2026 ആഗസ്റ്റ് 1-ന് ശക്തമായ മഴയെ തുടർന്ന് തിരുവല്ല നെടുമ്പുറം പഞ്ചായത്തിലെ ദുരിതാശ്വാസ ക്യാമ്പുകളിലേക്ക് മാറ്റിപ്പാർപ്പിക്കപ്പെട്ട കുടുംബങ്ങൾക്ക് അടിയന്തര സഹായമെത്തിച്ച് വേൾഡ് മലയാളി ഫെഡറേഷൻ (WMF) വീണ്ടും സംഘടനയുടെ സാമൂഹിക പ്രതിബദ്ധത തെളിയിച്ചു. പ്രതിസന്ധിയുടെ ഘട്ടത്തിൽ ദുരിതമനുഭവിക്കുന്നവർക്ക് ആശ്വാസമാകാൻ സംഘടന നടത്തിയ ഇടപെടൽ വ്യാപകമായ അഭിനന്ദനമാണ് നേടുന്നത്.
 

അടിയന്തര സഹായം ആവശ്യപ്പെട്ടതിനെ തുടർന്ന് യാതൊരു കാലതാമസവും കൂടാതെ WMF ഗ്ലോബൽ പ്രസിഡന്റ് ഡോ. ആനി ലിബുവിന്റെ നേതൃത്വത്തിലുള്ള സംഘം ദുരിതാശ്വാസ ക്യാമ്പിലെത്തി. ക്യാമ്പിൽ കഴിയുന്നവർക്കായി കുടിവെള്ളം, നൈറ്റി, ടവ്വൽ, ലുങ്കി ഉൾപ്പെടെ ഏകദേശം 50,000 രൂപയുടെ അവശ്യസാധനങ്ങളാണ് വിതരണം ചെയ്തത്. ദുരിതബാധിതരുടെ അടിയന്തര ആവശ്യങ്ങൾ മനസ്സിലാക്കി സമയോചിതമായി നടത്തിയ ഈ ഇടപെടൽ ക്യാമ്പിലുള്ളവർക്ക് വലിയ ആശ്വാസമായി.

ഈ സഹായ പ്രവർത്തനത്തിന് സാമ്പത്തിക പിന്തുണ നൽകിയ അമേരിക്കയിലെ  റീന മേരി മാത്യുവിനെയും WMF പ്രത്യേകം ആദരിച്ചു. പ്രവാസി മലയാളികളുടെ സാമൂഹിക പ്രതിബദ്ധതയുടെ മികച്ച മാതൃകയാണ് ഈ സഹായമെന്ന് സംഘടനാ പ്രവർത്തകർ അഭിപ്രായപ്പെട്ടു.

"അധികാരത്തിന്റെയോ സംഘടനയുടെയോ അതിരുകൾക്കപ്പുറം, ഒരു മനുഷ്യൻ മറ്റൊരു മനുഷ്യന് കൈത്താങ്ങാകുക എന്നതാണ് യഥാർഥ മാനവികത" എന്ന സന്ദേശമാണ് ഈ പ്രവർത്തനത്തിലൂടെ WMF ഉയർത്തിപ്പിടിച്ചതെന്ന് നേതാക്കൾ പറഞ്ഞു.

ദുരിതമനുഭവിക്കുന്നവരുടെ കണ്ണീരൊപ്പാൻ സമയവും സമ്പത്തും മനസ്സും സമർപ്പിച്ച എല്ലാ സന്നദ്ധപ്രവർത്തകർക്കും സഹായഹസ്തം നീട്ടിയവർക്കും സമൂഹത്തിന്റെ വിവിധ കോണുകളിൽ നിന്ന് അഭിനന്ദനങ്ങൾ ഒഴുകുകയാണ്.

ഈ ദുരിതാശ്വാസ പ്രവർത്തനത്തിന് നേതൃത്വം നൽകിയ WMF ഗ്ലോബൽ പ്രസിഡന്റ് ഡോ. ആനി ലിബുവിനെയും, സാമ്പത്തിക പിന്തുണ നൽകിയ റീന മേരി മാത്യുവിനെയും, പ്രവർത്തനങ്ങൾക്ക് ഏകോപനം നൽകിയ WMF നാഷണൽ ചാരിറ്റി കോ-ഓർഡിനേറ്റർ കബീർ റഹ്മാനെയും നിരവധി പേർ അഭിനന്ദിച്ചു.

പ്രവാസി സംഘടനകൾ ആഘോഷങ്ങളുടെയും സമ്മേളനങ്ങളുടെയും വേദികളിൽ ഒതുങ്ങാതെ, സമൂഹത്തിന് ആവശ്യമായ ഘട്ടങ്ങളിൽ കരുതലിന്റെയും കരുണയുടെയും കരങ്ങളാകാമെന്ന് തെളിയിക്കുന്ന മാതൃകാപരമായ പ്രവർത്തനമായാണ് WMF-ന്റെ ഈ ഇടപെടൽ വിലയിരുത്തപ്പെടുന്നത്.