വാഷിങ്ടൺ: അമേരിക്കയിൽ പഠിക്കുന്ന വിദേശ വിദ്യാർഥികൾക്കും വിദ്യാഭ്യാസ വിനിമയ പദ്ധതികളിലെ അംഗങ്ങൾക്കും വിദേശ മാധ്യമപ്രവർത്തകർക്കും ബാധകമായ വിസാ ചട്ടങ്ങളിൽ ട്രംപ് ഭരണകൂടം സമൂല മാറ്റം പ്രഖ്യാപിച്ചു. ഇതോടെ ഇതുവരെ നിലവിലുണ്ടായിരുന്ന അനിശ്ചിതകാല താമസത്തിന് അനുവദിച്ചിരുന്ന സംവിധാനം അവസാനിപ്പിച്ച് നിശ്ചിത കാലാവധിയുള്ള പ്രവേശനരീതിയിലേക്ക് അമേരിക്ക മാറും.
 അമേരിക്കൻ ആഭ്യന്തര സുരക്ഷാ വകുപ്പാണ് പുതിയ ചട്ടം പ്രഖ്യാപിച്ചത്. വിദ്യാർഥികളും വിദ്യാഭ്യാസ വിനിമയ പദ്ധതികളിൽ പങ്കെടുക്കുന്നവരും മാധ്യമപ്രവർത്തകരും വിസയുടെ വ്യവസ്ഥകൾ പാലിക്കുന്നിടത്തോളം കാലം അമേരിക്കയിൽ തുടരാൻ അനുവദിച്ചിരുന്ന പഴയ സംവിധാനം (Duration of Status) അവസാനിപ്പിക്കുകയാണെന്ന് വകുപ്പ് അറിയിച്ചു. പുതിയ ചട്ടം ഫെഡറൽ രജിസ്റ്ററിൽ പ്രസിദ്ധീകരിച്ച് അറുപത് ദിവസം പൂർത്തിയാകുന്നതോടെ പ്രാബല്യത്തിൽ വരും.

പുതിയ വ്യവസ്ഥ പ്രകാരം വിദ്യാർഥികൾക്കും വിദ്യാഭ്യാസ വിനിമയ പദ്ധതിയിലെ അംഗങ്ങൾക്കും അവരുടെ പഠനപരിപാടിയുടെ ദൈർഘ്യത്തിനനുസരിച്ചായിരിക്കും താമസാനുമതി ലഭിക്കുക. എന്നാൽ ഒരേസമയം പരമാവധി നാല് വർഷം വരെ മാത്രമേ അനുവദിക്കൂ. അതിൽ കൂടുതൽ സമയം ആവശ്യമായാൽ ഔദ്യോഗികമായി താമസകാലാവധി നീട്ടാൻ പ്രത്യേക അപേക്ഷ നൽകണം.

ഇംഗ്ലീഷ് ഭാഷാ പരിശീലന കോഴ്സുകളിൽ പഠിക്കുന്ന വിദേശ വിദ്യാർഥികൾക്ക് പരമാവധി രണ്ട് വർഷം മാത്രമേ അമേരിക്കയിൽ തുടരാനാകൂ. പഠനം പൂർത്തിയാക്കിയ ശേഷം രാജ്യം വിടാൻ അനുവദിച്ചിരുന്ന അറുപത് ദിവസത്തെ സാവകാശകാലാവധി ഇനി മുപ്പത് ദിവസമായി കുറച്ചു.

ബിരുദ വിദ്യാർഥികൾക്ക് ആദ്യ അധ്യയന വർഷത്തിൽ പഠനവിഷയം മാറ്റാനോ മറ്റൊരു വിദ്യാഭ്യാസ സ്ഥാപനത്തിലേക്ക് മാറാനോ സാധിക്കില്ല. ബിരുദാനന്തര വിദ്യാർഥികൾക്ക് പഠനലക്ഷ്യം മാറ്റുന്നതിനും നിയന്ത്രണമുണ്ട്. ഒരു ബിരുദം പൂർത്തിയാക്കിയവർ അതേ നിലവാരത്തിലോ അതിൽ താഴെയോ മറ്റൊരു പഠനപരിപാടി ആരംഭിക്കുന്നതിനും വിലക്കേർപ്പെടുത്തി.

വിദേശ മാധ്യമപ്രവർത്തകർക്ക് അവരുടെ ഔദ്യോഗിക ദൗത്യം പൂർത്തിയാക്കാൻ ആവശ്യമായ കാലയളവിലേക്കായിരിക്കും ഇനി പ്രവേശനാനുമതി നൽകുക. എന്നാൽ പരമാവധി ഇരുന്നൂറ്റിനാൽപ്പത് ദിവസമാണ് അനുവദിക്കുക. അതിലധികം തുടരണമെങ്കിൽ പ്രത്യേക അപേക്ഷ സമർപ്പിക്കണം. ചൈനീസ് പാസ്‌പോർട്ട് കൈവശമുള്ള മാധ്യമപ്രവർത്തകർക്ക് തൊണ്ണൂറ് ദിവസത്തെ പ്രവേശനപരിധിയാണ് നിശ്ചയിച്ചിരിക്കുന്നത്.

വിദേശ മാധ്യമസ്ഥാപനമെന്ന നിലയിൽ അംഗീകാരം ലഭിക്കാൻ സ്ഥിരമായി വാർത്താ ഉള്ളടക്കം തയ്യാറാക്കുന്ന സ്ഥാപനമായിരിക്കണമെന്നും വിദേശരാജ്യത്ത് പ്രധാന ഓഫീസ് ഉണ്ടായിരിക്കണമെന്ന വ്യവസ്ഥയും പുതിയ ചട്ടത്തിൽ ഉൾപ്പെടുത്തിയിട്ടുണ്ട്.

ഇതുവരെ വിദ്യാഭ്യാസ സ്ഥാപനങ്ങളോ പരിപാടിയുടെ സ്പോൺസർമാരോ മുഖേന ലളിതമായി പുതുക്കിയിരുന്ന താമസാനുമതി ഇനി ഔദ്യോഗിക അപേക്ഷയിലൂടെയായിരിക്കും ലഭിക്കുക. അപേക്ഷകരിൽ നിന്ന് ബയോമെട്രിക് വിവരങ്ങളും നേരിട്ടുള്ള അഭിമുഖവും ആവശ്യപ്പെടാൻ സർക്കാരിന് അധികാരമുണ്ടാകും.

അപേക്ഷ പരിഗണനയിലിരിക്കുമ്പോൾ അർഹരായ വിദ്യാർഥികൾക്കും മാധ്യമപ്രവർത്തകർക്കും പരമാവധി ഇരുന്നൂറ്റിനാൽപ്പത് ദിവസം വരെ തൊഴിൽ അനുമതി തുടരുമെന്ന് ആഭ്യന്തര സുരക്ഷാ വകുപ്പ് അറിയിച്ചു.

നിലവിൽ പഴയ സംവിധാനപ്രകാരം അമേരിക്കയിൽ കഴിയുന്നവർക്ക് അവരുടെ ഇപ്പോഴത്തെ പഠനപരിപാടി അവസാനിക്കുന്നതുവരെ സാധാരണയായി തുടരാൻ അനുമതിയുണ്ടാകും. എന്നാൽ പുതിയ ചട്ടം പ്രാബല്യത്തിൽ വന്നശേഷം അമേരിക്കയ്ക്ക് പുറത്തുപോയി വീണ്ടും പ്രവേശിക്കുന്നവർക്ക് പുതിയ നിശ്ചിതകാല പ്രവേശനരീതിയായിരിക്കും ബാധകമാകുക.

വിദ്യാർഥി വിസയുടെ ദുരുപയോഗം തടയുകയും സർക്കാർ മേൽനോട്ടം കൂടുതൽ ശക്തമാക്കുകയും ചെയ്യുന്നതിനാണ് ഈ മാറ്റങ്ങളെന്നാണ് ആഭ്യന്തര സുരക്ഷാ വകുപ്പിന്റെ വിശദീകരണം. എന്നാൽ വിദേശ വിദ്യാർഥികളുടെ വരവ് കുറയാനും അമേരിക്കൻ സർവകലാശാലകളുടെയും സമ്പദ്‌വ്യവസ്ഥയുടെയും വളർച്ചയെ ഇത് പ്രതികൂലമായി ബാധിക്കാനുമിടയുണ്ടെന്ന് വിദ്യാഭ്യാസ രംഗത്തെ വിദഗ്ധർ ആശങ്ക പ്രകടിപ്പിക്കുന്നു.