സിലിക്കൺ വാലി ഉൾപ്പെട്ട കലിഫോർണിയ 17ആം ഡിസ്ട്രിക്ടിൽ നിന്നു കോൺഗ്രസിലേക്കു ഇന്ത്യൻ അമേരിക്കൻ ഡെമോക്രാറ്റ് റോ ഖന്ന ഒൻപതാം തവണയും മത്സരിക്കും. ചൊവാഴ്ച്ച നടന്ന പ്രൈമറിയിൽ പടുകൂറ്റൻ വിജയം നേടിയ ഖന്ന എക്‌സിൽ കുറിച്ചു: "സിലിക്കൺ വാലിയുടെ ഹൃദയത്തിൽ ശതകോടീശ്വരന്മാരുടെ വെല്ലുവിളി നേരിട്ടു വിജയം കൊയ്യാമെന്നു നമ്മൾ വീണ്ടും തെളിയിച്ചു. ശതകോടീശ്വരന്മാർക്കു നികുതി ചുമത്താൻ ഞാൻ വോട്ട് ചെയ്തപ്പോൾ അവർ $1 മില്യൺ ഇറക്കി എനിക്കെതിരെ വ്യാജ പ്രചാരണം നടത്തി.

"എന്റെ രാഷ്ട്രീയ ജീവിതം അവസാനിപ്പിക്കുമെന്ന് അവർ പറഞ്ഞു. പ്രോഗ്രസീവ് പ്രസ്ഥാനം എവിടെയും വിജയം നേടുമെന്നു ഫലങ്ങൾ തെളിയിക്കുന്നു."  

ബുധനാഴ്ച്ച പുലർച്ചെ ഖന്ന 59.8% വോട്ട് നേടിക്കഴിഞ്ഞപ്പോൾ രണ്ടാം സ്ഥാനക്കാരനായ ഇന്ത്യൻ വംശജൻ റിതേഷ് ടണ്ടനു 16.2% ആണ് ലഭിച്ചത്. അദ്ദേഹത്തിന്റെ പിന്നിൽ 12.2% വോട്ടുമായി ജെന്നി ഹാ ഫാൻ നിൽക്കുന്നു. ഖന്നയെ എതിർക്കാൻ സംഘടിത എതിരാളികൾ ഇറക്കിയ എത്താൻ അഗർവാൾ 6% വോട്ടാണ് നേടിയത്.

പ്രൈമറിയിൽ ഏറ്റവും മുകളിൽ എത്തുന്ന രണ്ടു പേർ തമ്മിൽ നവംബർ 3നു മത്സരിക്കുന്ന കാലിഫോർണിയയിൽ പാർട്ടി പ്രശ്നമല്ല.

Ro Khanna secures landslide victory in California primary