ന്യൂഡൽഹി: നീറ്റ് പരീക്ഷാ ക്രമക്കേടുകൾക്കെതിരെ ജന്തർമന്തറിലെ സമരപ്പന്തലിൽ നിരാഹാരം അനുഷ്ഠിക്കവെ ഡൽഹി പോലീസ് ബലം പ്രയോഗിച്ച് ആശുപത്രിയിലേക്ക് മാറ്റിയ പ്രമുഖ പരിസ്ഥിതി പ്രവർത്തകൻ സോനം വാങ്ചുക് ചികിത്സ നിരസിച്ചു. ആശുപത്രി അധികൃതർ നൽകിയ ഭക്ഷണമോ ജീവൻരക്ഷാ മരുന്നുകളോ സ്വീകരിക്കാൻ അദ്ദേഹം തയ്യാറായിട്ടില്ല. ലക്ഷ്യം കാണുന്നതുവരെ നീറ്റ് പ്രക്ഷോഭത്തിൽ നിന്ന് ഒരടി പോലും പിന്നോട്ടില്ലെന്നും സമരം കൂടുതൽ ശക്തമായി മുന്നോട്ട് കൊണ്ടുപോകണമെന്നും സോനം വാങ്ചുക് അണികൾക്ക് സന്ദേശം നൽകി. അദ്ദേഹത്തിന്റെ ഭാര്യ ഗീതാഞ്ജലി അങ്മോയാണ് സോനത്തിന്റെ ഈ ഉറച്ച നിലപാട് മാധ്യമങ്ങളെ അറിയിച്ചത്. തന്നെ എത്രയും വേഗം ആശുപത്രിയിൽ നിന്ന് വിട്ടയക്കണമെന്നും, പാർലമെന്റ് മാർച്ച് അടക്കമുള്ള മുൻനിശ്ചയിച്ച പ്രക്ഷോഭ പരിപാടികളുമായി സമാധാനപരമായി മുന്നോട്ട് പോകണമെന്നും അദ്ദേഹം ആവശ്യപ്പെട്ടിട്ടുണ്ട്.

​കഴിഞ്ഞ ദിവസമാണ് നീറ്റ് പരീക്ഷാ വിവാദത്തിൽ കൃത്യമായ അന്വേഷണവും നടപടിയും ആവശ്യപ്പെട്ട് നിരാഹാരം അനുഷ്ഠിച്ചിരുന്ന സോനം വാങ്ചുക്കിനെ പോലീസ് ബലമായി കസ്റ്റഡിയിലെടുത്ത് ആശുപത്രിയിലേക്ക് മാറ്റിയത്. നിലവിൽ അദ്ദേഹത്തിന്റെ രക്തസമ്മർദ്ദം, പൾസ്, ഓക്സിജൻ നിരക്കുകൾ സാധാരണ നിലയിലാണെങ്കിലും കടുത്ത നിർജലീകരണത്തിന്റെ ലക്ഷണങ്ങൾ പ്രകടിപ്പിക്കുന്നുണ്ടെന്ന് ആശുപത്രി അധികൃതർ വ്യക്തമാക്കി. എയിംസിൽ നിന്നുള്ള വിദഗ്ധ ഡോക്ടർമാരുടെ സംഘമാണ് അദ്ദേഹത്തെ നിരീക്ഷിക്കുന്നത്. എന്നാൽ ശരീരത്തിൽ ലവണാംശം നിലനിർത്താനുള്ള ഐ.വി. ദ്രാവകങ്ങളോ, ഒ.ആർ.എസ്. ലായനിയോ സ്വീകരിക്കാൻ വാങ്ചുക് കൂട്ടാക്കാത്തത് ആരോഗ്യസ്ഥിതി കൂടുതൽ വഷളാക്കുമെന്ന് ഡോക്ടർമാർ മുന്നറിയിപ്പ് നൽകുന്നുണ്ട്.

​അതേസമയം, സോനം വാങ്ചുക്കിനെ ആശുപത്രിയിൽ നിന്ന് മോചിപ്പിക്കുന്നത് വരെ സമരം തുടരാനാണ് പ്രക്ഷോഭകരുടെ തീരുമാനം. ഇതിന്റെ ഭാഗമായി സമരപ്പന്തലിൽ അഭിജിത്ത് ദീപകെ, എസ്.എഫ്.ഐ. ദേശീയ പ്രസിഡന്റ് ആദർശ് എം. സജി എന്നിവർ അനിശ്ചിതകാല നിരാഹാര സമരം ആരംഭിച്ചു. ലക്ഷക്കണക്കിന് വിദ്യാർത്ഥികളുടെ ഭാവി തകർത്ത നീറ്റ് പരീക്ഷാ ക്രമക്കേടിനെതിരെയുള്ള സോനത്തിന്റെ സമരത്തിന് പിന്തുണ പ്രഖ്യാപിച്ച്, വരും ദിവസങ്ങളിൽ ഡൽഹിയിൽ കൂടുതൽ വിദ്യാർത്ഥി-യുവജന സംഘടനകൾ പ്രക്ഷോഭവുമായി രംഗത്തിറങ്ങുമെന്നാണ് സൂചന.