ന്യൂ യോർക്ക് മേയർ സോഹ്രാൻ മാംദാനി 9/11 ആക്രമണത്തിന്റെ 25ആം വാർഷിക ചടങ്ങുകളിൽ പങ്കെടുക്കാൻ പാടില്ലെന്നു മുൻ റിപ്പബ്ലിക്കൻ മേയർ റൂഡി ജൂലിയാനി പറഞ്ഞതിനു പിന്നാലെ മാംദാനിക്കു പിന്തുണയുമായി ഗവർണർ കാത്തി ഹോക്കൽ.

"സെപ്റ്റംബർ 11 ആക്രമണത്തിനു ശേഷം നമ്മെ ഒന്നിച്ചു നിർത്തിയ ഐക്യത്തിന്റെ ആവേശം തകർക്കുന്ന ഭിന്നതകൾ ഉണ്ടാവാൻ പാടില്ല," ഹോക്കൽ ചൂണ്ടിക്കാട്ടി. "ഈ 25ആം വാർഷികത്തിൽ നമുക്ക് നഷ്ടപ്പെട്ടവരെ ഓർമിക്കാം. ന്യൂ യോർക്ക് നിവാസികളായി, അമേരിക്കൻ ജനതയായി ഒന്നിച്ചു നിൽക്കാം," അവർ എക്‌സിൽ കുറിച്ചു. "ന്യൂ യോർക്ക് സിറ്റി മേയർ അവിടെ ഉണ്ടാവണം, അത് അദ്ദേഹത്തിന്റെ ചുമതലയാണ്."

അൽ ഖൈദ ആക്രമണത്തിൽ ഉൾപ്പെട്ട ഭീകരനുമായി അടുത്ത ബന്ധമുള്ള ഒരാൾക്കു വേണ്ടി കോടതിയിൽ ഹാജരായ റംസി കാസമിനെ മാംദാനി നഗരത്തിന്റെ പ്രധാന അഭിഭാഷകനായി നിയമിച്ചു എന്നതാണ് ജൂലിയാനി ഉയർത്തിയ എതിർപ്പ്. 9/11ൽ മരിച്ച ചിലരുടെ കുടുംബങ്ങൾ ഇക്കാര്യം ചൂണ്ടിക്കാട്ടി മാംദാനിയെ ചടങ്ങിൽ നിന്നു വിലക്കണം എന്നാവശ്യപ്പെട്ടു ഒപ്പുശേഖരണം നടത്തിയിരുന്നു.

ആക്രമണ സമയത്തു മേയറായിരുന്ന ജൂലിയാനി മാംദാനിക്കെതിരെ മുസ്ലിം വിദ്വേഷം നിറഞ്ഞ ഗൂഢാലോചന സിദ്ധാന്തങ്ങൾ പ്രചരിപ്പിച്ചിരുന്നു. മാംദാനി അതെല്ലാം തള്ളിക്കളയുകയും ചെയ്തു. വെള്ളിയാഴ്ച്ച നടക്കുന്ന അനുസ്മരണം 'സെപ്റ്റംബർ 11ലെ ഭീകരമായ ആക്രമണത്തിൽ' മരിച്ചവരുടെ കുടുംബങ്ങൾക്കു വേണ്ടിയുള്ളതാണെന്നു അദ്ദേഹം ചൂണ്ടിക്കാട്ടുകയും ചെയ്തു.

"ഈ നഗരത്തിനു വേണ്ടി എല്ലാം ത്യജിച്ച ആദ്യ രക്ഷാ പ്രവർത്തകർക്കും നഗരവാസികളെ സഹായിക്കാൻ എല്ലാം മറന്നെത്തിയവർക്കും കൂടി ഉള്ളതാണ് ആ ചടങ്ങ്. അതു കൊണ്ട് ഈ അനുസ്മരണാ ചടങ്ങുകളിലെല്ലാം ഞാൻ എത്തും." 

Hochul voices support for Mamdani