കൊച്ചി: കുംഭമേള വൈറല്‍ പെണ്‍കുട്ടിയുടെ ഭര്‍ത്താവ് മുഹമ്മദ് ഫര്‍മാന് തിരിച്ചടി. അറസ്റ്റിനുള്ള വിലക്ക് നീട്ടണമെന്ന് ആവശ്യപ്പെട്ട് സമര്‍പ്പിച്ച ഹര്‍ജി ഹൈക്കോടതി തള്ളി. ട്രാന്‍സിറ്റ് മുന്‍കൂര്‍ ജാമ്യക്കാലാവധി രണ്ടാഴ്ച കൂടി നീട്ടണമെന്ന് ആവശ്യപ്പെട്ടായിരുന്നു ഹര്‍ജി. മധ്യപ്രദേശ് ഹൈക്കോടതിയെ സമീപിക്കാന്‍ ഒരു മാസത്തെ ഇടക്കാല ജാമ്യം അനുവദിക്കണമെന്നായിരുന്നു ആവശ്യം.

എന്നാല്‍ ഇത്തരമൊരു ജാമ്യം നല്‍കാനുള്ള അധികാര പരിധിയില്ലെന്ന് കേരള ഹൈക്കോടതിയുടെ സിംഗിള്‍ ബെഞ്ച് വ്യക്തമാക്കി. ഫര്‍മാന്‍ നല്‍കിയ ജാമ്യഹര്‍ജി കഴിഞ്ഞ ദിവസം മധ്യപ്രദേശിലെ മണ്ഡലേശ്വര്‍ പ്രത്യേക കോടതി കഴിഞ്ഞദിവസം തള്ളിയിരുന്നു. ഈ സാഹചര്യത്തിലാണ് ഫര്‍മാന്‍ കേരള ഹൈക്കോടതിയെ സമീപിച്ചത്.

കുംഭമേള വൈറല്‍ താരമായ പെണ്‍കുട്ടിക്ക് പ്രായപൂര്‍ത്തിയായിട്ടില്ലെന്നും അതിനാല്‍ വിവാഹം നിയമവിരുദ്ധമാണെന്നും പോക്സോ കേസ് പരിധിയില്‍ വരുന്നതാണെന്നുമാണ് കുടുംബം മധ്യപ്രദേശ് പൊലീസിന് നല്‍കിയ പരാതി. ഇതിന്റെ അടിസ്ഥാനത്തിലാണ് പൊലീസ് കേസെടുത്തത്. കേരളത്തില്‍ തുടരുന്ന പെണ്‍കുട്ടിക്ക് കോടതി നിര്‍ദേശ പ്രകാരം പോലീസ് സംരക്ഷണം തുടരുന്നുണ്ട്.