തിരുവനന്തപുരം: കടുത്ത വേനലിൽ സംസ്ഥാനത്ത് വൈദ്യുതി പ്രതിസന്ധി അതിരൂക്ഷമായ സാഹചര്യത്തിൽ അടിയന്തര നടപടികൾ ചർച്ച ചെയ്യാൻ ഇന്ന് തലസ്ഥാനത്ത് ഉന്നതതല യോഗം ചേരുന്നു. വൈദ്യുതി മന്ത്രി സണ്ണി ജോസഫിന്റെ ചേംബറിൽ രാവിലെ 11 മണിക്ക് ചേരുന്ന യോഗത്തിൽ കെ.എസ്.ഇ.ബി ചെയർമാനും ബോർഡ് അംഗങ്ങളും ഉന്നത ഉദ്യോഗസ്ഥരും പങ്കെടുക്കും. ഉയർന്ന ഉപഭോഗം മുൻകൂട്ടി കണ്ട് മുൻകരുതലുകൾ എടുക്കുന്നതിൽ സർക്കാരിനും കെ.എസ്.ഇ.ബിക്കും വലിയ വീഴ്ച സംഭവിച്ചെന്ന വിമർശനങ്ങൾക്കിടെയാണ് യോഗം വിളിച്ചുചേർത്തിരിക്കുന്നത്.

​ഉത്തരേന്ത്യൻ സംസ്ഥാനങ്ങളിൽ പെയ്ത കനത്ത മഴയെത്തുടർന്ന് കൽക്കരി ഖനനം തടസ്സപ്പെട്ടതും വൈദ്യുതോൽപ്പാദനത്തിൽ ഉണ്ടായ ഇടിവുമാണ് കേരളത്തെയും ബാധിച്ചത്. കൽക്കരി ക്ഷാമം രൂക്ഷമായതോടെ കേന്ദ്ര വിഹിതത്തിൽ വലിയ കുറവാണുണ്ടായത്. കൂടാതെ, പീക്ക് സമയത്തെ അധിക ആവശ്യകത പരിഹരിക്കാൻ കെ.എസ്.ഇ.ബിക്ക് നിലവിൽ ഹ്രസ്വകാല കരാറുകളൊന്നുമില്ല. തെക്കേ ഇന്ത്യൻ സംസ്ഥാനങ്ങളിലും ഉപഭോഗം കുതിച്ചുയർന്നതോടെ പവർ എക്‌സ്‌ചേഞ്ചുകളിൽനിന്നും ആവശ്യത്തിന് വൈദ്യുതി ലഭിക്കാത്ത സാഹചര്യമാണ് നിലവിലുള്ളത്.

​സംസ്ഥാനത്ത് വൈദ്യുതി ആവശ്യകത ക്രമാതീതമായി ഉയർന്നതും ഗ്രിഡിലെ ഫ്രീക്വൻസി അപകടകരമായ രീതിയിൽ താഴ്ന്നതും സതേൺ റീജിയൻ ലോഡ് ഡെസ്പാച്ച് സെന്ററിന്റെ ഇടപെടലിന് കാരണമായി. ഇതോടെ സംസ്ഥാനത്ത് പലയിടങ്ങളിലും ദിവസത്തിൽ ഒന്നിലധികം തവണ അപ്രഖ്യാപിത പവർകട്ട് ഏർപ്പെടുത്തേണ്ട അവസ്ഥയിലാണ് ബോർഡ്. പീക്ക് സമയത്തെ നിയന്ത്രണങ്ങൾ ഒഴിവാക്കാനും പുറത്തുനിന്ന് അധിക വൈദ്യുതി എത്തിക്കാനുമുള്ള ബദൽ മാർഗങ്ങൾ ഇന്നത്തെ യോഗത്തിൽ തീരുമാനിക്കും.