിയുവിലാണെന്നും അവസ്ഥ വളരെ മോശമാണെന്ന് രേണുവിന്റെ ചേച്ചി വിളിച്ച് അറിയിച്ചതായും ശാരിക പറയുന്നു. 'റിയാലിറ്റി മിക്കപ്പോഴും ഇത്തിരി കയ്പ്പുള്ളതായിരിക്കും. കയ്പ്പുള്ള യാഥാർത്ഥ്യം എനിക്ക് നിങ്ങളോട് പറയേണ്ടി വരികയാണ്' എന്ന മുഖവുരയോടെയാണ് ശാരിക രേണുവിന്റെ ആരോഗ്യാവസ്ഥ അറിയിച്ചത്.

"എന്റെ പ്രിയപ്പെട്ട കൂട്ടുകാരി രേണുവിന്റെ അവസ്ഥ വളരെ വളരെ മോശമാണ്. വളരെ ക്രിട്ടിക്കലാണ്. പ്ലേറ്റ്ലെറ്റസ് കൗണ്ട് വല്ലാതെ കുറഞ്ഞു. ഹോസ്പിറ്റലിൽ അഡ്മിറ്റാണ്. ഇന്ന് വൈകുന്നേരമാണ് ഞാൻ അറിഞ്ഞതും എന്നെ വിളിച്ച് പറഞ്ഞതും. പ്രാർഥിക്കണമെന്ന് പറയാൻ വേണ്ടി വിളിച്ചതാണ്. അഞ്ചോളം കീമോകൾ അവൾക്ക് ചെയ്തു. ഓരോ കീമോ കഴിയുമ്പോഴും പച്ചവെള്ളം പോലും ഛർദിക്കുന്ന അവസ്ഥയാണ്. നാലാമത്തെ കീമോ വരെ അവൾ പത്ത് ദിവസം കിടന്ന് ചാടിയെഴുന്നേറ്റ് വീഡിയോ ചെയ്യുകയും മറുപടി തരുകയും ചെയ്തു. അഞ്ചാമത്തെ കീമോ കഴിഞ്ഞ് പത്ത് ദിവസം കഴിഞ്ഞും അവൾക്ക് എഴുന്നേൽക്കാൻ സാധിച്ചില്ല'. 'ആഹാരം കഴിക്കാൻ പറ്റില്ല. പിക്ക് ലൈൻ ഇട്ടു. ആഹാരം കഴിക്കുന്നതിന് പകരമുള്ള എന്തോ അവളുടെ ദേഹത്ത് ഘടിപ്പിച്ചിട്ടുണ്ട്. എന്ത് ചെയ്യണമെന്ന് അറിയാത്ത അവസ്ഥയിലാണ് രേണുവിന്റെ ചേച്ചി. അത്രയും വേ​ദന തിന്നുകയാണ് ആ കുട്ടി അവിടെ കിടന്ന്. ഉറപ്പായും അവൾ തിരിച്ച് വരും. നിങ്ങളുടെ എല്ലാവരുടെയും പ്രാർത്ഥന വേണം," ശാരിക പറഞ്ഞു.

‘’ഡോക്ടർ അറിയിച്ചത് ഇനിയൊരു കീമോ രേണു താങ്ങില്ല എന്നാണ്. അത്രയും റിസ്ക് ആശുപത്രി അധികൃതർക്ക് എടുക്കാനാവില്ല എന്നുമാണ്," ശാരിക കൂട്ടിച്ചേർത്തു.