ന്യൂഡൽഹി: അതിർത്തിയിലെ വ്യോമാക്രമണത്തിൽ പാകിസ്ഥാന്റെ എഫ്-16 യുദ്ധവിമാനം വെടിവെച്ചിട്ട് വീരചക്ര പുരസ്കാരം നേടിയ ഗ്രൂപ്പ് ക്യാപ്റ്റൻ അഭിനന്ദൻ വർധമാൻ വ്യോമസേനയിൽ നിന്ന് വിരമിച്ചു. മാർച്ച് 31-ന് വ്യോമസേനയിലെ സേവനം അവസാനിപ്പിച്ച അദ്ദേഹം ഇനി വാണിജ്യ യാത്രാവിമാനങ്ങൾ പറത്തും. മലയാളിയായ മനോജ് ചാക്കോയുടെ നേതൃത്വത്തിലുള്ള റീജിയണൽ വിമാനക്കമ്പനിയായ 'ഫ്ലൈ91'-ൽ (FLY91) പൈലറ്റായാണ് അഭിനന്ദൻ പുതിയ കരിയറിന് തുടക്കം കുറിക്കുന്നത്. കമ്പനിയുടെ എടിആർ 72-600 ടർബോപ്രോപ്പ് വിമാനങ്ങളാകും അദ്ദേഹം പറത്തുക.  

​2019 ഫെബ്രുവരി 14-ന് പുൽവാമയിലുണ്ടായ ചാവേർ ആക്രമണത്തിൽ 40 സി.ആർ.പി.എഫ് ജവാന്മാർ വീരമൃത്യു വരിച്ചതിന് തിരിച്ചടിയായി ഇന്ത്യ ബാലാകോട്ടിലെ ഭീകരകേന്ദ്രങ്ങളിൽ വ്യോമാക്രമണം നടത്തിയിരുന്നു. ഇതിന് പിന്നാലെ ഫെബ്രുവരി 27-ന് ഇന്ത്യൻ വ്യോമാതിർത്തി ലംഘിച്ചെത്തിയ പാക് പോർവിമാനങ്ങളുമായി നടന്ന വ്യോമപോരാട്ടത്തിലാണ് അന്ന് വിങ് കമാൻഡറായിരുന്ന അഭിനന്ദൻ പാകിസ്ഥാന്റെ അത്യാധുനിക എഫ്-16 വിമാനം വെടിവെച്ചിട്ടത്. ഈ പോരാട്ടത്തിനിടെ അദ്ദേഹം സഞ്ചരിച്ചിരുന്ന മിഗ്-21 വിമാനം തകരുകയും ചെയ്തു.  

​തുടർന്ന് പാരഷൂട്ട് വഴി പാക് അധീന കശ്മീരിൽ ഇറങ്ങിയ അഭിനന്ദനെ പരിക്കുകളോടെ പാകിസ്ഥാൻ സൈന്യം കസ്റ്റഡിയിലെടുത്തു. ഇന്ത്യയുടെ ശക്തമായ നയതന്ത്ര സമ്മർദ്ദത്തിനൊടുവിൽ മാർച്ച് ഒന്നിന് അദ്ദേഹത്തെ മോചിപ്പിച്ചു. ധീരമായ സേവനത്തിന് രാജ്യം വീരചക്ര നൽകി ആദരിച്ച അദ്ദേഹത്തിന് 2021-ലാണ് ഗ്രൂപ്പ് ക്യാപ്റ്റനായി സ്ഥാനക്കയറ്റം ലഭിച്ചത്. രാജ്യരക്ഷയിൽ ചരിത്രം കുറിച്ച ഈ പോരാളി ഇനി സാധാരണ യാത്രക്കാരുമായി ആകാശപാതകളിൽ സജീവമാകും.