എന്തൊരു ജനതയാണ് നിങ്ങളെന്ന് ഇസ്രായേലികളോട് ചോദിക്കുകയാണ് യു എൻ അന്വേഷണ കമ്മീഷൻ അംഗം ക്രിസ് സൈഡോട്ട്. കുട്ടികളെ കൊല്ലുന്ന സൈനികരെയും ഭരണകൂടത്തെയും പിന്തുണക്കുന്ന പാതകത്തെയാണ് അദ്ദേഹം ചോദ്യം ചെയ്യുന്നത്. ഐഡിഎഫ് എന്ന ഇസ്രായേലി അധിനിവേശ സേന ഫലസ്തീനിലെ കുട്ടികളെ മനപ്പൂർവ്വം ലക്ഷ്യമിട്ട് കൊല്ലുകയും അവരുടെ കുട്ടിക്കാലം തകർക്കുകയും ചെയ്ത കൊടും ഭീകരതയിലേക്കാണ് ചൊവ്വാഴ്ച പുറത്തുവിട്ട യുഎൻ അന്വേഷണ കമ്മീഷൻ റിപ്പോർട്ട് വിരൽ ചൂണ്ടുന്നത്. ഫലസ്തീൻ കുട്ടികളെ ഇസ്രായേൽ മനപ്പൂർവ്വം ലക്ഷ്യമിട്ടതായും ഗസ്സയിൽ വംശഹത്യ, മാനവികതക്കെതിരായ കുറ്റകൃത്യങ്ങൾ, യുദ്ധക്കുറ്റങ്ങൾ എന്നിവയും, വെസ്റ്റ് ബാങ്കിൽ അധിക യുദ്ധക്കുറ്റങ്ങളും ചെയ്തതായും കണ്ടെത്തിയിരിക്കുന്നു. ഐക്യരാഷ്ട്രസഭയുടെ ഹ്യൂമന്‍ റൈറ്റ്‌സ് കൗണ്‍സിലിന്റെ (UN Human Rights Council) 62-ാമത് സെഷനില്‍ സമര്‍പ്പിക്കപ്പെട്ട, 'The essence of childhood has been destroyed' എന്ന ഔദ്യോഗിക റിപ്പോര്‍ട്ട് ആണിത്. 2023 ഒക്ടോബര്‍ 7 മുതല്‍ 2026 മാര്‍ച്ച് 31 വരെയുള്ള കാലയളവില്‍ ഇസ്രായേല്‍ സൈന്യം ഫലസ്തീന്‍ കുട്ടികള്‍ക്കെതിരെ നടത്തിയ കടുത്ത മനുഷ്യാവകാശ ലംഘനങ്ങളെക്കുറിച്ചുള്ള വിശദമായ കണ്ടെത്തലുകളാണ് ഇതിലുള്ളത്. കുറഞ്ഞത് 20,179 ഫലസ്തീന്‍ കുട്ടികളെ ഇസ്രായേലി ഭീകര സൈന്യം കൊല്ലുകയുണ്ടായി. 44,143 കുട്ടികള്‍ക്ക് പരിക്കേറ്റു. കൊല്ലപ്പെട്ടവരില്‍ 5 വയസ്സിന് താഴെയുള്ള 5,031 കുട്ടികളും, ഒരു വയസ്സില്‍ താഴെയുള്ള 1,029 കുട്ടികളും, 420 നവജാതശിശുക്കളും ഉള്‍പ്പെടുന്നു. {andrew}