വാഷിങ്ടൺ: ആർഎസ്എസ് മേധാവി മോഹൻ ഭഗവതിനെ ഉൾപ്പെടുത്തി ദി വാൾ സ്ട്രീറ്റ് ജേണലിൽ പ്രസിദ്ധീകരിച്ച മുഴുവൻ പേജ് പരസ്യം ഹിന്ദു അമേരിക്കക്കാരിൽ അഭിമാനം സൃഷ്ടിച്ചതായി പ്രമുഖ ഹിന്ദു അമേരിക്കൻ നേതാക്കൾ. ഐക്യവും വൈവിധ്യത്തോടുള്ള ആദരവും ഉയർത്തിപ്പിടിക്കുന്ന പരസ്യത്തിന്റെ സന്ദേശം സമൂഹത്തിന് അഭിമാനകരമാണെന്നും നേതാക്കൾ പറഞ്ഞു.

സെപ്റ്റംബർ 3-ലെ വാൾ സ്ട്രീറ്റ് ജേണലിന്റെ എ5 പേജിലാണ് പരസ്യം പ്രസിദ്ധീകരിച്ചത്. ഓഗസ്റ്റ് 29ന് ന്യൂയോർക്കിലെ മാഡിസൺ സ്ക്വയർ ഗാർഡനിൽ നടന്ന യൂണിവേഴ്സൽ വൺനസ് സെലിബ്രേഷനിൽ ഭാഗവത് നടത്തിയ പ്രസംഗത്തിലെ പരാമർശങ്ങളാണ് പരസ്യത്തിൽ ഉൾപ്പെടുത്തിയിരുന്നത്.

'നമ്മുടെ ഏകത്വവും വൈവിധ്യവും ആഘോഷിക്കുകയും ബഹുമാനിക്കുകയും അംഗീകരിക്കുകയും വേണം. ലോകം ഒരു കുടുംബമാണെന്ന 'വസുധൈവ കുടുംബകം' എന്ന ആശയത്തിൽ അധിഷ്ഠിതമായ നാഗരിക പാരമ്പര്യമാണ് ഇന്ത്യയുടേത്. ഈ വൈവിധ്യത്തിന്റെ ജീവിക്കുന്ന ഉദാഹരണമാണ് ഇന്ത്യ' എന്നാണ് ഭഗവതിനെ ഉദ്ധരിച്ച് പരസ്യത്തിൽ പറയുന്നത്.

ഇന്ത്യയിലെ 'ലോകത്തിലെ ഏറ്റവും വലിയ സന്നദ്ധ സംഘടനയായ' ആർഎസ്എസിന്റെ തലവനാണ് ഗവതെന്നും പരസ്യത്തിൽ വിശേഷിപ്പിക്കുന്നു. അമേരിക്കയിലെ 39 സംസ്ഥാനങ്ങളിലെ 853 നഗരങ്ങളിൽ നിന്നുള്ള 250 സംഘടനകളെ പ്രതിനിധീകരിച്ച് 5,000 പേർ യൂണിവേഴ്സൽ ഓണ്നസ് പരിപാടിയിൽ പങ്കെടുത്തതായും പരസ്യത്തിൽ പറയുന്നു. ആർഎസ്എസ് ഫ്രണ്ട്സ് ആണ് പരസ്യത്തിന് പണം നൽകിയതെന്ന് പത്രത്തിലെ വെളിപ്പെടുത്തലിൽ വ്യക്തമാക്കിയിട്ടുണ്ട്.

പ്രമുഖ സാമൂഹിക പ്രവർത്തകനും വ്യവസായിയുമായ രമേഷ് ഭൂട്ടാഡ പരസ്യം ഹിന്ദു അമേരിക്കക്കാർക്ക് അഭിമാനകരമാണെന്ന് പറഞ്ഞു. ഹിന്ദുമതത്തിന്റെ ചൈതന്യമാണ് പരസ്യം പ്രതിഫലിപ്പിക്കുന്നതെന്നും അദ്ദേഹം വ്യക്തമാക്കി.

മറ്റ് സമൂഹങ്ങളുമായി സംവാദത്തിനും സഹകരണത്തിനും ഹിന്ദു സമൂഹം പ്രതിജ്ഞാബദ്ധമാണെന്ന് എഹെഡ് ഫോറം ഡയറക്ടർ സുധേഷ് അഗർവാൾ പറഞ്ഞു. മനുഷ്യരാശിയുടെ പുരോഗതിക്കായി ഈ പ്രതിബദ്ധത പ്രായോഗിക പ്രവർത്തനങ്ങളാക്കി മാറ്റണമെന്നും അദ്ദേഹം കൂട്ടിച്ചേർത്തു.

1925ൽ നാഗ്പൂരിൽ സ്ഥാപിതമായ ആർഎസ്എസിന്റെ സർസംഘചാലകാണ് മോഹൻ ഗവത്. 2025ൽ സംഘടന ശതാബ്ദി ആഘോഷിച്ചിരുന്നു. ഓഗസ്റ്റ് 29ന് മാഡിസൺ സ്ക്വയർ ഗാർഡനിൽ നടന്ന പരിപാടിയിൽ അമേരിക്കയുടെ വിവിധ ഭാഗങ്ങളിൽ നിന്നുള്ള ഹിന്ദു അമേരിക്കക്കാരും സംഘടനാ പ്രതിനിധികളും പങ്കെടുത്തു. പരിപാടിയുടെ പ്രധാന പ്രമേയം 'സാർവത്രിക ഏകത്വം', സമൂഹങ്ങൾ തമ്മിലുള്ള സഹകരണം, ഇന്ത്യൻ നാഗരിക മൂല്യങ്ങളിലൂടെ വിവിധ സമൂഹങ്ങൾക്കിടയിൽ സൗഹാർദം വളർത്തൽ എന്നിവയായിരുന്നു.