കോഴിക്കോട്: കല്ലുത്താൻ കടവ് പച്ചക്കറി മാർക്കറ്റുമായി ബന്ധപ്പെട്ട് വ്യാപാരികൾ നേരിടുന്ന വിവിധ പ്രശ്നങ്ങൾ ചർച്ച ചെയ്യുന്നതിനായി കാലിക്കറ്റ് ചേംബർ ഓഫ് കൊമേഴ്‌സ് ആൻഡ് ഇൻഡസ്ട്രി ഭാരവാഹികൾ മേയർ ഒ സദാശിവനെ സന്ദർശിച്ചു. മാർക്കറ്റുമായി ബന്ധപ്പെട്ട് വ്യാപാരികൾക്കും പൊതുജനങ്ങൾക്കും നഗരസഭയ്ക്കും സ്വീകാര്യമായ നിലപാട് സ്വീകരിച്ച് മുന്നോട്ടുപോകുമെന്ന് മേയർ വ്യക്തമാക്കി.
നിലവിൽ കല്ലുത്താൻ കടവ് പച്ചക്കറി മാർക്കറ്റുമായി ബന്ധപ്പെട്ട് നിലനിൽക്കുന്ന പ്രശ്നങ്ങൾ വിശദമായി ചർച്ച ചെയ്ത സംഘം വ്യാപാരികളുടെ ആശങ്കകളും പ്രയാസങ്ങളും മേയറുടെ ശ്രദ്ധയിൽപ്പെടുത്തി. മാർക്കറ്റിന്റെ പ്രവർത്തനവുമായി ബന്ധപ്പെട്ട വിഷയങ്ങളിൽ പ്രായോഗികമായ പരിഹാരം കണ്ടെത്തേണ്ടതിന്റെ ആവശ്യകതയും സംഘം ചൂണ്ടിക്കാട്ടി.

വ്യാപാര സമൂഹത്തിന്റെ താൽപര്യങ്ങൾ സംരക്ഷിക്കുന്നതിനൊപ്പം നഗരത്തിന്റെ വികസനവും പൊതുജനങ്ങളുടെ സൗകര്യവും പരിഗണിച്ചായിരിക്കും തീരുമാനങ്ങൾ കൈക്കൊള്ളുകയെന്ന് മേയർ പറഞ്ഞു. 
മാർക്കറ്റുമായി ബന്ധപ്പെട്ട പ്രശ്നങ്ങൾ നീണ്ടുനിൽക്കുന്നത് വ്യാപാരികളെയും ഉപഭോക്താക്കളെയും ഒരുപോലെ ബാധിക്കുന്ന സാഹചര്യത്തിൽ ബന്ധപ്പെട്ട എല്ലാ വിഭാഗങ്ങളുമായും ചർച്ച നടത്തി സമഗ്രമായ പരിഹാരം ഉണ്ടാക്കണമെന്ന ആവശ്യവും കാലിക്കറ്റ് ചേംബർ ഭാരവാഹികൾ മുന്നോട്ടുവച്ചു.

നഗരത്തിലെ പ്രധാന വ്യാപാര കേന്ദ്രങ്ങളിലൊന്നായ കല്ലുത്താൻ കടവ് പച്ചക്കറി മാർക്കറ്റിന്റെ പ്രവർത്തനം സുഗമമാക്കുന്നതിനും വ്യാപാരികൾക്ക് അനുകൂലമായ അന്തരീക്ഷം ഒരുക്കുന്നതിനും ആവശ്യമായ നടപടികൾ സ്വീകരിക്കുമെന്ന് മേയർ ഉറപ്പുനൽകിയതായി ചേംബർ ഭാരവാഹികൾ അറിയിച്ചു.
കാലിക്കറ്റ് ചേംബർ പ്രസിഡന്റ് എ.പി. അബ്ദുള്ളക്കുട്ടി, സെക്രട്ടറി ബോബിഷ് കുന്നത്ത്, സി.ഇ. ചാക്കുണ്ണി, അർഷാദ് ആദി രാജ, ടി പി എം ഹാഷിറലി , ജോഹർ ടാംടൺ, ഷെറിൻ താരിഖ് എന്നിവരാണ് മേയറുമായി ചർച്ച നടത്തിയത്.