ന്യൂഡൽഹി: പാർലമെന്റിലെ തുടർച്ചയായ സഭാത്തടസ്സത്തിന് പരിഹാരം കാണാൻ പ്രതിപക്ഷത്തിന് നിർണ്ണായക വാഗ്ദാനവുമായി കേന്ദ്ര ആഭ്യന്തരമന്ത്രി അമിത് ഷാ. പ്രതിപക്ഷത്തിന്റെ ചോദ്യങ്ങൾക്ക് കൃത്യമായ മറുപടി നൽകാൻ താൻ സജ്ജനാണെന്നും 24 മണിക്കൂർ നീളുന്ന ചർച്ചയ്ക്ക് തയ്യാറാണെന്നും അദ്ദേഹം വ്യക്തമാക്കി. സഭാനടപടികൾ സുഗമമായി മുന്നോട്ട് കൊണ്ടുപോകുന്നതിന്റെ ഭാഗമായി ബുധനാഴ്ച ഉച്ചതിരിഞ്ഞ് മൂന്നു മണി മുതൽ വ്യാഴാഴ്ച ഉച്ചയ്ക്ക് മൂന്നു മണി വരെ സഭയിൽ സന്നിഹിതനാകാൻ സന്നദ്ധനാണെന്ന് അമിത് ഷാ അറിയിച്ചു.

​നീറ്റ് പരീക്ഷാ ക്രമക്കേടിൽ പ്രതിഷേധിച്ച വിദ്യാർത്ഥികൾക്ക് നേരെയുണ്ടായ പോലീസ് വെടിവെപ്പ്, അയോധ്യ രാമക്ഷേത്രത്തിലെ സംഭാവന തട്ടിപ്പ് എന്നീ വിഷയങ്ങളിൽ ആഭ്യന്തരമന്ത്രി മറുപടി പറയണമെന്നാവശ്യപ്പെട്ടാണ് പ്രതിപക്ഷം സഭ സ്തംഭിപ്പിച്ചത്. ചർച്ച നടത്തേണ്ട വിഷയങ്ങൾ കത്തു മുഖേന അറിയിക്കാമെന്നും, ഇതിന് തയ്യറാണോ അതോ സഭാ നടപടികൾ തടസ്സപ്പെടുത്തുകയാണോ വേണ്ടതെന്ന് പ്രതിപക്ഷം തന്നെ തീരുമാനിക്കണമെന്നും അദ്ദേഹം പറഞ്ഞു.

​സഭയിലെ തന്റെ അസാന്നിധ്യത്തെക്കുറിച്ചുള്ള പ്രതിപക്ഷ വിമർശനങ്ങളെയും അദ്ദേഹം ശക്തമായി തള്ളി. പാർലമെന്റ് സമ്മേളനം ആരംഭിച്ചതു മുതൽ താൻ അവിടെയുണ്ടെന്നും സഭാനടപടികൾ തടസ്സപ്പെടുമ്പോൾ ചേമ്പറിൽ ഇരുന്നിട്ട് കാര്യങ്ങളില്ലെന്നും അമിത് ഷാ ചൂണ്ടിക്കാട്ടി. വിഷയങ്ങളിൽ ചർച്ചയ്ക്ക് സർക്കാർ മുൻപും തയ്യാറായിരുന്നുവെന്നും എന്നാൽ പ്രതിപക്ഷം ഓടിയൊളിക്കുകയാണെന്നും ആരാണ് വിട്ടുനിൽക്കുന്നതെന്ന് ജനങ്ങൾ വിലയിരുത്തട്ടെയെന്നും അദ്ദേഹം വ്യക്തമാക്കി.