കാലാവസ്ഥാ പ്രവർത്തകനായ സോനം വാങ്‌ചുകിനെ ജന്തർ മന്ദറിലെ സമരപ്പന്തലിൽ നിന്ന് ഡൽഹി പോലീസ് ബലംപ്രയോഗിച്ച് നീക്കം ചെയ്ത സംഭവത്തിൽ കേന്ദ്ര സർക്കാരിനെതിരെ ലോക്‌സഭയിലെ പ്രതിപക്ഷ നേതാവ് രാഹുൽ ഗാന്ധി രംഗത്ത്. അഹിംസാപരമായ സമരത്തെ അടിച്ചമർത്താൻ ശ്രമിക്കുന്നത് തെറ്റാണെന്ന് രാഹുൽ ഗാന്ധി വിമർശിച്ചു. മോദി സർക്കാർ ‘അസത്യത്തിന്റെയും ഹിംസയുടെയും’ പാതയിലാണ് സഞ്ചരിക്കുന്നതെന്നും, യുവാക്കളെയും വിദ്യാർത്ഥികളെയും ബാധിക്കുന്ന ഗുരുതരമായ പ്രശ്നങ്ങൾ ഉന്നയിക്കുന്നവരുടെ ശബ്ദം അടിച്ചമർത്താനാണ് സർക്കാർ ശ്രമിക്കുന്നതെന്നും അദ്ദേഹം ആരോപിച്ചു.

നീറ്റ് പരീക്ഷാ ക്രമക്കേടുകൾ, വിദ്യാഭ്യാസ മേഖലയിലെ വർധിച്ചുവരുന്ന ചിലവുകൾ, വിദ്യാർത്ഥികളുടെ ആത്മഹത്യകൾ തുടങ്ങിയ വിഷയങ്ങൾ ഇന്ത്യയുടെ ഭാവി നിർണ്ണയിക്കുന്നവയാണെന്ന് രാഹുൽ ഗാന്ധി ചൂണ്ടിക്കാട്ടി. ഇത്തരം വിഷയങ്ങൾ ഉന്നയിക്കുന്നതിൽ നിന്ന് തന്നെയും കോൺഗ്രസിനെയും പിന്തിരിപ്പിക്കാൻ ഒരു ശക്തിക്കും കഴിയില്ലെന്ന് അദ്ദേഹം എക്‌സിൽ പങ്കുവെച്ച കുറിപ്പിൽ വ്യക്തമാക്കി.

നീറ്റ് ചോദ്യപേപ്പർ ചോർച്ചയ്ക്കും അതുമായി ബന്ധപ്പെട്ട വിദ്യാർത്ഥികളുടെ മരണങ്ങൾക്കുമെതിരെ കോക്രോച്ച് ജനതാ പാർട്ടി സംഘടിപ്പിച്ച പ്രതിഷേധത്തിന് പിന്തുണ പ്രഖ്യാപിച്ചാണ് സോനം വാങ്‌ചുക്ക് ജൂൺ 28 മുതൽ അനിശ്ചിതകാല നിരാഹാര സമരം ആരംഭിച്ചത്. എന്നാൽ, വിദഗ്ധ വൈദ്യോപദേശവും ഡൽഹി ഹൈക്കോടതിയുടെ നിർദ്ദേശങ്ങളും ചൂണ്ടിക്കാട്ടി ജൂലൈ 18 ന് പുലർച്ചെ പോലീസ് അദ്ദേഹത്തെ സമരപ്പന്തലിൽ നിന്ന് മാറ്റുകയും സഫ്ദർജംഗ് ആശുപത്രിയിൽ പ്രവേശിപ്പിക്കുകയും ചെയ്തു.

അതേസമയം, വാങ്‌ചുക്കിന്റെ ആരോഗ്യസ്ഥിതി സംബന്ധിച്ച് ആശങ്കകൾ ഉയരുന്നുണ്ട്. അദ്ദേഹത്തിന് മതിയായ ചികിത്സ ലഭിക്കുന്നില്ലെന്നും ആശുപത്രി അധികൃതർ റിപ്പോർട്ടുകൾ നൽകുന്നില്ലെന്നും ആരോപിച്ച് അദ്ദേഹത്തിന്റെ ഭാര്യ ഉൾപ്പെടെയുള്ളവർ രംഗത്തെത്തിയിട്ടുണ്ട്. എന്തൊക്കെ സംഭവിച്ചാലും ജൂലൈ 20-ന് പാർലമെന്റിലേക്കുള്ള ആസൂത്രണം ചെയ്ത മാർച്ച് മുന്നോട്ട് കൊണ്ടുപോകുമെന്ന്  സംഘാടകർ അറിയിച്ചു.