ബ്രിസ്‌ബെയ്ന്‍: ഓസ്ട്രേലിയയിലെ ക്വീന്‍സ്ലന്‍ഡില്‍ ഉണ്ടായ വാഹനാപകടത്തില്‍ മലയാളി വിദ്യാര്‍ഥി മരിച്ചു. ക്വീന്‍സ്ലന്‍ഡില്‍ താമസിക്കുന്ന ജോ സാനി - ട്രീസ സിജോ ദമ്പതികളുടെ മകന്‍ ജൈഡന്‍ ജോ സാനി (17) ആണ് മരിച്ചത്. ക്വീന്‍സ്ലന്‍ഡിലെ ലാസീ ക്രീക്കില്‍ ജൂലൈ 12-ന് ഉച്ചയ്ക്ക് 12.15-ഓടെയായിരുന്നു മലയാളി സമൂഹത്തെ നോവrenown അപകടം സംഭവിച്ചത്.

​ജൈഡന്‍ സഞ്ചരിച്ചിരുന്ന ഇലക്ട്രിക് ബൈക്ക് എതിര്‍ദിശയില്‍ വന്ന കാറുമായി കൂട്ടിയിടിക്കുകയായിരുന്നു. അപകടത്തില്‍ ഗുരുതരമായി പരുക്കേറ്റ ജൈഡനെ ഉടന്‍ തന്നെ എയര്‍ ആംബുലന്‍സ് മാര്‍ഗ്ഗം റോയല്‍ ബ്രിസ്‌ബെയ്ന്‍ ആന്‍ഡ് വിമന്‍സ് ആശുപത്രിയില്‍ എത്തിച്ചെങ്കിലും തീവ്രപരിചരണ വിഭാഗത്തില്‍ ചികിത്സയിലിരിക്കെ മരണത്തിന് കീഴടങ്ങുകയായിരുന്നു.

​അപകടത്തില്‍ കാര്‍ ഓടിച്ചിരുന്ന 55 വയസുകാരനായ ഓസ്‌ട്രേലിയന്‍ സ്വദേശി പരുക്കുകളില്ലാതെ രക്ഷപ്പെട്ടു. സംഭവത്തെക്കുറിച്ച് ക്വീന്‍സ്ലന്‍ഡ് പൊലീസ് വിശദമായ അന്വേഷണം ആരംഭിച്ചിട്ടുണ്ട്. പ്രവാസി മലയാളി കുടുംബത്തിലെ കൗമാരക്കാരന്റെ അപ്രതീക്ഷിത വിയോഗം ബ്രിസ്‌ബെയ്നിലെ മലയാളി കൂട്ടായ്മകളെ വലിയ ദുഃഖത്തിലാഴ്ത്തി.