​പാരീസ്: ഹിന്ദു സംഘടനാ പ്രതിനിധികളുടെ സന്ദർശനത്തിനിടെ വനിതാ ജീവനക്കാരെ ജോലിസ്ഥലത്തുനിന്ന് മാറ്റിനിർത്തിയെന്ന പരാതിയെത്തുടർന്ന് പാരീസിലെ വിശ്വപ്രസിദ്ധമായ ഐഫൽ ടവർ ജീവനക്കാർ പണിമുടക്കി അടപ്പിച്ചു. പാരീസിൽ പുതുതായി നിർമ്മിച്ച സ്വാമിനാരായൺ (ബി.എ.പി.എസ്) ഹിന്ദു ക്ഷേത്രത്തിന്റെ ഉദ്ഘാടന ചടങ്ങുകൾക്കെത്തിയ നൂറോളം വരുന്ന പ്രതിനിധി സംഘമാണ് ഐഫൽ ടവർ സന്ദർശിക്കാനെത്തിയത്. ഇവർ എത്തുന്നതിന് മുന്നോടിയായി വനിതാ ജീവനക്കാരോട് കാഴ്ചയിൽപ്പെടാത്ത രീതിയിൽ മാറിനിൽക്കാൻ ആവശ്യപ്പെടുകയും ഇവർക്ക് പകരം പുരുഷ ജീവനക്കാരെ നിയോഗിക്കുകയും ചെയ്തെന്നാണ് യൂണിയൻ പ്രതിനിധികൾ വ്യക്തമാക്കിയത്. ലിംഗവിവേചനപരമായ മാനേജ്‌മെന്റിന്റെ ഈ നിർദേശത്തിനെതിരെ ജീവനക്കാർ പ്രതിഷേധവുമായി രംഗത്തെത്തിയതോടെയാണ് ചരിത്ര സ്മാരകം താത്കാലികമായി അടച്ചിടേണ്ടി വന്നത്.

​സ്ത്രീകളുമായുള്ള സമ്പർക്കം പരമാവധി ഒഴിവാക്കണമെന്ന് സന്ദർശക സംഘം ആവശ്യപ്പെട്ടിരുന്നതായി ഐഫൽ ടവറിന്റെ നടത്തിപ്പുകാരായ സെറ്റെ (SETE) സ്ഥിരീകരിച്ചു. എന്നാൽ ലിംഗസമത്വത്തിന് വിരുദ്ധമായ ഇത്തരം നിബന്ധനകൾ അംഗീകരിക്കാൻ പാടില്ലായിരുന്നുവെന്നും സംഭവിച്ചതിൽ ജീവനക്കാരോട് നിർവ്യാജം ക്ഷമ ചോദിക്കുന്നതായും മാനേജ്‌മെന്റ് പിന്നീട് അറിയിച്ചു. സംഭവത്തിൽ അസൗകര്യമുണ്ടായതിൽ സംഘാടകരായ ബി.എ.പി.എസ് അധികൃതരും ഖേദം പ്രകടിപ്പിച്ചിട്ടുണ്ട്. ആർക്കും പ്രവേശനം നിഷേധിക്കാൻ ഉദ്ദേശിച്ചിരുന്നില്ലെന്നും പ്രതിനിധികളുടെ എണ്ണക്കൂടുതൽ കാരണം മറ്റുള്ളവർക്ക് തടസ്സമുണ്ടാകാതിരിക്കാനാണ് സന്ദർശനം ക്രമീകരിച്ചതെന്നുമാണ് അവരുടെ വിശദീകരണം.  

​വിഷയം ഫ്രാൻസിൽ വലിയ രാഷ്ട്രീയ വിവാദത്തിന് വഴിവെച്ചതോടെ പാരീസ് മേയർ ഇമ്മാനുവൽ ഗ്രിഗോയർ സംഭവത്തിൽ അടിയന്തര അന്വേഷണത്തിന് ഉത്തരവിട്ടു. ചരിത്രസ്മാരകങ്ങളിലോ നഗരത്തിലെ മറ്റെവിടെയെങ്കിലുമോ സ്ത്രീ-പുരുഷ സമത്വം ഇല്ലാതാക്കാൻ അനുവദിക്കില്ലെന്നും ജീവനക്കാരുടെ പ്രതിഷേധം തികച്ചും ന്യായമാണെന്നും മേയർ വ്യക്തമാക്കി. ഫ്രാൻസിന്റെ മണ്ണിൽ ആരുടെയും നിർബന്ധപ്രകാരം സ്ത്രീകൾ അദൃശ്യരാകേണ്ടതില്ലെന്നും ഒരു വിശ്വാസത്തിനും ഭരണഘടനാ മൂല്യങ്ങൾക്ക് മുകളിൽ സ്ഥാനമില്ലെന്നും വ്യക്തമാക്കിക്കൊണ്ട് ഫ്രഞ്ച് രാഷ്ട്രീയ നേതാക്കളും മാനേജ്‌മെന്റിന്റെ നടപടിയെ രൂക്ഷമായി വിമർശിച്ചു.