ലോക രാഷ്ട്രീയത്തിൽ വ്യത്യസ്ത താൽപ്പര്യങ്ങളും നിലപാടുകളും പിന്തുടരുന്ന മൂന്ന് ശക്തരായ നേതാക്കൾ ഒരേ വേദിയിൽ കൈകോർത്ത് ചിരിച്ചുനിൽക്കുന്ന ചിത്രം ശ്രദ്ധേയമായി. ഇന്ത്യ, റഷ്യ, ചൈന എന്നീ രാജ്യങ്ങൾ ഒരേസമയം ആഗോള രാഷ്ട്രീയത്തിന്റെ നിർണായക ചർച്ചകളിൽ സജീവമായിരിക്കുമ്പോൾ, പ്രധാനമന്ത്രി നരേന്ദ്ര മോദിയും റഷ്യൻ പ്രസിഡന്റ് വ്‌ളാഡിമിർ പുടിനും ചൈനീസ് പ്രസിഡന്റ് ഷി ജിൻപിങ്ങും ഒരുമിച്ച് നിൽക്കുന്ന ദൃശ്യത്തിന് നയതന്ത്രപരമായ വലിയ പ്രാധാന്യമുണ്ട്. ഡൽഹിയിൽ നടക്കുന്ന പതിനെട്ടാമത് ബ്രിക്സ് നേതാക്കളുടെ ഉച്ചകോടിക്കിടെയാണ് മൂവരും ഒരുമിച്ച് പ്രത്യക്ഷപ്പെട്ടത്. മോദി ഈ ചിത്രം സോഷ്യൽ മീഡിയയിൽ പങ്കുവെച്ചതോടെ ദൃശ്യങ്ങൾ വലിയ ശ്രദ്ധ നേടുകയും ചെയ്തു.

യുക്രെയ്ൻ യുദ്ധം, പശ്ചിമേഷ്യയിലെ സംഘർഷങ്ങൾ, വ്യാപാര-സാമ്പത്തിക അനിശ്ചിതത്വങ്ങൾ, അമേരിക്കയും ചൈനയും തമ്മിലുള്ള തന്ത്രപരമായ മത്സരം തുടങ്ങി നിരവധി പ്രതിസന്ധികൾ ലോകത്തെ ചുറ്റിപ്പറ്റി നിൽക്കുന്ന സാഹചര്യത്തിലാണ് ബ്രിക്സ് ഉച്ചകോടി നടക്കുന്നത്. ഈ പശ്ചാത്തലത്തിൽ മോദി, പുടിൻ, ഷി എന്നിവർ ഒരുമിച്ച് നിൽക്കുന്ന ചിത്രം ബ്രിക്സ് രാജ്യങ്ങൾ തമ്മിലുള്ള സഹകരണത്തിന്റെയും സംഭാഷണത്തിന്റെയും പ്രതീകമായി വ്യാഖ്യാനിക്കപ്പെടുകയാണ്.