വാഷിംഗ്ടൺ: അമേരിക്കയുമായി ഒരു കരാറിലെത്താൻ ടെഹ്‌റാൻ ആഗ്രഹിക്കുന്നുണ്ടെങ്കിലും, താൻ അനിവാര്യമാണെന്ന് കരുതുന്ന തരത്തിലുള്ള വ്യവസ്ഥകൾ അംഗീകരിക്കാൻ ഇറാൻ തയ്യാറല്ലെന്ന്  ഡോണൾഡ് ട്രംപ്. ഇരു രാജ്യങ്ങളും തമ്മിലുള്ള 60 ദിവസത്തെ ചർച്ചാ കാലാവധി അവസാനിച്ചതിന് പിന്നാലെ തിങ്കളാഴ്ച വൈറ്റ് ഹൗസിൽ വെച്ച് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. നിലവിലെ ചർച്ചകളെക്കുറിച്ചുള്ള കൂടുതൽ വിവരങ്ങൾ വെളിപ്പെടുത്താൻ തയ്യാറാകാതിരുന്ന ട്രംപ്, ഇറാൻ ആണവായുധം സ്വന്തമാക്കുന്നത് തടയുക എന്നതാണ് വാഷിംഗ്ടണിന്റെ പ്രഖ്യാപിത ലക്ഷ്യമെന്ന് വീണ്ടും വ്യക്തമാക്കി. ഇറാൻ ഒരിക്കലും ഒരു ആണവായുധം സ്വന്തമാക്കാൻ പോകുന്നില്ലെന്നും അത് വളരെ വ്യക്തമായ കാര്യമാണെന്നും അദ്ദേഹം കൂട്ടിച്ചേർത്തു.

എല്ലാ ഇറാനിയൻ തുറമുഖങ്ങൾക്കും ഏർപ്പെടുത്തിയിട്ടുള്ള കടുത്ത നാവിക ഉപരോധത്തിലൂടെ ഹോർമുസ് കടലിടുക്കിന്റെ പൂർണ്ണ നിയന്ത്രണം ഇപ്പോൾ അമേരിക്കയുടെ കൈകളിലാണെന്ന് ട്രംപ് അവകാശപ്പെട്ടു. കടലിടുക്കിനെ ഒരു അമേരിക്കൻ പ്രദേശമായി പ്രഖ്യാപിക്കുന്നതിനോടാണ് തനിക്ക് താല്പര്യമെന്നും അദ്ദേഹം പറഞ്ഞു. ഇതിന് പുറമെ, ഹോർമുസ് കടലിടുക്ക് തുറക്കാനും ജലപാതയുടെ നിയന്ത്രണം നിലനിർത്താനും ഇറാനുമായി ചേർന്ന് പ്രവർത്തിക്കുന്നുവെന്ന് റിപ്പോർട്ടുകളുള്ള ഒമാനെതിരെയും ട്രംപ് മുന്നറിയിപ്പ് നൽകി. ഒമാന്റെ ഇടപെടലുകൾ ശരിയായ രീതിയിലല്ലെന്നും, എന്നാൽ മറ്റുള്ളവരെ കൈകാര്യം ചെയ്യുന്നതുപോലെ വളരെ എളുപ്പത്തിൽ അമേരിക്ക അവരെയും നേരിടുമെന്നും ട്രംപ് വ്യക്തമാക്കി.

ഇറാന്റെ ആണവപദ്ധതി, ഹോർമുസ് കടലിടുക്ക് എന്നീ വിഷയങ്ങളിൽ അമേരിക്കയും ഇറാനും തങ്ങളുടെ നിലപാടുകളിൽ ഉറച്ചുനിൽക്കുന്നതിനിടെയാണ് 60 ദിവസത്തെ വെടിനിർത്തൽ അവസാനിച്ചിരിക്കുന്നത്. അതേസമയം, വാഷിംഗ്ടണും ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സും (IRGC) തമ്മിൽ രഹസ്യ ചർച്ചകൾ നടക്കുന്നുണ്ടെന്ന ട്രംപിന്റെ അവകാശവാദം ഇറാൻ തള്ളി. ഐ.ആർ.ജി.സി ഉദ്യോഗസ്ഥരും അമേരിക്കൻ പ്രതിനിധികളും തമ്മിൽ യാതൊരു സംഭാഷണവും നടക്കുന്നില്ലെന്നും ട്രംപിന്റേത് വെറും 'മായക്കാഴ്ച' (delusion) മാത്രമാണെന്നും വക്താവ് ഹൊസൈൻ മൊഹെബ്ബി തസ്നിം വാർത്താ ഏജൻസിയോട് പ്രതികരിച്ചു. അമേരിക്ക തുടർച്ചയായി വാഗ്ദാനങ്ങൾ ലംഘിക്കുന്നതിനാൽ ഇറാന്റെ നയതന്ത്ര വിഭാഗം നിലവിൽ വാഷിംഗ്ടണുമായി യാതൊരുവിധ ചർച്ചകളും നടത്തുന്നില്ലെന്നും അദ്ദേഹം കൂട്ടിച്ചേർത്തു.