തിരുവനന്തപുരം: ശബരിമല സ്വർണ്ണക്കൊള്ള കേസിലെ പ്രതികളുടെ അഭിഭാഷകനായ കെ.ബി. പ്രദീപിനെ ദേവസ്വം സ്പെഷ്യൽ പ്ലീഡറായി സർക്കാർ നിയമിച്ച സംഭവം തങ്ങൾ അറിഞ്ഞിട്ടില്ലെന്ന് കെ.പി.സി.സി. പ്രസിഡന്റും മന്ത്രിയുമായ സണ്ണി ജോസഫ്. തീരുമാനങ്ങളിൽ എന്തെങ്കിലും തരത്തിലുള്ള ചെറിയ പിശകുകൾ സംഭവിച്ചിട്ടുണ്ടെങ്കിൽ അത് തിരുത്തി മുന്നോട്ട് പോകുമെന്നും മാധ്യമപ്രവർത്തകരുടെ ചോദ്യങ്ങൾക്ക് മറുപടിയായി അദ്ദേഹം വ്യക്തമാക്കി. അതേസമയം, ഈ നിയമനത്തെച്ചൊല്ലി ഉയർന്ന രാഷ്ട്രീയ വിവാദങ്ങൾ ശക്തമായ പശ്ചാത്തലത്തിൽ കെ.ബി. പ്രദീപ് സ്പെഷ്യൽ പ്ലീഡർ സ്ഥാനം രാജിവെച്ചു. മുഖ്യമന്ത്രി വി.ഡി. സതീശൻ നേരിട്ട് ആവശ്യപ്പെട്ടതിനെത്തുടർന്നാണ് അടിയന്തര രാജി.

​നിയമനവുമായി ബന്ധപ്പെട്ട വിവാദങ്ങളിൽ ദേവസ്വം മന്ത്രിയാണ് കൂടുതൽ വിശദീകരണം നൽകേണ്ടതെന്ന് സണ്ണി ജോസഫ് പറഞ്ഞു. ഈ നിയമനത്തെക്കുറിച്ച് താൻ അറിഞ്ഞിട്ടില്ലെന്നും മുഖ്യമന്ത്രി വി.ഡി. സതീശനാണ് നേരിട്ട് തീരുമാനമെടുത്തതെന്നുമുള്ള ദേവസ്വം മന്ത്രി കെ. മുരളീധരന്റെ പരസ്യമായ ആരോപണത്തെക്കുറിച്ച് ചോദിച്ചപ്പോൾ, ഇക്കാര്യങ്ങൾ മന്ത്രിയുമായി സംസാരിച്ച് ആലോചിക്കുമെന്നായിരുന്നു അദ്ദേഹത്തിന്റെ മറുപടി. എന്നാൽ, മന്ത്രിസഭയിൽ മുഖ്യമന്ത്രിയാണോ ഒറ്റയ്ക്ക് എല്ലാ തീരുമാനങ്ങളും എടുക്കുന്നത് എന്ന മാധ്യമങ്ങളുടെ ചോദ്യത്തിന് കൃത്യമായ മറുപടി നൽകാതെ ചിരിച്ചുകൊണ്ട് സണ്ണി ജോസഫ് ഒഴിഞ്ഞുമാറുകയായിരുന്നു.

​സ്വർണ്ണക്കൊള്ള കേസിൽ പ്രതിസ്ഥാനത്ത് നിൽക്കുന്നവർക്ക് വേണ്ടി കോടതിയിൽ ഹാജരായ അഭിഭാഷകനെ തന്നെ ദേവസ്വത്തിന്റെ സ്പെഷ്യൽ പ്ലീഡറാക്കിയത് സർക്കാരിനെ വലിയ രീതിയിൽ പ്രതിരോധത്തിലാക്കിയിരുന്നു. പ്രതിപക്ഷത്തുനിന്നും ഭരണമുന്നണിയിൽ നിന്നും കടുത്ത വിമർശനങ്ങളാണ് ഈ തീരുമാനത്തിനെതിരെ ഉയർന്നത്. ഒടുവിൽ ദേവസ്വം മന്ത്രി തന്നെ പരസ്യമായി വിയോജിപ്പ് പ്രകടിപ്പിച്ചതോടെയാണ് മുഖ്യമന്ത്രിയുടെ ഇടപെടലുണ്ടായതും പ്രദീപിനോട് സ്ഥാനം ഒഴിയാൻ ആവശ്യപ്പെട്ടതും. രാജി സമർപ്പിച്ചതോടെ സർക്കാരിനെ ഉലച്ച വലിയൊരു രാഷ്ട്രീയ വിവാദത്തിനാണ് താൽക്കാലിക ശമനമായിരിക്കുന്നത്.