കൊച്ചി: ഓണവിപണിയില്‍ മുന്നേറ്റവുമായി സപ്ലൈകോ. ഈമാസം ഒന്നുമുതല്‍ ഇന്നലെ ഉച്ചവരെയുള്ള കണക്കുകള്‍പ്രകാരം സപ്ലൈകോയുടെ വിറ്റുവരവ് 207 കോടി രൂപ പിന്നിട്ടു. ഇതില്‍ സബ്സിഡി ഇനത്തില്‍ 72 കോടി രൂപയും നോണ്‍സബ്സിഡി ഇനത്തില്‍ 135 കോടി രൂപയുമാണ് ലഭിച്ചത്. 19 ദിവസത്തിനിടെ 26 ലക്ഷത്തോളം ഉപഭോക്താക്കള്‍ സപ്ലൈകോയുടെ വില്പനശാലകളും ഓണം ഫെയറുകളും സന്ദര്‍ശിച്ചു.

ഓണത്തോടനുബന്ധിച്ച് സംസ്ഥാനത്തെ വിവിധ ജില്ലകളില്‍ പ്രത്യേകമായി സംഘടിപ്പിച്ച ഫെയറുകളില്‍നിന്നു മാത്രം ഏകദേശം രണ്ടു കോടിയുടെ വിറ്റുവരവും ലഭിച്ചു. തിരുവനന്തപുരം, കോഴിക്കോട്, എറണാകുളം ജില്ലകളില്‍ നടക്കുന്ന മെഗാ ട്രേഡ് ഫെയറുകളില്‍ ഏറ്റവും കൂടുതല്‍ വിറ്റുവരവ് ഇതുവരെ രേഖപ്പെടുത്തിയത് കോഴിക്കോട് ബീച്ചില്‍ നടക്കുന്ന ഫെയറിലാണ്. ഇവിടെ 32 ലക്ഷത്തിന്റ വിറ്റുവരവാണുണ്ടായത്.

ഈമാസം 13 ന് തിരുവനന്തപുരം പുത്തരിക്കണ്ടം നായനാര്‍ പാര്‍ക്കില്‍ ആരംഭിച്ച മെഗാ ട്രേഡ് ഫെയറില്‍നിന്ന് ഇതുവരെ 30 ലക്ഷം രൂപയുടെ വിറ്റുവരവും ലഭിച്ചു. എഎവൈ വിഭാഗത്തിനു സൗജന്യമായി നല്‍കുന്ന ആറു ലക്ഷം കിറ്റുകളില്‍ 4,32,000 എണ്ണം വിതരണത്തിനായി റേഷന്‍ കടകളില്‍ എത്തിച്ചുകഴിഞ്ഞു. ഇന്ന് മുഴുവന്‍ കിറ്റുകളും റേഷന്‍ കടകളില്‍ ലഭ്യമാകുമെന്നും മാനേജിംഗ് ഡയറക്ടര്‍ പറഞ്ഞു.