മുംബൈ: കനത്ത മഴയെത്തുടർന്ന് പാതാൾഗംഗ നദിയിൽ ഗ്യാസ് സിലിണ്ടറുകൾ ഒഴുകി നടക്കുന്നു. മഹാരാഷ്ട്രയിലെ പാതാൾഗംഗയിലുള്ള എച്ച്പിസിഎല്ലിന്റെ എൽപിജി ബോട്ടിലിങ് പ്ലാന്റിൽ വെള്ളം കയറിയതോടെയാണ് ആയിരക്കണക്കിന് സിലിണ്ടറുകൾ ഒഴുക്കിൽപ്പെട്ടത്. ചുവന്ന നിറത്തിലുള്ള സിലിണ്ടറുകൾ നദിയിലൂടെ ഒഴുകിനീങ്ങുന്ന ദൃശ്യങ്ങൾ സമൂഹമാധ്യമങ്ങളിൽ ഇതിനകം തന്നെ വൈറലായി കഴിഞ്ഞു.

ഏകദേശം മൂവായിരത്തോളം സിലിണ്ടറുകൾ ഇത്തരത്തിൽ നദിയിലേക്ക് ഒലിച്ചുപോയതായാണ് പ്രാഥമിക വിവരം. പ്ലാന്റിലേക്ക് വെള്ളം ഇരച്ചുകയറിയതാണ് ഇത്രയും വലിയ ദുരന്തത്തിന് കാരണമായത്. മൺസൂൺ മഴ ശക്തമായതോടെ മഹാരാഷ്ട്രയുടെ വിവിധ ഭാഗങ്ങളിൽ സമാനമായ രീതിയിൽ കനത്ത വെള്ളപ്പൊക്കവും ദുരിതങ്ങളും റിപ്പോർട്ട് ചെയ്യപ്പെടുന്നുണ്ട്.

അപകടസാധ്യത കണക്കിലെടുത്ത് റായ്ഗഢ് കളക്ടർ കിഷൻ ജവാലെ പ്രദേശവാസികൾക്ക് കർശന മുന്നറിയിപ്പ് നൽകി. ഒഴുകിപ്പോകുന്ന സിലിണ്ടറുകൾ പിടിച്ചെടുക്കാനോ അവ തുറന്നുനോക്കാനോ വീടുകളിലേക്ക് കൊണ്ടുപോകാനോ ആരും ശ്രമിക്കരുത്. ഇത്തരം സിലിണ്ടറുകൾ പുഴയുടെ തീരങ്ങളിൽ അടിഞ്ഞതായി ശ്രദ്ധയിൽപ്പെട്ടാൽ ഉടൻ തന്നെ ബന്ധപ്പെട്ട അധികൃതരെ അറിയിക്കണമെന്നും കളക്ടർ അഭ്യർത്ഥിച്ചു.