മലപ്പുറം: ദേശീയപാത 66-ൽ ചേലേമ്പ്ര ഇടിമുഴിക്കലിന് സമീപമുണ്ടായ വാഹനാപകടത്തിൽ രണ്ട് യുവാക്കൾ മരിച്ചു. മലപ്പുറം കൂമണ്ണ സ്വദേശികളായ ജംഷീർ, ഹാരിസ് എന്നിവരാണ് മരിച്ചത്. ഇവർ സഞ്ചരിച്ചിരുന്ന കാർ ലോറിയുമായി കൂട്ടിയിടിച്ചാണ് അപകടമുണ്ടായത്. അപകടത്തിൽ പരിക്കേറ്റ മറ്റ് മൂന്നുപേരെ ആശുപത്രിയിൽ പ്രവേശിപ്പിച്ചു. ഇതിൽ രണ്ടുപേരുടെ നില അതീവ ഗുരുതരമാണെന്നാണ് വിവരം.

​അപകടത്തെത്തുടർന്ന് കാർ പൂർണമായും തകർന്ന നിലയിലാണ്. നാട്ടുകാരും പോലീസും ചേർന്നാണ് കാർ വെട്ടിപ്പൊളിച്ച് പരിക്കേറ്റവരെയും മൃതദേഹങ്ങളും പുറത്തെടുത്തത്. തുടർന്ന് ഇവരെ കോഴിക്കോട് മെഡിക്കൽ കോളേജ് ഉൾപ്പെടെയുള്ള സമീപത്തെ ആശുപത്രികളിലേക്ക് മാറ്റി. ഇടിയുടെ ആഘാതത്തിൽ ദേശീയപാതയിൽ ഏറെനേരം ഗതാഗതം തടസ്സപ്പെടുകയും ചെയ്തു.

​അതേസമയം, തൃശൂർ കുന്നംകുളത്തും കഴിഞ്ഞദിവസം മൂന്നുവയസ്സുകാരൻ ഉൾപ്പെടെ ഒരു കുടുംബത്തിലെ മൂന്നുപേരുടെ ജീവനപഹരിച്ച വാഹനാപകടം നടന്നിരുന്നു. ആർത്താറ്റ് പള്ളിക്ക് സമീപം കാറും ബൈക്കും കൂട്ടിയിടിച്ച് ബൈക്ക് യാത്രക്കാരായ മുനീർ, ഭാര്യ സഫ്ന, മൂന്നുവയസ്സുകാരനായ മകൻ എമിൽ ഐബക്ക് എന്നിവരാണ് മരിച്ചത്. സംസ്ഥാനത്ത് റോഡപകടങ്ങൾ വർധിക്കുന്നത് കനത്ത ആശങ്ക ഉയർത്തുന്നുണ്ട്.