വാഷിങ്ടൺ ഡി.സി.: ഓസ്കർ ജേതാവും ലോകപ്രശസ്ത സംഗീതസംവിധായകനുമായ എ.ആർ. റഹ്മാൻ അമേരിക്കൻ അക്കാദമി ഓഫ് അച്ചീവ്മെന്റ് നൽകുന്ന അഭിമാനകരമായ 'ഗോൾഡൻ പ്ലേറ്റ് അവാർഡ്' ഏറ്റുവാങ്ങി. ആഗോള സംഗീതരംഗത്തിന് നൽകിയ അസാധാരണ സംഭാവനകൾ പരിഗണിച്ചാണ് റഹ്മാനെ ഈ പുരസ്കാരത്തിന് തിരഞ്ഞെടുത്തത്.
 

വാഷിങ്ടൺ ഡി.സിയിലെ ചരിത്രപ്രസിദ്ധമായ ആൻഡ്രൂ ഡബ്ല്യു. മെല്ലൺ ഓഡിറ്റോറിയത്തിൽ നടന്ന അക്കാദമിയുടെ 56-ാമത് ഇന്റർനാഷണൽ അച്ചീവ്മെന്റ് സമ്മിറ്റിൽ പ്രശസ്ത ചലച്ചിത്രസംവിധായകൻ പീറ്റർ ജാക്സൺ റഹ്മാന് പുരസ്കാരം സമ്മാനിച്ചു.

അക്കാദമിയുടെ ഏറ്റവും ഉയർന്ന ബഹുമതികളിലൊന്നായ ഗോൾഡൻ പ്ലേറ്റ് അവാർഡ്, തങ്ങളുടെ മേഖലയിൽ അസാധാരണ നേട്ടങ്ങളും നേതൃത്വപാടവവും പ്രകടിപ്പിച്ച വ്യക്തികൾക്കാണ് നൽകുന്നത്.

പുരസ്കാരം ഏറ്റുവാങ്ങിയ റഹ്മാൻ, ഈ അംഗീകാരം വിനയപൂർവം സ്വീകരിക്കുന്നതായി പറഞ്ഞു. തന്റെ വിജയത്തിന് പിന്നിൽ നിന്ന ഇന്ത്യയോടും, സഹപ്രവർത്തകരോടും, സംവിധായകരോടും, പതിറ്റാണ്ടുകളായി പിന്തുണ നൽകിയ ആരാധകരോടുമാണ് അദ്ദേഹം ഈ ബഹുമതി സമർപ്പിച്ചത്.

"ഈ അംഗീകാരം എനിക്ക് ഏറെ അർഥവത്തായതാണ്. ഇത് ഒരു പുരസ്കാരം മാത്രമല്ല, ഇനിയും മുന്നോട്ട് പോകാനും കൂടുതൽ വളരാനും പ്രചോദനം നൽകുന്ന ഓർമപ്പെടുത്തലുമാണ്. ഇന്ത്യയെ ഈ രീതിയിൽ പ്രതിനിധീകരിക്കാൻ കഴിഞ്ഞതിൽ അഭിമാനമുണ്ട്," റഹ്മാൻ പറഞ്ഞു.

മൂന്ന് പതിറ്റാണ്ടിലേറെ നീണ്ട സംഗീതജീവിതത്തിലൂടെ സമകാലീന ഇന്ത്യൻ സംഗീതത്തിന് പുതിയ ദിശ നൽകുകയും അതിനെ ആഗോളതലത്തിലേക്ക് ഉയർത്തുകയും ചെയ്തതിനാണ് റഹ്മാനെ ആദരിച്ചതെന്ന് അമേരിക്കൻ അക്കാദമി ഓഫ് അച്ചീവ്മെന്റ് അറിയിച്ചു. മിക് ജാഗർ, യു2, ആൻഡ്രൂ ലോയ്ഡ് വെബർ തുടങ്ങിയ ലോകപ്രശസ്ത കലാകാരന്മാരുമായി സഹകരിച്ച റഹ്മാൻ, 175-ലധികം സിനിമകൾക്ക് സംഗീതം ഒരുക്കിയിട്ടുണ്ടെന്നും അക്കാദമി ചൂണ്ടിക്കാട്ടി.

1992-ൽ പുറത്തിറങ്ങിയ തമിഴ് ചിത്രം റോജയിലൂടെയാണ് റഹ്മാൻ ചലച്ചിത്രസംഗീത രംഗത്തേക്ക് അരങ്ങേറ്റം കുറിച്ചത്. ആദ്യ ചിത്രത്തിലൂടെ തന്നെ മികച്ച സംഗീതസംവിധായകനുള്ള ദേശീയ പുരസ്കാരം സ്വന്തമാക്കിയ അദ്ദേഹം, 'സ്ലംഡോഗ് മില്യണയർ' എന്ന ചിത്രത്തിലൂടെ ലോകശ്രദ്ധ പിടിച്ചുപറ്റി. ഈ ചിത്രത്തിന് മികച്ച ഒറിജിനൽ സ്‌കോർ ഉൾപ്പെടെ രണ്ട് ഓസ്കർ പുരസ്കാരങ്ങൾക്കൊപ്പം ഗ്രാമി, ഗോൾഡൻ ഗ്ലോബ്, ബാഫ്റ്റ തുടങ്ങിയ അന്താരാഷ്ട്ര ബഹുമതികളും റഹ്മാനെ തേടിയെത്തി.

'മൊസാർട്ട് ഓഫ് മദ്രാസ്' എന്നറിയപ്പെടുന്ന റഹ്മാൻ, ഇന്ത്യൻ ശാസ്ത്രീയ സംഗീതത്തെയും ആധുനിക ആഗോള സംഗീതശൈലികളെയും സമന്വയിപ്പിച്ച് ഇന്ത്യൻ സംഗീതത്തെ ലോകവേദിയിലേക്ക് ഉയർത്തിയ വ്യക്തിയെന്ന നിലയിലും പ്രശംസിക്കപ്പെട്ടു. പിന്നാക്ക വിഭാഗങ്ങളിലെ കുട്ടികൾക്ക് സംഗീതവിദ്യാഭ്യാസം ലഭ്യമാക്കാനുള്ള അദ്ദേഹത്തിന്റെ ജീവകാരുണ്യ പ്രവർത്തനങ്ങളെയും അക്കാദമി പ്രത്യേകം പരാമർശിച്ചു.

ഈ പുരസ്കാരത്തോടെ മായ ആഞ്ചലോ, ഫ്രാൻസിസ് ഫോർഡ് കോപ്പോള, ജൂലി ആൻഡ്രൂസ്, ഹറുക്കി മുരകാമി, ആൻഡ്രൂ ലോയ്ഡ് വെബർ, മൈക്കൽ ജെ. ഫോക്സ്, സാമുവൽ എൽ. ജാക്സൺ, ആൻഡ്രെ അഗാസി തുടങ്ങിയ വിശിഷ്ട വ്യക്തികളുടെ നിരയിലേക്കാണ് എ.ആർ. റഹ്മാൻ ഇടംപിടിച്ചത്. ഗോൾഡൻ പ്ലേറ്റ് അവാർഡ് നേടുന്ന ആദ്യ ഇന്ത്യൻ സംഗീതജ്ഞൻ എന്ന ചരിത്രനേട്ടവും ഇതോടെ അദ്ദേഹത്തിന്റെ പേരിലായി.

1961-ൽ സ്ഥാപിതമായ അമേരിക്കൻ അക്കാദമി ഓഫ് അച്ചീവ്മെന്റ്, കല, ശാസ്ത്രം, സാഹിത്യം, പൊതുസേവനം, ബിസിനസ്, കായികം, വിനോദം തുടങ്ങി വിവിധ മേഖലകളിലെ ലോകപ്രശസ്ത വ്യക്തികളെ ഒരുമിച്ച് കൊണ്ടുവരുന്ന സ്ഥാപനമാണ്. ഓരോ വർഷവും ഏകദേശം 25 പ്രമുഖരെയാണ് അക്കാദമിയുടെ അവാർഡ്സ് കൗൺസിൽ ഗോൾഡൻ പ്ലേറ്റ് പുരസ്കാരത്തിനായി തിരഞ്ഞെടുക്കുന്നത്.