വാഷിങ്ടൺ: റിലേറ്റിവിറ്റി സ്പേസിന്റെ ടെറാൻ ആർ റോക്കറ്റ് നാസയുടെ ലോഞ്ച് സർവീസസ് കരാർ പട്ടികയിൽ ഇടം നേടി. ഭാവിയിലെ ദൗത്യങ്ങൾക്കായി ടെറാൻ Rന്റെ വിക്ഷേപണ സേവനം ഉപയോഗിക്കാൻ നാസയ്ക്ക് ഇനി സാധിക്കും. നാസ ലോഞ്ച് സർവീസസ് (എൻഎൽഎസ്) II കരാറിലെ 'ഓൺ-റാംപ്' വ്യവസ്ഥ പ്രകാരമാണ് റിലേറ്റിവിറ്റി സ്പേസിന് കരാർ ലഭിച്ചത്.

എൻഎൽഎസ് II കരാറുകൾ ഒന്നിലധികം കമ്പനികൾക്ക് നൽകുന്ന 'ഇൻഡെഫിനിറ്റ്-ഡെലിവറി, ഇൻഡെഫിനിറ്റ്-ക്വാണ്ടിറ്റി' കരാറുകളാണ്. 2030 ജൂൺ വരെ പുതിയ വിക്ഷേപണ സേവനദാതാക്കൾക്ക് മത്സരിച്ച് കരാറിൽ പ്രവേശിക്കാനുള്ള അവസരമുണ്ട്. നിലവിലുള്ള കരാറുകാർക്ക് തങ്ങളുടെ പട്ടികയിൽ ഉൾപ്പെടാത്ത പുതിയ വിക്ഷേപണ വാഹനങ്ങളും അവതരിപ്പിക്കാം.

മനുഷ്യ ബഹിരാകാശ ദൗത്യങ്ങൾ, ശാസ്ത്ര ദൗത്യങ്ങൾ, ഗവേഷണ-സാങ്കേതിക ദൗത്യങ്ങൾ എന്നിവ ഉൾപ്പെടെ നാസയുടെ വിവിധ പദ്ധതികൾക്ക്  എൻഎൽഎസ്  II കരാറുകൾ പിന്തുണ നൽകും. നാഷണൽ ഓഷ്യാനിക് ആൻഡ് അറ്റ്മോസ്ഫെറിക് അഡ്മിനിസ്ട്രേഷൻ (എൻഒഎഎ) ഉൾപ്പെടെയുള്ള മറ്റ് സർക്കാർ ഏജൻസികൾക്കും ഈ കരാറിന്റെ ഭാഗമായി വിക്ഷേപണ സേവനങ്ങൾ ലഭ്യമാക്കാൻ നാസയ്ക്ക് കഴിയും.

നാസയുടെ ഫ്ലോറിഡയിലെ കെന്നഡി സ്പേസ് സെന്ററിലെ ലോഞ്ച് സർവീസസ് പ്രോഗ്രാം ഓഫീസാണ്  എൻഎൽഎസ്  II കരാറുകളുടെ നടത്തിപ്പ് നിയന്ത്രിക്കുന്നത്. കരാറിന്റെ ആകെ കാലാവധി 2032 ഡിസംബർ വരെയാണ്.