റിയാദ്: വ്യോമാക്രമണ ഭീഷണിയുണ്ടെന്ന സൗദി അധികൃതരുടെ മുന്നറിയിപ്പിനു പിന്നാലെ റിയാദിലെ പ്രധാന വിമാനത്താവളത്തിനു സമീപം വൻ സ്ഫോടന ശബ്ദങ്ങളും കനത്ത പുകയും ഉയർന്നതായി റിപ്പോർട്ട്. യെമനിലെ ഹൂതി വിമതരുടെ ആക്രമണങ്ങൾ ശക്തമായ പശ്ചാത്തലത്തിലാണ് സംഭവമെന്ന് വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്തു.

വിമാനത്താവള പരിസരത്തുനിന്ന് കറുത്ത പുകപടലങ്ങൾ ആകാശത്തേക്ക് ഉയരുന്നതിന്റെ ചിത്രങ്ങളും വീഡിയോ ദൃശ്യങ്ങളും പുറത്തുവന്നിട്ടുണ്ട്. എയർപോർട്ട് ഹൈവേ, പ്രധാന ടെർമിനൽ കെട്ടിടം എന്നിവയ്ക്ക് സമീപത്തുനിന്നാണ് പുക ഉയരുന്നത്. ഇന്ധന സംഭരണികൾ എന്ന് കരുതപ്പെടുന്ന ഭാഗത്തിനു പിന്നിൽ നിന്ന് തീജ്വാലകൾ ഉയരുന്നതും ദൃശ്യങ്ങളിൽ കാണാം. എന്നാൽ, സംഭവത്തെക്കുറിച്ചോ ജാഗ്രതാ നിർദ്ദേശങ്ങളെക്കുറിച്ചോ സൗദി ഗവൺമെന്റ് മീഡിയ ഓഫീസ് ഇതുവരെ ഔദ്യോഗികമായി പ്രതികരിച്ചിട്ടില്ല.

ശനിയാഴ്ച പുലർച്ചെ റിയാദിലും തലസ്ഥാനത്തിന് കിഴക്കുള്ള അൽ-ഖർജ് നഗരത്തിലും വ്യോമാക്രമണ സാധ്യതയുണ്ടെന്ന് മുന്നറിയിപ്പ് നൽകി സൗദി സിവിൽ ഡിഫൻസ് ജനങ്ങളുടെ ഫോണുകളിലേക്ക് സന്ദേശം അയച്ചിരുന്നു. പിന്നീട് രാവിലെ സ്ഥിതിഗതികൾ നിയന്ത്രണവിധേയമായെന്ന അറിയിപ്പ് നൽകി. എന്നാൽ, ഈ അറിയിപ്പ് വരുന്നതിന് തൊട്ടുമുമ്പ് റിയാദിലെ ഒലയ മേഖലയിൽ വലിയ സ്ഫോടന ശബ്ദങ്ങൾ കേട്ടതായി റോയിട്ടേഴ്സ് സ്ഥിരീകരിച്ചു.

ജൂലൈയിൽ ഹൂതികളുമായുള്ള സംഘർഷം രൂക്ഷമായതിന് ശേഷം റിയാദിൽ നൽകുന്ന ആദ്യത്തെ വ്യോമാക്രമണ മുന്നറിയിപ്പാണിത്. യെമന്റെ ഭൂരിഭാഗം പ്രദേശങ്ങളും നിയന്ത്രിക്കുന്ന ഇറാൻ അനുകൂല ഹൂതികൾ, ജൂലൈയിൽ സൗദിക്കെതിരെ നാവിക ഉപരോധം പ്രഖ്യാപിച്ചതിന് പിന്നാലെ ചെങ്കടലിലെ സൗദി കപ്പലുകൾക്ക് നേരെയും ഊർജ്ജ കേന്ദ്രങ്ങൾക്ക് നേരെയും നിരന്തരം ആക്രമണങ്ങൾ നടത്തിവരികയാണ്. ഹോർമുസ് കടലിടുക്കിലെ ഗതാഗതം തടസ്സപ്പെട്ടിരിക്കുന്ന സാഹചര്യത്തിൽ, ചെങ്കടൽ വഴിയുള്ള വ്യാപാരത്തെയും ആഗോള എണ്ണ വിതരണത്തെയും ഈ ആക്രമണങ്ങൾ സാരമായി ബാധിക്കുന്നുണ്ട്.

യെമനിലെ സംഘർഷങ്ങൾ വർധിച്ച സാഹചര്യത്തിൽ വടക്കൻ യെമൻ നിയന്ത്രിക്കുന്ന ഹൂതികൾ സൗദി അറേബ്യക്ക് നേരെ ആക്രമണം ശക്തമാക്കിയിട്ടുണ്ട്. സിവിലിയൻ, ഊർജ അടിസ്ഥാനസൗകര്യങ്ങളെ ലക്ഷ്യമിട്ടുള്ള ഹൂതി ആക്രമണങ്ങളെ യു എൻ സെക്യൂരിറ്റി കൗൺസിൽ  അപലപിച്ചു.