സർക്കാർ സൗജന്യങ്ങളെ ആശ്രയിക്കുന്ന കുടിയേറ്റക്കാരെ തടയാൻ ചട്ടങ്ങൾ ഭേദഗതി ചെയ്‌തു  

യുഎസ് നൽകുന്ന സൗജന്യങ്ങൾ കുടിയേറ്റക്കാർക്കു ലഭ്യമാകുന്നത് പരിമിതപ്പെടുത്താൻ ചട്ടങ്ങൾ ഭേദഗതി ചെയ്തതായി യുഎസ് സി ഐ എസ് അറിയിച്ചു. വിസയ്‌ക്കോ സ്ഥിര താമസത്തിനോ അപേക്ഷിക്കുന്നവർ സർക്കാർ സഹായത്തെ ആശ്രയിച്ചാണോ കഴിയുക എന്നു വിലയിരുത്തി തീരുമാനം എടുക്കാൻ ഇനി ഇമിഗ്രെഷൻ ഉദ്യോഗസ്ഥർക്കു കൂടുതൽ വിശാലമായ വിവേചനാധികാരം ഉണ്ടാവും. 

ബൈഡൻ ഭരണകൂടം 2022ൽ കൊണ്ടുവന്ന പബ്ലിക് ചാർജ് ചട്ടം ഇതോടെ അസാധുവായി.

കുടിയേറ്റക്കാരൻ യുഎസ് സർക്കാരിനു ബാധ്യതയാവും എന്നു ബോധ്യപ്പെട്ടാൽ അപേക്ഷ നിരസിക്കാൻ ഇമിഗ്രെഷൻ ആൻഡ് നാഷണാലിറ്റി ആക്ടിൽ വ്യവസ്ഥയുണ്ട്.

കുടിയേറ്റക്കാർക്കു സ്വയം പര്യാപ്തത ഉണ്ടായിരിക്കണം എന്നാണ് യുഎസ് കോൺഗ്രസിന്റെ ഉദ്ദേശമെന്നു യുഎസ് സി ഐ എസ് ചൂണ്ടിക്കാട്ടി. നികുതി കൊടുക്കുന്നവരുടെ പണം അതിനായി ഉപയോഗിക്കേണ്ടി വരാൻ പാടില്ല.

അമേരിക്കക്കാരുടെ സുരക്ഷയും സാമ്പത്തിക ഭദ്രതയും കാത്തു സൂക്ഷിക്കാൻ യുഎസ് സി ഐ എസ് പ്രതിജ്ഞാ ബദ്ധമാണെന്നു വക്താവ് സാക്ക് കഹ്ലാർ പറഞ്ഞു.

പുതിയ ചട്ടങ്ങൾ സെപ്റ്റംബർ 18നു നിലവിൽ വരും. പുതുക്കിയ ഫോം 1-485 ലഭ്യമാവുകയും ചെയ്യും.

ഐ-485 പുതുയ ഫോം ഉപയോഗിക്കണം

യുഎസിൽ 2026 സെപ്റ്റംബർ 18-നോ അതിനുശേഷമോ സ്ഥിരതാമസത്തിനായി (Adjustment of Status) അപേക്ഷ സമർപ്പിക്കാൻ ഉദ്ദേശിക്കുന്നവർ പുതിയ Form I-485 മാത്രമേ ഉപയോഗിക്കാവൂ.
അതോടൊപ്പം, കുടിയേറ്റ അപേക്ഷകളിൽ സാമ്പത്തിക സ്വയംപര്യാപ്തത (Financial Self-Sufficiency) തെളിയിക്കുന്നതിന് മുമ്പത്തേതിനേക്കാൾ കൂടുതൽ പ്രാധാന്യം നൽകപ്പെടും. അതിനാൽ Affidavit of Support, വരുമാനം, സ്വത്ത്, തൊഴിൽ, വിദ്യാഭ്യാസം, മറ്റ് സാമ്പത്തിക സാഹചര്യങ്ങൾ എന്നിവ തെളിയിക്കുന്ന രേഖകൾ സമഗ്രമായി സമർപ്പിക്കാൻ അപേക്ഷകർ ശ്രദ്ധിക്കണം.

കുടിയേറ്റ അപേക്ഷ സമർപ്പിക്കാൻ ആലോചിക്കുന്നവരും നിലവിൽ അപേക്ഷകൾ തീർപ്പാകാൻ കാത്തിരിക്കുന്നവരും ഈ പുതിയ നയമാറ്റങ്ങൾ ശ്രദ്ധാപൂർവം പിന്തുടരുകയും ആവശ്യമായാൽ  വിദഗ്ധരുടെ ഉപദേശം തേടുകയും ചെയ്യുന്നത് ഉചിതമായിരിക്കും.

യുഎസ് സർക്കാർ ആനുകൂല്യങ്ങളെ ആശ്രയിച്ചു ജീവിക്കാൻ കുടിയേറ്റക്കാർക്ക് സൗകര്യം നൽകിയിരുന്ന ബൈഡൻ ഭരണകൂടത്തിന്റെ കാലത്തുളള ചട്ടങ്ങൾ റദ്ദാക്കിക്കൊണ്ടുള്ള അന്തിമ ചട്ടം പുറത്തിറക്കി. ഇതോടെ, കുടിയേറ്റ നിയമത്തിൽ കോൺഗ്രസ് ഉദ്ദേശിച്ചിരുന്ന രീതിയിൽ അപേക്ഷകരുടെ സാമ്പത്തിക സ്വയംപര്യാപ്തത കൂടുതൽ വിപുലമായി വിലയിരുത്തുന്നതിനുള്ള അധികാരം യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസിന് (USCIS) വീണ്ടും ലഭിക്കും.

പുതിയ ചട്ടം 2026 സെപ്റ്റംബർ 18 മുതൽ പ്രാബല്യത്തിൽ വരുമ്പോൾ Form I-485 പുതുക്കിയ പതിപ്പ് പുറത്തിറക്കും. 2026 സെപ്റ്റംബർ 18-നോ അതിനു ശേഷമോ തപാൽ മുഖേനയോ ഓൺലൈനായോ സമർപ്പിക്കുന്ന അപേക്ഷകൾ പുതിയ ഫോം ഉപയോഗിച്ചായിരിക്കണം. പഴയ പതിപ്പിലുള്ള I-485 അപേക്ഷകൾ യുഎസ് സി ഐ എസ് സ്വീകരിക്കില്ല.

$100,000 വരെ ബോണ്ട് പരിഗണനയിൽ
ഇതിനൊപ്പം, ട്രംപ് ഭരണകൂടം മറ്റൊരു നിർണായക നിർദ്ദേശവും പരിഗണിച്ചുവരികയാണ്. പൊതുഭാരമാകാനുള്ള ആശങ്കകൾ തൃപ്തികരമായി മറികടക്കാൻ കഴിയാത്ത ചില കുടിയേറ്റ വിസ അപേക്ഷകരിൽ നിന്ന് $100,000 വരെ ബോണ്ട് ഈടാക്കുന്ന സംവിധാനം ഭരണകൂടം ആലോചിക്കുന്നതായി റിപ്പോർട്ടുകളുണ്ട്.

ഈ നിർദ്ദേശം നടപ്പായാൽ, സാമ്പത്തികമായി സ്വയംപര്യാപ്തരാണെന്ന് മതിയായ രീതിയിൽ തെളിയിക്കാൻ കഴിയാത്ത ചില അപേക്ഷകർക്ക് അമേരിക്കയിൽ പ്രവേശിക്കുന്നതിന് മുൻപ് ഈ ബോണ്ട് സമർപ്പിക്കേണ്ടി വരാം. പിന്നീട് നിയമത്തിൽ നിശ്ചയിക്കുന്ന വ്യവസ്ഥകൾ പാലിക്കുകയും പൊതുസഹായങ്ങളെ ആശ്രയിക്കാതിരിക്കുകയും ചെയ്താൽ, ആ ബോണ്ട് തിരികെ ലഭിക്കാനുള്ള സാധ്യതയും ഉണ്ടായേക്കും.