കാഠ്മണ്ഡു: നേപ്പാളിലുണ്ടായ അതിരൂക്ഷമായ മിന്നല്‍പ്രളയത്തില്‍ മരണസംഖ്യ 1,127 ആയി. 4,858 പേരെ ഇപ്പോഴും കാണാനില്ലെന്നാണ് നേപ്പാള്‍ പൊലീസ് ബുധനാഴ്ച അറിയിച്ചത്. ജീവനോടെ ശേഷിച്ചവരെ കണ്ടെത്താനും മൃതദേഹങ്ങള്‍ വീണ്ടെടുക്കാനുമുള്ള തിരച്ചില്‍ അപകടം നടന്ന് എട്ടാം ദിവസവും രക്ഷാപ്രവര്‍ത്തകര്‍ തുടരുകയാണ്. നേപ്പാള്‍ പൊലീസിന്റെ കണക്കുകള്‍ പ്രകാരം ചിത്വാനില്‍ നിന്ന് 348 മൃതദേഹങ്ങളും നാവല്‍പരാസി ഈസ്റ്റില്‍ നിന്ന് 217 മൃതദേഹങ്ങളും നാവല്‍പരാസി വെസ്റ്റില്‍ നിന്ന് 190 മൃതദേഹങ്ങളും നുവാകോട്ടില്‍ നിന്ന് 155 മൃതദേഹങ്ങളുമാണ് കണ്ടെത്തിയത്. ഗോര്‍ഖയില്‍ നിന്ന് 66, ധാദിങ്ങില്‍ നിന്ന് 59, റസുവയില്‍ നിന്ന് 45, തനഹുവില്‍ നിന്ന് 38 മൃതദേഹങ്ങളും ഇതുവരെ കണ്ടെടുത്തു എന്നാണ് അധികൃതര്‍ അറിയിക്കുന്നത്.

1,113 മൃതദേഹങ്ങളുടെ പോസ്റ്റ്‌മോര്‍ട്ടവും നിയമപരമായ തിരിച്ചറിയല്‍ നടപടികളും പൂര്‍ത്തിയാക്കിയതായും പൊലീസ് അറിയിച്ചു. ഇതുവരെ 95 മൃതദേഹങ്ങള്‍ ബന്ധുക്കള്‍ക്ക് കൈമാറിയിട്ടുണ്ട്. തിരിച്ചറിയാന്‍ കഴിയാത്ത 911 മൃതദേഹങ്ങളുടെ വിവരങ്ങള്‍ നേപ്പാള്‍ പൊലീസ് വെബ്‌സൈറ്റില്‍ അപ്ലോഡ് ചെയ്തിട്ടുണ്ട്. കാണാതായ ബന്ധുക്കളെ തിരിച്ചറിയാന്‍ കുടുംബങ്ങളെ സഹായിക്കുകയാണ് ഇതിന്റെ ലക്ഷ്യം. ദുരന്തബാധിത മേഖലകളില്‍ നിന്ന് ഇതുവരെ 6,541 പേരെ സുരക്ഷാസേന രക്ഷപ്പെടുത്തിയിട്ടുണ്ട്. കാണാതായ 4,858 പേര്‍ക്കായുള്ള തിരച്ചില്‍ ഇപ്പോഴും തുടരുകയാണെന്നും അധികൃതര്‍ അറിയിച്ചു.

ദുരന്തത്തില്‍ നിരവധി വിദേശ പൗരന്മാരെയും കാണാതായിട്ടുണ്ട്. നേപ്പാളില്‍ മാത്രം 30ലധികം രാജ്യങ്ങളില്‍ നിന്നുള്ള 583 വിദേശ പൗരന്മാരെ കാണാതായിട്ടുണ്ടെന്നാണ് റിപ്പോര്‍ട്ട്. ചൈനയില്‍ 23 രാജ്യങ്ങളില്‍ നിന്നുള്ള 261 വിദേശ പൗരന്മാരെയും കാണാനില്ലെന്നും റിപ്പോര്‍ട്ട് ഉണ്ട്. നേപ്പാളില്‍ കാണാതായതില്‍ വിദേശ പൗരന്മാരില്‍ ഇന്ത്യക്കാരാണ് ഏറ്റവും വലിയ വിഭാഗങ്ങളിലൊന്ന്. 275 ഇന്ത്യന്‍ പൗരന്മാരെയും ഇന്ത്യന്‍ വംശജരായ 128 പേരെയും കാണാതായതായി ന്യൂഡല്‍ഹി അറിയിച്ചു. 85 അമേരിക്കന്‍ പൗരന്മാരെ കാണാതായതായി യുഎസ് സ്റ്റേറ്റ് ഡിപ്പാര്‍ട്ട്‌മെന്റും ഞായറാഴ്ച അറിയിച്ചു.

നേപ്പാളിലെ ടൂറിസം അധികൃതരില്‍ നിന്നും വിവിധ രാജ്യങ്ങളുടെ എംബസികളില്‍ നിന്നുമുള്ള റിപ്പോര്‍ട്ടുകള്‍ പ്രകാരം 62 യുക്രെയ്ന്‍ പൗരന്മാരെയും 51 മലേഷ്യന്‍ പൗരന്മാരെയും 42 ഓസ്ട്രേലിയന്‍ പൗരന്മാരെയും 33 ബ്രിട്ടീഷ് പൗരന്മാരെയും കാണാതായിട്ടുണ്ട്. അതേസമയം നേപ്പാളില്‍ നിന്ന് ഇന്ത്യയിലേയ്ക്ക് ഒഴുകിയെത്തുന്ന നദികളില്‍ നിന്ന് 17 മൃതദേഹങ്ങള്‍ ഇന്ത്യയിലെ ഉത്തര്‍പ്രദേശ് അധികൃതര്‍ കണ്ടെത്തി. പ്രളയത്തില്‍പ്പെട്ടവരുടെ മൃതദേഹങ്ങളാണെന്നാണ് പ്രാഥമിക നിഗമനം. മൃതദേഹങ്ങള്‍ തിരിച്ചറിയാനുള്ള നടപടികള്‍ ഇന്ത്യന്‍ അധികൃതര്‍ ആരംഭിച്ചിട്ടുണ്ട്. ഇവ നേപ്പാളിലെ ഔദ്യോഗിക മരണസംഖ്യയില്‍ ഉള്‍പ്പെടുത്തിയിട്ടില്ല.