കൊച്ചി: മുഖ്യമന്ത്രി പിണറായി വിജയന്റെ വസതിയിൽ റെയ്ഡ് നടത്തി മടങ്ങിയ എൻഫോഴ്സ്മെന്റ് ഡയറക്ടറേറ്റ് (ഇ.ഡി) ഉദ്യോഗസ്ഥരെ ആക്രമിച്ച സംഭവത്തിൽ കള്ളപ്പണം വെളുപ്പിക്കൽ നിരോധന നിയമപ്രകാരം (പി.എം.എൽ.എ) ഇ.ഡി കേസെടുത്തു. ഒരു വധശ്രമക്കേസിൽ പി.എം.എൽ.എ നിയമത്തിലെ വകുപ്പുകൾ ചുമത്തുന്നത് രാജ്യത്ത് ഇതാദ്യമായാണ്. സംഭവത്തിൽ പൊലീസ് നേരത്തെ രജിസ്റ്റർ ചെയ്ത കേസിലെ മുഴുവൻ പ്രതികളെയും ഉൾപ്പെടുത്തിയാണ് കേന്ദ്ര ഏജൻസി പുതിയ കേസ് രജിസ്റ്റർ ചെയ്തിരിക്കുന്നത്. കേസ് അന്വേഷിച്ച ലോക്കൽ പൊലീസിന്റെ നടപടികളിൽ ഇ.ഡി നേരത്തെ അതൃപ്തി വ്യക്തമാക്കിയിരുന്നു.

​കള്ളപ്പണ ഇടപാടുമായി ബന്ധപ്പെട്ട അന്വേഷണം തടസ്സപ്പെടുത്തുക എന്ന ലക്ഷ്യത്തോടെയാണ് റെയ്ഡിനിടെ ഉദ്യോഗസ്ഥർക്കു നേരെ ആസൂത്രിത ആക്രമണം ഉണ്ടായതെന്നാണ് ഇ.ഡിയുടെ പ്രാഥമിക നിഗമനം. വധശ്രമത്തിന് പിന്നിലെ ഗൂഢാലോചനയും ഇതുമായി ബന്ധപ്പെട്ട സാമ്പത്തിക ഇടപാടുകളുമാണ് പ്രധാനമായും അന്വേഷണ പരിധിയിൽ വരുന്നത്. അന്വേഷണം നേരിടുന്ന വ്യക്തികളിൽ നിന്നോ കേന്ദ്രങ്ങളിൽ നിന്നോ ആക്രമണം നടത്തിയവർക്ക് പണമിടപാടുകൾ ലഭിച്ചിട്ടുണ്ടോ എന്ന് പരിശോധിക്കും. കൂടാതെ, സംഭവസമയത്ത് സ്ഥലത്തുണ്ടായിരുന്ന നേതാക്കളുടെ പങ്കിനെക്കുറിച്ചും വിശദമായ അന്വേഷണം നടത്തും.

​കഴിഞ്ഞ മെയ് 27-നായിരുന്നു പിണറായി വിജയന്റെ സ്വകാര്യ വസതിയിലെ പരിശോധനയ്ക്കു ശേഷം മടങ്ങിയ ഇ.ഡി സംഘത്തിന്റെ കാർ തടഞ്ഞ് സി.പി.എം പ്രവർത്തകർ ആക്രമണം അഴിച്ചുവിട്ടത്. തുടർന്ന് 27 പേരെ പ്രതിചേർത്ത് പൊലീസ് കേസ് എടുത്തിരുന്നു. എന്നാൽ, ആക്രമണത്തിന് പിന്നിലെ രാഷ്ട്രീയ-സാമ്പത്തിക ഗൂഢാലോചനയിലേക്ക് പൊലീസ് അന്വേഷണം നീങ്ങാത്ത സാഹചര്യത്തിലാണ് ഇ.ഡിയുടെ നേരിട്ടുള്ള ഇടപെടൽ. പി.എം.എൽ.എ നിയമപ്രകാരം വധശ്രമവും ക്രിമിനൽ ഗൂഢാലോചനയും ഷെഡ്യൂൾഡ് ഒഫൻസുകളുടെ (Scheduled Offences) പരിധിയിൽ വരുന്നതിനാൽ, കേസ് ഇ.ഡിക്ക് നേരിട്ട് അന്വേഷിക്കുന്നതിന് നിയമതടസ്സങ്ങളില്ല.