കോഴിക്കോട്: സിഎംആർഎൽ-എക്‌സാലോജിക് ഇടപാടിൽ പ്രതിപക്ഷ നേതാവ് പിണറായി വിജയന്റെ പേര് പറയാൻ ഭാര്യ വീണയെയും സുഹൃത്ത് വാരിസിനെയും എൻഫോഴ്സ്മെന്റ് ഡയറക്ടറേറ്റ് (ഇ.ഡി) ഉദ്യോഗസ്ഥർ നിർബന്ധിച്ചതായി മുൻമന്ത്രി പി.എ. മുഹമ്മദ് റിയാസ്. അച്ഛൻ പറഞ്ഞിട്ടാണ് ഇടപാടുകൾ നടത്തിയതെന്ന് പറയാൻ വീണയ്ക്കുമേൽ കടുത്ത സമ്മർദ്ദമുണ്ടായെന്നും അതിന് വഴങ്ങാതിരുന്നപ്പോഴാണ് അന്വേഷണത്തോട് സഹകരിക്കുന്നില്ലെന്ന് ആരോപിച്ച് അറസ്റ്റ് ചെയ്തതെന്നും റിയാസ് വാർത്താസമ്മേളനത്തിൽ വ്യക്തമാക്കി. വീണ നൽകിയ സേവനങ്ങൾക്ക് അക്കൗണ്ട് വഴിയാണ് പണം വാങ്ങിയതെന്നും കൃത്യമായി നികുതി അടച്ചതിനെ മാസപ്പടിയാക്കി ചിത്രീകരിക്കാനാണ് ചിലർ ശ്രമിക്കുന്നതെന്നും അദ്ദേഹം പറഞ്ഞു.

​സുഹൃത്ത് ഹസൻ വാരിസിനെ ഭീഷണിപ്പെടുത്തിയാണ് ഇ.ഡി വ്യാജമൊഴി രേഖപ്പെടുത്തിയതെന്നും റിയാസ് ആരോപിച്ചു. റെയ്ഡിനിടെ പിണറായിയുടെ ഇടപാടാണെന്ന് പറയാൻ വാരിസിനോട് ആവശ്യപ്പെട്ടെങ്കിലും അദ്ദേഹം കണ്ടിട്ടുപോലുമില്ലെന്ന് പറഞ്ഞ് നിരസിച്ചു. തുടർന്ന് വീണയുടെ ഇടപാടാണെന്ന് സമ്മതിക്കാൻ നിർബന്ധിച്ചെന്നും, അതിനും വിസമ്മതിച്ചപ്പോൾ 22 വയസ്സുള്ള മകളെ ഹവാലക്കേസിൽ കുടുക്കുമെന്ന് ഭീഷണിപ്പെടുത്തുകയായിരുന്നു. സ്വന്തം മകളെ രക്ഷിക്കണമോ മറ്റുള്ളവരുടെ മകളെ രക്ഷിക്കണമോ എന്ന് ഭീഷണിപ്പെടുത്തി മാനസികമായി തകർത്താണ് തന്റെ പേര് എഴുതിച്ചേർത്ത പേപ്പറിൽ വാരിസിനെക്കൊണ്ട് ഒപ്പിടിപ്പിച്ചത്. ഇക്കാര്യം ചൂണ്ടിക്കാട്ടി വാരിസ് പിറ്റേദിവസം തന്നെ ഇ.ഡിക്ക് പരാതി അയച്ചിട്ടുണ്ടെന്നും റിയാസ് വെളിപ്പെടുത്തി.

​മാധ്യമങ്ങൾക്ക് ഇ.ഡിയെ പേടിയുണ്ടാകാമെങ്കിലും കമ്മ്യൂണിസ്റ്റുകാർ കേന്ദ്ര ഏജൻസികളെ ഭയപ്പെടില്ലെന്ന് മുഹമ്മദ് റിയാസ് പറഞ്ഞു. രാഹുൽ ഗാന്ധിക്കും സോണിയാ ഗാന്ധിക്കുമെതിരെ ഇ.ഡി കള്ളമൊഴികൾ ഉണ്ടാക്കിയ രീതി മുഖ്യമന്ത്രി വി.ഡി. സതീശന് അറിയാത്തതല്ലെന്നും രാഹുൽ ഗാന്ധി പോലും വ്യക്തിഹത്യ നടത്തുന്ന ഏജൻസിയെന്നാണ് ഇ.ഡിയെ വിശേഷിപ്പിച്ചതെന്നും അദ്ദേഹം ഓർമ്മിപ്പിച്ചു. നിരപരാധികളെ നിരന്തരം വേട്ടയാടുകയും മാധ്യമവിചാരണ നടത്തുകയുമാണ് കേന്ദ്ര ഏജൻസികളുടെ ലക്ഷ്യം. തന്നെയും പിണറായിയെയും ലക്ഷ്യമിട്ട് നടക്കുന്ന ഈ രാഷ്ട്രീയ നീക്കങ്ങളെയും കള്ളക്കഥകളെയും രാഷ്ട്രീയമായും നിയമപരമായും നേരിടുമെന്നും അദ്ദേഹം വ്യക്തമാക്കി.