തന്റെ രാഷ്ട്രീയ ജീവിതത്തിൽ വലിയ വിവാദങ്ങൾക്ക് കാരണമായ 'childless cat ladies' എന്ന പരാമർശം തികഞ്ഞ വിഡ്ഢിത്തമായിരുന്നുവെന്ന് തുറന്നുസമ്മതിച്ച് വൈസ് പ്രസിഡന്റ് ജെ.ഡി. വാൻസ്. ചൊവ്വാഴ്ച പുറത്തിറങ്ങിയ അദ്ദേഹത്തിന്റെ  ആത്മകഥയായ 'കമ്മ്യൂണിയൻ: ഫൈൻഡിംഗ് മൈ വേ ബാക്ക് ടു ഫെയ്ത്ത്' എന്ന പുസ്തകത്തിലാണ് വാൻസ് തന്റെ മുൻകാല നിലപാടുകളിൽ ഖേദം പ്രകടിപ്പിക്കുകയും തന്റെ രാഷ്ട്രീയ-സാമൂഹിക തത്വശാസ്ത്രങ്ങൾ വ്യക്തമാക്കുകയും ചെയ്യുന്നത്. ഡെമോക്രാറ്റിക് പാർട്ടിയിലെ ചില വനിതാ നേതാക്കളെ ലക്ഷ്യമിട്ട് 2021-ൽ താൻ നടത്തിയ ആ പ്രസ്താവന കേവലം ജനങ്ങളെ പ്രകോപിപ്പിക്കാൻ മാത്രമുള്ളതായിരുന്നുവെന്നും, അത് വലിയൊരു തെറ്റായിപ്പോയെന്നും അദ്ദേഹം പുസ്തകത്തിൽ സമ്മതിക്കുന്നു. 2028-ലെ പ്രസിഡന്റ് തിരഞ്ഞെടുപ്പിൽ റിപ്പബ്ലിക്കൻ പാർട്ടിയുടെ മുൻനിര സ്ഥാനാർത്ഥിയാകാൻ സാധ്യതയുള്ള വാൻസ്, തന്റെ കത്തോലിക്കാ മതത്തിലേക്കുള്ള പരിവർത്തനത്തെക്കുറിച്ചും ക്രിസ്തുമതത്തിൽ അധിഷ്ഠിതമായ ഒരു അമേരിക്കൻ ഭരണസംവിധാനത്തെക്കുറിച്ചുമുള്ള തന്റെ കാഴ്ചപ്പാടുകൾ ഈ 304 പേജുള്ള പുസ്തകത്തിലൂടെ പങ്കുവെക്കുന്നുണ്ട്.

വത്തിക്കാന്റെ കുടിയേറ്റ നയങ്ങളോടുള്ള തന്റെ വിയോജിപ്പും വാൻസ് പുസ്തകത്തിൽ പരസ്യമാക്കുന്നു. 2025 ഏപ്രിലിൽ ഫ്രാൻസിസ് മാർപ്പാപ്പയുമായി നടത്തിയ കൂടിക്കാഴ്ചയെക്കുറിച്ച് പരാമർശിക്കുന്ന അദ്ദേഹം, കുടിയേറ്റ വിഷയങ്ങളിൽ വത്തിക്കാൻ ഉദ്യോഗസ്ഥരുടെ നിലപാടുകൾ പ്രായോഗികമല്ലാത്ത വെറും ഉപദേശങ്ങൾ മാത്രമാണെന്ന് വിമർശിക്കുന്നു. അമേരിക്കയിലും മറ്റ് പാശ്ചാത്യ രാജ്യങ്ങളിലും ജനനനിരക്ക് ഗണ്യമായി കുറയുന്നതിലുള്ള തന്റെ കടുത്ത ആശങ്കയും അദ്ദേഹം പുസ്തകത്തിൽ പങ്കുവെക്കുന്നുണ്ട്. കുട്ടികളുണ്ടാകുന്നതിനെ പ്രോത്സാഹിപ്പിക്കുന്ന ഒരു സംസ്കാരം കെട്ടിപ്പടുക്കുന്നതിൽ ക്രിസ്തീയ മൂല്യങ്ങൾക്ക് വലിയ പങ്കുണ്ടെന്ന് വിശ്വസിക്കുന്ന അദ്ദേഹം, സാമ്പത്തിക കണക്കുകളേക്കാൾ ധാർമ്മിക മൂല്യങ്ങൾക്കായിരിക്കണം ഭരണാധികാരികൾ മുൻഗണന നൽകേണ്ടതെന്ന് വാദിക്കുന്നു. ഗർഭച്ഛിദ്രം പാപമാണെന്ന് വിശ്വസിക്കുന്നതുപോലെ തന്നെ ജനിക്കുന്ന കുട്ടികൾക്ക് നല്ലൊരു ജീവിതസാഹചര്യം ഒരുക്കാതിരിക്കുന്നതും പാപമാണെന്ന് അദ്ദേഹം ചൂണ്ടിക്കാണിക്കുന്നു. ഒപ്പം തന്റെ ഭാര്യ ഉഷ വാൻസുമായുള്ള പ്രണയത്തെക്കുറിച്ചും ദാമ്പത്യജീവിതത്തെക്കുറിച്ചുമുള്ള വ്യക്തിപരമായ കാര്യങ്ങളും അദ്ദേഹം പുസ്തകത്തിൽ വെളിപ്പെടുത്തുന്നുണ്ട്. 

യേൽ ലോ സ്കൂളിൽ വെച്ച് ഉഷയെ കണ്ടുമുട്ടിയ നിമിഷങ്ങളെക്കുറിച്ചും, നിലവിൽ തങ്ങളുടെ നാലാമത്തെ കുഞ്ഞിനായുള്ള കാത്തിരിപ്പിലുള്ള ഇരുവരുടെയും ജീവിതത്തിൽ, ഹിന്ദു മതവിശ്വാസിയായ ഉഷയാണ് തന്നെ വീണ്ടും ക്രിസ്തീയ വിശ്വാസത്തിലേക്ക് മടങ്ങിവരാൻ പ്രേരിപ്പിച്ചതെന്നും വാൻസ് കൃതജ്ഞതയോടെ സ്മരിക്കുന്നു.