വാഷിംഗ്ടൺ/ലണ്ടൻ: ബ്രിട്ടനിൽ 18-കാരനായ ഹെൻറി നൊവാക്കിന്റെ കൊലപാതകത്തെ ചൊല്ലി വൈസ് പ്രസിഡന്റ് ജെ.ഡി. വാൻസും ബ്രിട്ടീഷ് സർക്കാരും തമ്മിൽ വാക്‌പോര് ശക്തമായി. വൻതോതിലുള്ള കുടിയേറ്റവും യൂറോപ്യൻ നേതൃത്വത്തിന്റെ നയപരമായ വീഴ്ചകളുമാണ് ഈ സംഭവത്തിന് പിന്നിലെന്നാണ് വാൻസ് ആരോപിച്ചത്.
 

കഴിഞ്ഞ ഡിസംബറിൽ ഇംഗ്ലണ്ടിലെ സൗത്താംപ്ടണിൽ നടന്ന സംഭവത്തിൽ ഹെൻറി നൊവാക്ക് കുത്തേറ്റ് മരിക്കുകയായിരുന്നു. കേസിലെ പ്രതിയായ 23-കാരൻ വിക്രം ദിഗ്വ പൊലീസ് അന്വേഷണത്തിനിടെ താനാണ് ആക്രമണത്തിനിരയായതെന്നും നൊവാക്ക് തന്നെ വംശീയമായി അധിക്ഷേപിച്ചതാണെന്നും തെറ്റായ വിവരം നൽകിയതായി റിപ്പോർട്ടുകളുണ്ട്. ഗുരുതരമായി പരിക്കേറ്റ് കിടന്ന നൊവാക്കിനെ പൊലീസ് കൈവിലങ്ങ് അണിയിച്ച സംഭവവും വ്യാപക വിവാദത്തിന് വഴിവെച്ചിരുന്നു.

സാമൂഹിക മാധ്യമമായ എക്‌സിൽ പ്രതികരിച്ച വാൻസ്, ബ്രിട്ടന്റെ കുടിയേറ്റ നയങ്ങളെയും അധികാരികളുടെ നടപടികളെയും രൂക്ഷമായി വിമർശിച്ചു. യൂറോപ്പിലെ വൻതോതിലുള്ള കുടിയേറ്റവും പാശ്ചാത്യ മൂല്യങ്ങളോടുള്ള അവഗണനയും ഇത്തരം ദുരന്തങ്ങൾക്ക് കാരണമാകുന്നതായാണ് അദ്ദേഹം ആരോപിച്ചത്. നൊവാക്കിന്റെ മരണം ഒറ്റപ്പെട്ട സംഭവമല്ലെന്നും ഭാവിയിൽ ഇത്തരത്തിലുള്ള സംഭവങ്ങൾ ആവർത്തിക്കുമെന്ന ആശങ്കയും അദ്ദേഹം പ്രകടിപ്പിച്ചു.

യൂറോപ്യൻ കുടിയേറ്റ നയങ്ങളുടെ ദീർഘകാല വിമർശകനായ വാൻസ്, ഈ സംഭവത്തിനെതിരെ ശക്തമായ പൊതുപ്രതികരണം ഉയരേണ്ടതുണ്ടെന്നും അഭിപ്രായപ്പെട്ടു. അമേരിക്കൻ സ്റ്റേറ്റ് ഡിപ്പാർട്ട്മെന്റും നേരത്തെ കേസുമായി ബന്ധപ്പെട്ട പൊലീസ് നടപടികളെ വിമർശിച്ച് ആശയപരമായ പക്ഷപാതവും ഇരട്ടനീതിയും ഉണ്ടായതായി ആരോപിച്ചിരുന്നു.

ഇതിനിടെ, അമേരിക്കയുടെ ഇടപെടൽ ബ്രിട്ടീഷ് സർക്കാർ തള്ളിക്കളഞ്ഞു. രാജ്യത്തിന്റെ ജനാധിപത്യ പ്രക്രിയകളിൽ ഇടപെടാനും സമൂഹത്തിൽ ഭിന്നത സൃഷ്ടിക്കാനുമുള്ള ശ്രമങ്ങൾ അനുവദിക്കില്ലെന്ന് ബ്രിട്ടീഷ് പ്രധാനമന്ത്രി കെയർ സ്റ്റാർമറുടെ  ഓഫീസ് പ്രസ്താവനയിൽ വ്യക്തമാക്കി. ഹെൻറി നൊവാക്കിന്റെ കുടുംബം പോലും ഈ സംഭവം കൂടുതൽ വിദ്വേഷത്തിനോ സാമൂഹിക സംഘർഷത്തിനോ കാരണമാക്കരുതെന്നാണ് അഭ്യർത്ഥിച്ചതെന്നും സർക്കാർ ചൂണ്ടിക്കാട്ടി.

സംഭവവുമായി ബന്ധപ്പെട്ട് എലോൺ മസ്ക്കും നിരവധി തവണ പ്രതികരിച്ചിരുന്നു. ബ്രിട്ടനിൽ ഭിന്നത വളർത്താൻ ശ്രമിക്കുകയാണെന്ന് മസ്കിനെതിരെ സ്റ്റാർമർ നേരത്തെ ആരോപിച്ചിരുന്നു. നൊവാക്കിന്റെ കൊലപാതകത്തെ ചുറ്റിപ്പറ്റിയുള്ള രാഷ്ട്രീയ വിവാദം ഇപ്പോൾ ബ്രിട്ടൻ-അമേരിക്ക ബന്ധങ്ങളിലും കുടിയേറ്റ നയങ്ങളുമായി ബന്ധപ്പെട്ട ആഗോള ചർച്ചകളിലും പുതിയ വാദപ്രതിവാദങ്ങൾക്ക് വഴിവെച്ചിരിക്കുകയാണ്.