ഫ്ലോറിഡ: ഫ്ലോറിഡയിൽ  ഈ മാസം വധശിക്ഷയ്ക്ക് വിധേയരാകാനിരിക്കുന്ന 74 മുതൽ 80 വയസ്സ് വരെയുള്ള തടവുകാരുടെ കേസുകൾ രാജ്യത്ത് വധശിക്ഷയും മനുഷ്യാവകാശവും സംബന്ധിച്ച ചർച്ചകൾക്ക് വീണ്ടും തുടക്കമിട്ടിരിക്കുകയാണ്. മരണശിക്ഷ നടപ്പാക്കുന്നതിന് പ്രായപരിധി വേണമോയെന്ന ചോദ്യമാണ് വീണ്ടും ഉയരുന്നത്.
 

ജൂൺ 25-ന് 74-കാരനായ ഡസ്റ്റി റേ സ്പെൻസറെ വധിച്ചതോടെ ഫ്ലോറിഡയുടെ ആധുനിക ചരിത്രത്തിൽ വധിക്കപ്പെട്ട ഏറ്റവും പ്രായം കൂടിയ തടവുകാരനെന്ന റെക്കോർഡ് അദ്ദേഹത്തിനായിരുന്നു. എന്നാൽ ജൂലൈയിൽ വധശിക്ഷ കാത്തിരിക്കുന്ന രണ്ടുപേർ അതിലും പ്രായമേറിയവരാണ്.

അവരിൽ ഒരാളായ 80-കാരൻ 1986-ൽ മുൻ കാമുകിയുടെ മാതാപിതാക്കളെ കൊലപ്പെടുത്തിയ കേസിലാണ് കുറ്റക്കാരനായി ശിക്ഷിക്കപ്പെട്ടത്. വധശിക്ഷ നടപ്പായാൽ അമേരിക്കയിൽ വധിക്കപ്പെടുന്ന രണ്ടാമത്തെ എൺപതുകാരനാകും അദ്ദേഹം.

ദീർഘകാല അപ്പീലുകളും നിയമനടപടികളും കാരണം അമേരിക്കയിലെ മരണശിക്ഷാ തടവുകാർ പതിറ്റാണ്ടുകളോളം ജയിലിൽ കഴിയുന്ന സാഹചര്യം ഇത്തരത്തിലുള്ള കേസുകൾ വീണ്ടും ശ്രദ്ധാകേന്ദ്രമാക്കുകയാണ്. നിരപരാധികൾക്ക് ശിക്ഷ ലഭിക്കാതിരിക്കാൻ ഭരണഘടന ഉറപ്പുനൽകുന്ന അപ്പീൽ നടപടികൾ അനിവാര്യമാണെങ്കിലും, അതുവഴി നീതി വൈകുന്നതായും ചിലർ ചൂണ്ടിക്കാട്ടുന്നു.

അതേസമയം, പ്രായാധിക്യവും ആരോഗ്യപ്രശ്നങ്ങളും മൂലം സ്വാഭാവിക മരണത്തിന് അടുത്തെത്തിയവരെ വധിക്കുന്നത് മനുഷ്യത്വപരമാണോയെന്ന ചോദ്യവും ശക്തമായി ഉയരുന്നുണ്ട്.

2013 മുതൽ ഫ്ലോറിഡയിലെ മരണശിക്ഷാ തടവുകാരെ ആത്മീയമായി ശുശ്രൂഷിക്കുന്ന കത്തോലിക്കാ വൈദികനായ ഫാ. ഡസ്റ്റിൻ ഫെഡൺ, കത്തോലിക്കാ സഭ വധശിക്ഷയെ എതിർക്കുന്നുവെന്ന് ഓർമിപ്പിച്ചുകൊണ്ട്, "ഏറ്റവും ദുർബലരും പ്രായമായവരുമായ തടവുകാരെ വധിക്കുന്നത് കൂടുതൽ ക്രൂരവും അസാധാരണവുമായ ശിക്ഷയാണ്" എന്ന് അഭിപ്രായപ്പെട്ടു.

എന്നാൽ ഇരകളുടെ കുടുംബാംഗങ്ങൾ ഈ നിലപാട് പങ്കിടുന്നില്ല. 1982-ൽ കൊല്ലപ്പെട്ട പാട്രീഷ്യ ഗിഫോർഡിന്റെ സഹോദരി മെർലിൻ ഗിഫോർഡ്, തന്റെ സഹോദരിയുടെ കൊലയാളിയായ ഡെന്നിസ് സോക്കറിന്റെ വധശിക്ഷ വർഷങ്ങളായുള്ള കാത്തിരിപ്പിന് ശേഷമാണ് യാഥാർഥ്യമാകുന്നതെന്ന് പറഞ്ഞു.

"ഞങ്ങളുടെ ജീവിതകാലത്ത് എങ്കിലും ഇത് നടക്കുന്നതിൽ എനിക്ക് സന്തോഷമുണ്ട്. ഇത് കാണാൻ എന്റെ അമ്മ ജീവിച്ചിരുന്നെങ്കിൽ എത്ര നന്നായേനെ," മെർലിൻ ഗിഫോർഡ് പറഞ്ഞു.

ഇതിനിടെ, ഗുരുതരമായ കരൾരോഗം കാരണം വിഷം കുത്തിവെച്ചുള്ള വധശിക്ഷ അസഹ്യമായ വേദന ഉണ്ടാക്കുമെന്ന വാദം ഉന്നയിച്ച് ഡസ്റ്റി റേ സ്പെൻസർ നൽകിയ അപ്പീൽ അമേരിക്കൻ സുപ്രീം കോടതി തള്ളിയതിനെ തുടർന്നാണ് അദ്ദേഹത്തിന്റെ വധശിക്ഷ നടപ്പാക്കിയത്.

അമേരിക്കയിൽ വധശിക്ഷയുടെ നിയമസാധുതയെക്കുറിച്ചുള്ള ചർച്ചകൾ തുടരുന്നതിനിടെയാണ് പ്രായമായ തടവുകാരുടെ വധശിക്ഷ രാജ്യത്ത് ധാർമ്മികവും നിയമപരവുമായ പുതിയ സംവാദങ്ങൾക്ക് വഴിവെച്ചിരിക്കുന്നത്.