രാജ്യത്തെ നടുക്കിയ അഹമ്മദാബാദ് എയർ ഇന്ത്യ (AI-171) വിമാനാപകടം നടന്ന് ഒരു വർഷം തികയുമ്പോൾ, ഇരകളുടെ കുടുംബങ്ങൾക്കുള്ള ഇടക്കാല ധനസഹായ വിതരണം ഭൂരിഭാഗവും പൂർത്തിയായതായി റിപ്പോർട്ട്. അപകടത്തിൽ ജീവൻ നഷ്ടപ്പെട്ടവരുടെ 96 ശതമാനം കുടുംബങ്ങൾക്കും 25 ലക്ഷം രൂപ വീതം ഇടക്കാല ആശ്വാസ ധനസഹായം എയർ ഇന്ത്യ ഇതിനകം കൈമാറിക്കഴിഞ്ഞു. എന്നാൽ അവശേഷിക്കുന്ന നാല് ശതമാനം കുടുംബങ്ങൾക്ക് തുക നൽകാൻ സാധിച്ചിട്ടില്ല. ബന്ധുക്കൾ തമ്മിലുള്ള അവകാശ തർക്കങ്ങളും ആവശ്യമായ രേഖകളുടെ അപൂർണ്ണതയുമാണ് ഈ കുടുംബങ്ങൾക്ക് തുക വൈകാൻ കാരണമായി അധികൃതർ ചൂണ്ടിക്കാണിക്കുന്നത്.

നിയമപരമായ നഷ്ടപരിഹാരങ്ങൾക്ക് പുറമെ, ടാറ്റാ സൺസ് ചെയർമാൻ എൻ. ചന്ദ്രശേഖരൻ മാനുഷിക പരിഗണന മുൻനിർത്തി പ്രഖ്യാപിച്ച 1 കോടി രൂപ വീതമുള്ള പ്രത്യേക ധനസഹായവും കുടുംബങ്ങൾക്ക് ലഭ്യമാക്കിത്തുടങ്ങിയിട്ടുണ്ട്. ഇതിനായി രൂപീകരിച്ച ‘AI-171 മെമ്മോറിയൽ ആൻഡ് വെൽഫെയർ ട്രസ്റ്റ്’ വഴി 91% കുടുംബങ്ങൾക്കും ഇതിനോടകം തുക കൈമാറി. അപകടത്തിൽ പരിക്കേറ്റ പ്രദേശവാസികളിൽ 94% പേർക്കും പരിക്കിന്റെ തീവ്രതയനുസരിച്ച് സഹായം നൽകിയിട്ടുണ്ട്. ദുരന്തത്തിൽ മരിച്ചവരുടെ വ്യക്തിഗത സാധനങ്ങൾ തിരികെ നൽകാനുള്ള നടപടികളും പുരോഗമിക്കുകയാണ്. ഇന്ത്യയിലും യുകെയിലുമായി 139 കുടുംബങ്ങൾക്ക് സാധനങ്ങൾ കൈമാറിയപ്പോൾ, 15 കുടുംബങ്ങൾ ഇവ കൈപ്പറ്റാൻ വിസമ്മതിച്ചിട്ടുണ്ട്.

അപകടത്തെക്കുറിച്ചുള്ള ഔദ്യോഗിക അന്വേഷണ റിപ്പോർട്ട് പുറത്തുവന്നതിന് ശേഷമേ അന്തിമ നഷ്ടപരിഹാര വിതരണം പൂർണ്ണതോതിൽ നടക്കൂ എന്ന് എയർ ഇന്ത്യ വ്യക്തമാക്കി. അന്തിമ തുക നിശ്ചയിക്കുന്നതിനുള്ള ചർച്ചകൾ ആരംഭിച്ചിട്ടുണ്ടെങ്കിലും കുടുംബങ്ങൾക്ക് മേൽ യാതൊരുവിധ സമയപരിധിയോ സമ്മർദ്ദമോ കമ്പനി ചെലുത്തില്ല. 

കഴിഞ്ഞ വർഷം ജൂൺ 12-ന് അഹമ്മദാബാദിലെ സർദാർ വല്ലഭായ് പട്ടേൽ വിമാനത്താവളത്തിൽ നിന്ന് പറന്നുയർന്ന ഉടനായിരുന്നു എയർ ഇന്ത്യയുടെ ബോയിംഗ് 787-8 ഡ്രീംലൈനർ വിമാനം തകർന്നുവീണത്. വിമാനത്തിലുണ്ടായിരുന്ന 241 പേരും (ഒരാൾ അത്ഭുതകരമായി രക്ഷപ്പെട്ടു) കെട്ടിടത്തിലുണ്ടായിരുന്ന 19 പേരും ഉൾപ്പെടെ ആകെ 260 ജീവനുകളാണ് അന്ന് ആ ദാരുണ ദുരന്തത്തിൽ പൊലിഞ്ഞത്.