വാഷിങ്ടൺ: ബഹിരാകാശത്തെത്തുന്ന ആദ്യ മലയാളി എന്ന ചരിത്രനേട്ടത്തിനരികെ നാസ ശാസ്ത്രജ്ഞനായ ഡോ. അനിൽ മേനോൻ. പാലക്കാട് ഒറ്റപ്പാലത്ത് വേരുകളുള്ള ഇന്ത്യൻ വംശജനായ ഇദ്ദേഹം ജൂലൈ 14-ന് കസാക്കിസ്ഥാനിൽ നിന്നും അന്താരാഷ്ട്ര ബഹിരാകാശ നിലയത്തിലേക്കുള്ള (ഐ.എസ്.എസ്) തന്റെ കന്നി ദൗത്യം ആരംഭിക്കും. റഷ്യൻ ബഹിരാകാശ സഞ്ചാരികളായ പ്യോട്ട്‌ർ ദുബ്രോവ്, അന്ന കികിന എന്നിവർക്കൊപ്പം കസാക്കിസ്ഥാനിലെ ബൈക്കോനൂർ കോസ്മോഡ്രോമിൽ നിന്ന് 'റോസ്കോസ്മോസ് സോയൂസ് എംഎസ്-29' എന്ന പേടകത്തിലാണ് 49-കാരനായ അനിൽ മേനോൻ യാത്ര തിരിക്കുന്നത്. നാസയിലെ ബഹിരാകാശ യാത്രികനും ഡോക്ടറും മുൻ സൈനിക ഉദ്യോഗസ്ഥനുമായ അനിൽ മേനോന്റെ ഈ ദൗത്യം ഏകദേശം എട്ട് മാസത്തോളം നീണ്ടുനിൽക്കുമെന്നാണ് പ്രതീക്ഷിക്കുന്നത്.

​ഒറ്റപ്പാലം സ്വദേശിയായ ശങ്കരൻ മേനോന്റെയും യുക്രെയ്നിൽ നിന്ന് അമേരിക്കയിലേക്ക് കുടിയേറിയ എലിസബത്തിന്റെയും മകനാണ് ഡോ. അനിൽ മേനോൻ. യു.എസ് എയർഫോഴ്സിൽ ലഫ്റ്റനന്റ് കേണലായിരുന്ന അദ്ദേഹം അഫ്ഗാനിസ്ഥാനിലെ 'ഓപ്പറേഷൻ എൻഡ്യൂറിംഗ് ഫ്രീഡം' ഉൾപ്പെടെയുള്ള പ്രമുഖ സൈനിക ദൗത്യങ്ങളിൽ പങ്കാളിയായിട്ടുണ്ട്. എവറസ്റ്റ് കൊടുമുടി കയറുന്നവർക്ക് വൈദ്യസഹായം നൽകുന്ന ഹിമാലയൻ റെസ്ക്യൂ അസോസിയേഷൻ ടീമിലും ഇന്ത്യയിലെ പോളിയോ വാക്സിനേഷൻ പ്രവർത്തനങ്ങളിലും അദ്ദേഹം സജീവമായിരുന്നു. 2014-ൽ ഫ്ലൈറ്റ് സർജനായി നാസയിൽ ചേർന്ന അദ്ദേഹം, പിന്നീട് സ്പേസ് എക്സിന്റെ ആദ്യ ഫ്ലൈറ്റ് സർജനായും മെഡിക്കൽ ഡയറക്ടറായും സേവനമനുഷ്ഠിച്ചു. 2021 ഡിസംബറിലാണ് നാസയുടെ ബഹിരാകാശ സഞ്ചാരിയായി തിരഞ്ഞെടുക്കപ്പെടുന്നത്. ഇദ്ദേഹത്തിന്റെ ഭാര്യ അന്ന മേനോനും പ്രശസ്ത ബഹിരാകാശ സഞ്ചാരിയാണ്.

​അന്താരാഷ്ട്ര ബഹിരാകാശ നിലയത്തിലെ എട്ട് മാസത്തെ താമസത്തിനിടയിൽ, മനുഷ്യശരീരത്തിൽ ദീർഘകാല ബഹിരാകാശ യാത്രകൾ ഉണ്ടാക്കുന്ന വ്യതിയാനങ്ങളെക്കുറിച്ച് ഡോ. അനിൽ മേനോൻ നിർണായക പരീക്ഷണങ്ങൾ നടത്തും. മൈക്രോ ഗ്രാവിറ്റിയിൽ (ശൂന്യഗുരുത്വാകർഷണം) മനുഷ്യന്റെ രക്തയോട്ടം, നാഡീവ്യൂഹങ്ങളുടെ ഘടന എന്നിവയിലുണ്ടാകുന്ന മാറ്റങ്ങളെക്കുറിച്ചുള്ള പഠനമാണ് ഇതിൽ പ്രധാനം. ഇതോടൊപ്പം ബഹിരാകാശ നിലയത്തിലെ കുടിവെള്ളം ഉപയോഗിച്ച് 'ഐവി ഫ്ലൂയിഡുകൾ' (IV fluids) നിർമിക്കാനുള്ള സാങ്കേതികവിദ്യയും, ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യ ഉപയോഗിച്ചുള്ള അൾട്രാസൗണ്ട് പരിശോധനകളും അദ്ദേഹം നടത്തും. ഭാവിയിലെ ദീർഘദൂര ബഹിരാകാശ ദൗത്യങ്ങളിൽ ഭൂമിയിൽ നിന്നുള്ള മെഡിക്കൽ സഹായത്തെ ആശ്രയിക്കുന്നത് കുറയ്ക്കാൻ ഈ പരീക്ഷണങ്ങൾ വഴിത്തിരിവാകും.