വാഷിങ്ടൺ: അമേരിക്കൻ ബാങ്കിംഗ് മേഖലയിലെ ഫെഡറൽ നിയന്ത്രണങ്ങൾ ലഘൂകരിക്കാനുള്ള നയത്തെ ട്രംപ് ഭരണകൂടം ശക്തമായി ന്യായീകരിച്ചപ്പോൾ, ഉപഭോക്തൃ സംരക്ഷണം ദുർബലമാക്കുന്ന നടപടികളാണിതെന്ന് ഡെമോക്രാറ്റിക് പാർട്ടി നേതാക്കൾ കുറ്റപ്പെടുത്തി. സെനറ്റ് ബാങ്കിംഗ് കമ്മിറ്റിയിൽ നടന്ന ചൂടേറിയ ഹിയറിങ്ങിനിടെയായിരുന്നു ഇരുപക്ഷവും നേർക്കുനേർ ഏറ്റുമുട്ടിയത്.
 

ഉപഭോക്തൃ സാമ്പത്തിക സംരക്ഷണ ബ്യൂറോയുടെ (Consumer Financial Protection Bureau – CFPB) അർധവാർഷിക റിപ്പോർട്ട് അവതരിപ്പിച്ച ആക്ടിങ് ഡയറക്ടർ റസ്സൽ വോട്ട്, മുൻ ഭരണകൂടങ്ങളുടെ കാലത്ത് ഏജൻസി നിയമപരമായ അധികാരപരിധിക്കപ്പുറം പ്രവർത്തിച്ചിരുന്നുവെന്നും ഇപ്പോൾ നിയമം അനുവദിക്കുന്ന പരിധിക്കുള്ളിൽ മാത്രമാണ് പ്രവർത്തിക്കുന്നതെന്നും പറഞ്ഞു.

അമിതമായ നിയന്ത്രണങ്ങൾ കാരണം ഉപഭോക്താക്കൾക്ക് ഉയർന്ന വിലയും വായ്പാ ചെലവും നേരിടേണ്ടിവന്നതായും സാമ്പത്തിക ഉൽപ്പന്നങ്ങളുടെ ലഭ്യത കുറയുകയും നികുതിപ്പണം ദുരുപയോഗം ചെയ്യപ്പെടുകയും ചെയ്തുവെന്നും വോട്ട് ആരോപിച്ചു. നിയമം വ്യക്തമായി അനുവദിച്ച മേഖലകളിൽ മാത്രമേ ഇനി മേൽനോട്ടവും നിയമനടപടികളും ഉണ്ടാകൂവെന്നും അദ്ദേഹം വ്യക്തമാക്കി.

സിഎഫ്പിബിയെ ഭാവിയിൽ കോൺഗ്രസിന്റെ ധനവിനിയോഗ നിയന്ത്രണത്തിന് കീഴിൽ കൊണ്ടുവരണമെന്നും അതുവഴി ഏജൻസിയുടെ പ്രവർത്തനങ്ങൾക്ക് കൂടുതൽ ഉത്തരവാദിത്തവും സുതാര്യതയും ഉറപ്പാക്കാനാകുമെന്നും വോട്ട് അഭിപ്രായപ്പെട്ടു.

സെനറ്റ് ബാങ്കിംഗ് കമ്മിറ്റി ചെയർമാൻ ടിം സ്കോട്ട് ഭരണകൂടത്തിന്റെ നിലപാടിനെ പിന്തുണച്ചു. കടുത്ത നിയന്ത്രണങ്ങൾ കുറഞ്ഞ വരുമാനക്കാരുൾപ്പെടെയുള്ള അമേരിക്കക്കാർക്ക് വായ്പ ലഭ്യമാകുന്നത് ബുദ്ധിമുട്ടാക്കിയെന്നും വ്യക്തവും സ്ഥിരതയുള്ളതുമായ നിയമങ്ങൾ മത്സരവും ഉപഭോക്തൃ സംരക്ഷണവും ഒരുപോലെ ഉറപ്പാക്കുമെന്നും അദ്ദേഹം പറഞ്ഞു.

എന്നാൽ ഡെമോക്രാറ്റിക് അംഗങ്ങൾ ഈ വാദങ്ങൾ ശക്തമായി തള്ളി. കമ്മിറ്റി റാങ്കിങ് അംഗമായ സെനറ്റർ എലിസബത്ത് വാറൻ, വോട്ട് ചുമതലയേറ്റതിന് ശേഷം ഉപഭോക്താക്കളെ വഞ്ചിച്ചെന്നാരോപിക്കപ്പെട്ട വൻകിട കമ്പനികൾക്കെതിരായ 40-ലേറെ നിയമനടപടികൾ സിഎഫ്പിബി പിൻവലിച്ചുവെന്ന് ആരോപിച്ചു. ഇതിലൂടെ ഉപഭോക്താക്കൾക്ക് ലഭിക്കേണ്ടിയിരുന്ന ബില്യൺ കണക്കിന് ഡോളറിന്റെ നഷ്ടപരിഹാരം നഷ്ടമായെന്നും അവർ പറഞ്ഞു.

ഹിയറിങ്ങിനിടെ ബാങ്കുകൾ, ക്രെഡിറ്റ് യൂണിയനുകൾ, വിദ്യാർഥി വായ്പാ സേവനദാതാക്കൾ, മെഡിക്കൽ കടബാധ്യതകൾ, സൈനികർക്കുള്ള വായ്പാ പദ്ധതികൾ, ഉപഭോക്തൃ പരാതിനിവാരണ സംവിധാനം തുടങ്ങിയ വിഷയങ്ങളിലും ഡെമോക്രാറ്റിക് അംഗങ്ങൾ വോട്ടിനോട് വിശദീകരണം തേടി. നിയന്ത്രണങ്ങൾ ദുർബലമാക്കുന്നത് സാമ്പത്തിക സ്ഥാപനങ്ങൾക്കെതിരായ ഉപഭോക്താക്കളുടെ നിയമപരമായ സംരക്ഷണം കുറയ്ക്കുമെന്നും അവർ മുന്നറിയിപ്പ് നൽകി.

2008-ലെ ആഗോള സാമ്പത്തിക പ്രതിസന്ധിയെ തുടർന്ന് കൊണ്ടുവന്ന 2010-ലെ ഡോഡ്-ഫ്രാങ്ക് നിയമത്തിന്റെ ഭാഗമായി രൂപവത്കരിച്ച സിഎഫ്പിബി, അമേരിക്കയിലെ പ്രധാന ഉപഭോക്തൃ സാമ്പത്തിക സംരക്ഷണ ഏജൻസിയാണ്. 2011 മുതൽ ബാങ്കുകൾ, ഭവനവായ്പാ സ്ഥാപനങ്ങൾ, ക്രെഡിറ്റ് റിപ്പോർട്ടിങ് ഏജൻസികൾ തുടങ്ങിയവർക്കെതിരായ നടപടികളിലൂടെ ഉപഭോക്താക്കൾക്ക് ബില്യൺ കണക്കിന് ഡോളറിന്റെ നഷ്ടപരിഹാരം ലഭ്യമാക്കുന്നതിൽ ഈ സ്ഥാപനം നിർണായക പങ്കുവഹിച്ചിട്ടുണ്ട്.