തിരുവനന്തപുരം: സംസ്ഥാനത്ത് വിവാദമായ വീര്യം കുറഞ്ഞ മദ്യത്തിന്റെ നികുതിയിളവ് തീരുമാനത്തില്‍ നിന്നും സര്‍ക്കാര്‍ പിന്‍മാറിയേക്കുമെന്ന സൂചന നല്‍കി സ്പീക്കര്‍ തിരുവഞ്ചൂര്‍ രാധാകൃഷ്ണന്‍. ജനസമൂഹത്തിന്റെ ശബ്ദം യുഡിഎഫ് സര്‍ക്കാര്‍ കേള്‍ക്കുമെന്നാണ് തന്റെ വിശ്വാസമെന്നും അദ്ദേഹം മാധ്യമങ്ങളോട് പ്രതികരിച്ചു.

വിഷയം മുന്നണിയില്‍ ചര്‍ച്ച ചെയ്ത് അന്തിമ തീരുമാനമെടുക്കുമെന്ന് മുഖ്യമന്ത്രി തന്നെ നിയമസഭയില്‍ വ്യക്തമാക്കിയിട്ടുള്ള കാര്യവും സ്പീക്കര്‍ ഓര്‍മിപ്പിച്ചു. 'മുഖ്യമന്ത്രി ഈ വിഷയം സഭയില്‍ വ്യക്തമാക്കിയതാണ്. ജനവികാരം മാനിക്കുന്ന മുന്നണിയാണ് യുഡിഎഫ്. വീര്യം കുറഞ്ഞ മദ്യവുമായി ബന്ധപ്പെട്ട് നിലനില്‍ക്കുന്ന ആശങ്കകളും പ്രശ്‌നങ്ങളും ഒരു വശത്തുണ്ട്. അതിനെക്കൂടി ഇല്ലാതാക്കാനുള്ള ഒരു 'മാസ് മൂവ്‌മെന്റ്' ആണ് ഇപ്പോള്‍ നടക്കുന്നത്.'

മുന്‍പ് എക്‌സൈസ് കമ്മീഷണറായിരുന്ന ഋഷിരാജ് സിംഗിന്റെ കത്ത് പുറത്തുവന്നതോടെ വലിയ രാഷ്ട്രീയ-സാമൂഹിക ചര്‍ച്ചകള്‍ക്ക് ഈ വിഷയം വഴിതുറന്നിരുന്നു. വീര്യം കുറഞ്ഞ മദ്യം സ്‌കൂള്‍ കുട്ടികളടക്കം ദുരുപയോഗം ചെയ്യാന്‍ സാധ്യതയുണ്ടെന്ന മുന്നറിയിപ്പുകള്‍ നിലനില്‍ക്കെ, നികുതിയിളവ് തീരുമാനത്തില്‍ നിന്ന് പിന്നോട്ട് പോകാന്‍ തന്നെയാണ് ഭരണപക്ഷം ആലോചിക്കുന്നത് എന്ന വ്യക്തമായ സൂചനയാണ് സ്പീക്കറുടെ പ്രതികരണത്തിലൂടെ പുറത്തുവരുന്നത്.