വാഷിങ്ടൺ: അമേരിക്കയിലെ പ്രമുഖ സാമ്പത്തിക വികസന ഏജൻസികളിലൊന്നായ ഫെയർഫാക്സ് കൗണ്ടി എക്കൊണോമിക് ഡെവലപ്മെന്റ് അതോറിറ്റി (എഫ്സിഇഡിഎ)യുടെ പുതിയ പ്രസിഡന്റും ചീഫ് എക്സിക്യൂട്ടീവ് ഓഫീസറുമായി ഇന്ത്യൻ-അമേരിക്കൻ വ്യവസായ നേതാവ് ജോർജ് ഡി. തോമസിനെ നിയമിച്ചു. ജൂൺ 16-ന് പ്രഖ്യാപിച്ച നിയമനം അനുസരിച്ച് അദ്ദേഹം ഓഗസ്റ്റിൽ ചുമതലയേൽക്കും.
 

ഏകദേശം ഏഴ് വർഷമായി ഏജൻസിയെ നയിച്ചിരുന്ന വിക്ടർ ഹോസ്കിൻസിന്റെ പകരക്കാരനായാണ് ജോർജ് തോമസ് എത്തുന്നത്. സാമ്പത്തിക വികസനം, സാങ്കേതികവിദ്യ, അടിസ്ഥാനസൗകര്യ വികസനം, തൊഴിൽശേഷി വികസനം, നിക്ഷേപ ആകർഷണം, പൊതുമേഖല-സ്വകാര്യമേഖല പങ്കാളിത്തം തുടങ്ങിയ മേഖലകളിൽ 25 വർഷത്തിലേറെ പരിചയസമ്പത്തുമായാണ് അദ്ദേഹം പുതിയ ദൗത്യം ഏറ്റെടുക്കുന്നത്. നിലവിൽ കണക്ടഡ് ഡിഎംവിയുടെ പ്രസിഡന്റും സിഇഒയുമായ ജോർജ് തോമസ്, സർക്കാർ, വ്യവസായം, സർവകലാശാലകൾ, നിക്ഷേപകർ എന്നിവർക്കിടയിൽ സഹകരണം വളർത്തുന്ന പ്രാദേശിക നവീകരണ ശൃംഖലയെ ശക്തിപ്പെടുത്തുന്നതിൽ നിർണായക പങ്കുവഹിച്ചിട്ടുണ്ട്. 2019 മുതൽ അദ്ദേഹത്തിന്റെ നേതൃത്വത്തിൽ സംഘടന ഒരു സന്നദ്ധ കൂട്ടായ്മയിൽ നിന്ന് കോടിക്കണക്കിന് ഡോളർ മൂല്യമുള്ള നവീകരണ സംരംഭമായി വളർന്നു.

അദ്ദേഹത്തിന്റെ നേതൃത്വത്തിൽ ക്വാണ്ടം വേൾഡ് കോൺഗ്രസ്, സ്പേസ്നെക്സ്റ്റ് സമ്മേളനങ്ങൾ തുടങ്ങിയ പ്രധാന പദ്ധതികൾ ആരംഭിക്കുകയും ക്വാണ്ടം സാങ്കേതികവിദ്യ, ഊർജം, ബഹിരാകാശ ഗവേഷണം എന്നിവയ്ക്കായി പ്രത്യേക ഇന്നവേഷൻ സെന്ററുകൾ സ്ഥാപിക്കുകയും ചെയ്തു.എഐ, ക്വാണ്ടം സാങ്കേതികവിദ്യ, അഡ്വാൻസ്ഡ് കമ്പ്യൂട്ടിംഗ്, ദേശീയ പ്രതിരോധം, ബഹിരാകാശ വാണിജ്യവൽക്കരണം തുടങ്ങിയ അതിവേഗം വളരുന്ന മേഖലകളിൽ ഫെയർഫാക്സ് കൗണ്ടിയുടെ നേതൃത്വസ്ഥാനം കൂടുതൽ ശക്തിപ്പെടുത്തുകയെന്ന ലക്ഷ്യത്തോടെയാണ് പുതിയ നിയമനം.
 

ലോകത്തിലെ ഏറ്റവും ശക്തമായ സാമ്പത്തികവും സാങ്കേതികവുമായ സാധ്യതകളുടെ സംഗമസ്ഥാനങ്ങളിലൊന്നാണ് ഫെയർഫാക്സ്. ആളുകളെയും സ്ഥാപനങ്ങളെയും ആശയങ്ങളെയും ബന്ധിപ്പിച്ച് ദീർഘകാല സാമ്പത്തിക അവസരങ്ങൾ സൃഷ്ടിക്കാനുള്ള കഴിവ് ജോർജ് തോമസ് തന്റെ കരിയറിലുടനീളം തെളിയിച്ചിട്ടുണ്ടെന്ന് ഫെയർഫാക്സ് കൗണ്ടി ബോർഡ് ഓഫ് സൂപ്പർവൈസേഴ്സ് ചെയർമാൻ ജെഫ് മക്കേ പറഞ്ഞു.ജോർജ് തോമസ് ഏകദേശം രണ്ട് പതിറ്റാണ്ടോളം ഐബിഎം-ൽ വിവിധ ഉന്നത നേതൃത്വ പദവികൾ വഹിച്ചിരുന്നു. സർക്കാർ സേവനങ്ങൾ, സ്മാർട്ട് സിറ്റികൾ, സാങ്കേതിക തന്ത്രങ്ങൾ, വിപണി വികസനം തുടങ്ങിയ മേഖലകളിൽ അദ്ദേഹം പ്രവർത്തിച്ചു. കൂടാതെ ഇൻഫ്രാസ്ട്രക്ചർ, കൺസൾട്ടിംഗ് സ്ഥാപനങ്ങളായ ഹാച്ച് ഉൾപ്പെടെയുള്ള കമ്പനികളിലും നേതൃത്വ ചുമതലകൾ വഹിച്ചിട്ടുണ്ട്.

അസാധാരണമായ സാമ്പത്തിക-സാങ്കേതിക മാറ്റങ്ങളുടെ കേന്ദ്രസ്ഥാനത്താണ് ഫെയർഫാക്സ് കൗണ്ടിയെന്നും ഇവിടുത്തെ പ്രതിഭാശേഷിയും ഗവേഷണ മികവും സംരംഭകത്വ ഊർജവും ചേർന്നാൽ ഭാവിയിലെ വളർച്ചയ്ക്ക് നേതൃത്വം നൽകാൻ കൗണ്ടിക്ക് കഴിയുമെന്നും  ജോർജ് തോമസ് പറഞ്ഞു. കേരള യൂണിവേഴ്സിറ്റിയിൽ നിന്ന് എഞ്ചിനീയറിങ്ങിൽ ബിരുദവും ജോർജിയ ഇൻസ്റ്റിറ്റ്യൂട്ട് ഓഫ് ടെക്‌നോളജിയിൽ നിന്ന് എഞ്ചിനീയറിങ്ങിൽ ബിരുദാനന്തര ബിരുദവും നേടിയിട്ടുള്ള വ്യക്തിയാണ് ജോർജ് തോമസ്.