ദേശീയ പരീക്ഷാ നടത്തിപ്പിൽ ഉണ്ടായ ക്രമക്കേടുകളെ ചൂണ്ടിക്കാണിച്ചും, തത്ഫലമായി ജീവനൊടുക്കേണ്ടിവന്ന കുട്ടികളുടെ സാഹചര്യങ്ങളെ എടുത്തു പറഞ്ഞും, അവകാശങ്ങൾക്കായി സമരം നടത്തുന്ന വിദ്യാർത്ഥികൾക്ക്, നീതി നടപ്പിലാക്കുവാനും, ഭാവി തലമുറയുടെ സ്വപ്നങ്ങൾക്ക് ചിറകു മുളപ്പിക്കുവാനും ആവശ്യപ്പെട്ടുകൊണ്ട്, ഭാരതത്തിലെ കത്തോലിക്കാ മെത്രാൻ സമിതി മുൻപോട്ടു വന്നു. ജൂലൈ 20 ന് ആരംഭിച്ച പ്രകടനങ്ങളിൽ വിദ്യാർത്ഥികളും പോലീസ് ഉദ്യോഗസ്ഥരും ഉൾപ്പെടെ കുറഞ്ഞത് 178 പേർക്കെങ്കിലും പരിക്കേറ്റിട്ടുണ്ട്.

ജൂലൈ 21 ന്, ഭാരതത്തിലെ കത്തോലിക്കാ മെത്രാൻ സമിതി പുറത്തിറക്കിയ ഒരു പ്രസ്താവനയിൽ, സംഘർഷത്തിൽ പരിക്കേറ്റവരോ ഉൾപ്പെട്ടവരോ ആയ വിദ്യാർത്ഥികളോട് ഐക്യദാർഢ്യം പ്രകടിപ്പിച്ചുകൊണ്ട്, തങ്ങളുടെ അഗാധമായ ദുഃഖം പ്രകടിപ്പിച്ചു. സമാധാനപരമായുള്ള പ്രതിഷേധക്കാർക്കെതിരെ ബലപ്രയോഗം നടത്തുന്നത് രാജ്യത്തിന്റെ ജനാധിപത്യ മനോഭാവത്തെ ആഴത്തിൽ ബാധിക്കുന്ന ആക്രമണമാണെന്ന് മെത്രാന്മാർ അപലപിച്ചു.

സുതാര്യവും നീതിയുക്തവും ഉത്തരവാദിത്തമുള്ളതുമായ വിദ്യാഭ്യാസ സമ്പ്രദായത്തിനു മെത്രാൻ സമിതി എന്നും പിന്തുണ നൽകുന്നുവെന്നും സമിതി എടുത്തു പറഞ്ഞു. ദിവസങ്ങളായി നിരാഹാര സമരം നടത്തുന്ന എഞ്ചിനീയറും, അധ്യാപകനും, വിദ്യാർത്ഥി പ്രസ്ഥാനത്തിന്റെ പ്രതീകവുമായ സോനം വാങ്ചുക്കിനോടുള്ള അടുപ്പവും മെത്രാന്മാർ പ്രകടിപ്പിച്ചു.  യഥാർത്ഥ സംഭാഷണത്തിനും എല്ലാ പൗരന്മാരുടെയും മൗലികാവകാശങ്ങൾ സംരക്ഷിക്കുന്നതിനും മെത്രാൻ സമിതി  ആഹ്വാനം ചെയ്തു.

വിദ്യാഭ്യാസ സമ്പ്രദായത്തിന്റെ പ്രശ്നങ്ങൾ പരിഹരിക്കുന്നതിന് സർക്കാർ വ്യക്തമായ പ്രതിബദ്ധത കാണിക്കണമെന്ന് ഇന്ത്യയിലെ വിവിധ സന്യാസ സഭകളുടെ കൂട്ടായ്മയായ സി ആർ ഐ യും ആവശ്യപ്പെട്ടു. പ്രതിഷേധക്കാർക്കെതിരെയുള്ള പോലീസിന്റെ  ക്രൂരതയെക്കുറിച്ചുള്ള ആരോപണങ്ങളിൽ അന്വേഷണം നടത്താനും, കക്ഷികൾ തമ്മിലുള്ള സംഭാഷണ പ്രക്രിയ നടത്താനും അവർ ആവശ്യപ്പെട്ടു. ഒരു ജനാധിപത്യ സമൂഹം എപ്പോഴും സമാധാനപരമായ പ്രതിഷേധത്തിന് അവസരം നൽകുകയും യുവാക്കളുടെ ആശങ്കകൾ ആത്മാർത്ഥമായി കേൾക്കുകയും ചെയ്യണമെന്ന് ഓർത്തഡോക്സ് സഭകളും ആവശ്യപ്പെട്ടു.