ന്യൂഡൽഹി: ഇന്ത്യയിൽ താമസിക്കുന്ന വിദേശ ഇന്ത്യൻ വംശജരുടെ ഓവർസീസ് സിറ്റിസൺ ഓഫ് ഇന്ത്യ (ഒ.സി.ഐ.) കാർഡ് അപേക്ഷാ നടപടികൾ കേന്ദ്ര സർക്കാർ കൂടുതൽ ലളിതമാക്കി. ബ്യൂറോ ഓഫ് ഇമിഗ്രേഷൻ പുറത്തിറക്കിയ പുതിയ മാർഗനിർദേശപ്രകാരം ഇനി ഒ.സി.ഐ. അപേക്ഷ സമർപ്പിക്കുമ്പോൾ രജിസ്ട്രേഷൻ സർട്ടിഫിക്കറ്റോ റെസിഡൻസ് പെർമിറ്റോ സമർപ്പിക്കേണ്ടതില്ല.
 

പുതിയ ചട്ടമനുസരിച്ച്, ഇന്ത്യയിൽ നിന്ന് ഒ.സി.ഐ. കാർഡിന് അപേക്ഷിക്കുന്നവർക്ക് അപേക്ഷ സമർപ്പിക്കുന്ന തീയതിയിൽ കുറഞ്ഞത് മൂന്ന് മാസത്തെ കാലാവധിയെങ്കിലും ശേഷിക്കുന്ന ദീർഘകാല വിസ ഉണ്ടായിരിക്കണം. പ്രത്യേക ഇ-3 വിസ ഒഴികെയുള്ള ദീർഘകാല വിസകളാണ് ഇതിനായി അംഗീകരിക്കുക.

അപേക്ഷയോടൊപ്പം കുറഞ്ഞത് ആറുമാസത്തെ കാലാവധിയുള്ള സാധുവായ പാസ്‌പോർട്ട്, അപേക്ഷ സമർപ്പിക്കുന്ന തീയതിയിൽ മൂന്ന് മാസമെങ്കിലും കാലാവധിയുള്ള സാധുവായ വിസ, ഇന്ത്യൻ വംശപരമ്പര തെളിയിക്കുന്ന രണ്ട് രേഖകൾ, നിലവിലെ വിലാസം തെളിയിക്കുന്ന രേഖ എന്നിവ നിർബന്ധമായും സമർപ്പിക്കണം.

അപേക്ഷ സമർപ്പിച്ച തീയതിയായി ബന്ധപ്പെട്ട വിദേശികളുടെ പ്രാദേശിക രജിസ്ട്രേഷൻ ഓഫീസിൽ അപേക്ഷ നേരിട്ട് സമർപ്പിക്കുന്ന ദിവസമാണ് പരിഗണിക്കുകയെന്ന് ബ്യൂറോ ഓഫ് ഇമിഗ്രേഷൻ വ്യക്തമാക്കി.

ഒ.സി.ഐ. സേവന പോർട്ടലിൽ രജിസ്റ്റർ ചെയ്ത ശേഷമാണ് അപേക്ഷാ നടപടികൾ ആരംഭിക്കുക. തുടർന്ന് ഓൺലൈൻ രജിസ്ട്രേഷൻ വഴി അനുയോജ്യമായ വിഭാഗം തിരഞ്ഞെടുത്ത് അപേക്ഷ പൂരിപ്പിക്കണം. അപേക്ഷകന്റെ ഫോട്ടോ, ഒപ്പ്, ആവശ്യമായ രേഖകൾ എന്നിവ ഓൺലൈനായി അപ്‌ലോഡ് ചെയ്യേണ്ടതുമുണ്ട്.

അപേക്ഷ സമർപ്പിച്ചതിന് ശേഷം ലഭിക്കുന്ന റഫറൻസ് നമ്പർ ഉപയോഗിച്ച് ബന്ധപ്പെട്ട വിദേശികളുടെ പ്രാദേശിക രജിസ്ട്രേഷൻ ഓഫീസിൽ അപ്പോയിന്റ്മെന്റ് എടുക്കണം. നിശ്ചയിച്ച തീയതിയിൽ അപേക്ഷകൻ എല്ലാ അസൽ രേഖകളുമായി നേരിട്ട് ഹാജരായി പരിശോധന പൂർത്തിയാക്കണം.

രേഖകൾ വിജയകരമായി പരിശോധിച്ച ശേഷം ഫീസ് അടയ്ക്കുന്നതിനുള്ള ഓൺലൈൻ ലിങ്ക് ലഭിക്കും. ഫീസ് അടച്ചുകഴിഞ്ഞാൽ അപേക്ഷ ഔദ്യോഗികമായി സ്വീകരിച്ചതായി കണക്കാക്കും. അപേക്ഷ പരിശോധിച്ച് അംഗീകരിച്ചാൽ ഒ.സി.ഐ. കാർഡിന്റെ ഇലക്ട്രോണിക് പതിപ്പ് പോർട്ടലിൽ നിന്ന് ഡൗൺലോഡ് ചെയ്യാനാകും.

പുതിയ സംവിധാനത്തിൽ ഇനി ഒ.സി.ഐ.യുടെ ഭൗതിക ബുക്ക്ലെറ്റ് നൽകില്ലെന്നും ഡിജിറ്റൽ ഒ.സി.ഐ. കാർഡ് മാത്രമായിരിക്കും ലഭ്യമാക്കുകയെന്നും ബ്യൂറോ ഓഫ് ഇമിഗ്രേഷൻ അറിയിച്ചു.