സ്ത്രീയുടെ ശരീരം: ഫേസ്ബുക്കിലും മറ്റ് സോഷ്യൽ മീഡിയ ഇടങ്ങളിലും പുരാതന രതിഗ്രന്ഥങ്ങളെയും അതിലെ സ്ത്രീ വർണ്ണനകളെയും വലിയ ശാസ്ത്ര സംഭാവനകളോ സാംസ്കാരിക പൈതൃകങ്ങളോ ആയി വാഴ്ത്തിപ്പാടുന്ന നിരവധി പോസ്റ്റുകൾ കാണാറുണ്ട്. കവിതയുടെയും കാവ്യഭാവനയുടെയും കൂട്ട് പിടിച്ച്, സ്ത്രീകളുടെ ശരീരഘടനയെയും ലൈംഗികതയെയും തരംതിരിക്കുന്ന ഇത്തരം നോൺസെൻസുകൾ യഥാർത്ഥത്തിൽ പുരോഗമനപരമായ ഒരു സമൂഹത്തിൽ വിചാരണ ചെയ്യപ്പെടേണ്ടവയാണ്. പതിനാറാം നൂറ്റാണ്ടിൽ കല്യാണമല്ലൻ രചിച്ച അനംഗരംഗം പോലുള്ള കൃതികളിൽ സ്ത്രീകളെ പദ്മിനി, ചിത്രുണി, ശംഖിനി, ഹസ്തിനി എന്നിങ്ങനെ ശരീരത്തിന്റെ നിറത്തിന്റെയും ആകൃതിയുടെയും അടിസ്ഥാനത്തിൽ തരംതിരിച്ചിരുന്നു. ഇത് കേവലം ഒരു തട്ടിപ്പും വിവേചനവുമാണ്. ഇത്തരം അസംബന്ധങ്ങളെ നമ്മൾ പൂർണ്ണമായും തള്ളിക്കളയേണ്ടതുണ്ട്. ​ഇത്തരം രതിവിവരണ കൃതികൾ എഴുതപ്പെട്ടത് അന്നത്തെ രാജാക്കന്മാർക്കും പ്രഭുക്കന്മാർക്കും രസിക്കാൻ വേണ്ടിയുള്ള തീർത്തും പുരുഷകേന്ദ്രീകൃതമായ കാഴ്ചപ്പാടിലാണ്. ഒരു സ്ത്രീയുടെ ശരീരം എങ്ങനെയിരിക്കണം, അവൾ കിടപ്പറയിൽ എങ്ങനെ പെരുമാറണം എന്ന് പുരുഷൻ നിശ്ചയിച്ച മാനദണ്ഡങ്ങളാണിവ. താമരപ്പൂവിന്റെ സുഗന്ധമുള്ള യോനി, മെലിഞ്ഞ അരക്കെട്ട്, മൃദുവായ ചർമ്മം എന്നൊക്കെ കേൾക്കുമ്പോൾ കവിതയായി തോന്നാമെങ്കിലും, സാധാരണ സ്ത്രീകളിൽ ഇല്ലാത്ത ഒരു 'അസാധ്യ സൗന്ദര്യ സങ്കല്പം' അടിച്ചേൽപ്പിക്കലാണിത്. ഇത്തരം വിവരണങ്ങൾ വായിക്കുന്ന സാധാരണക്കാരായ സ്ത്രീകൾക്ക് തങ്ങളുടെ ശരീരത്തെക്കുറിച്ച് അനാവശ്യമായ അപകർഷതാബോധവും ബോഡി ഷെയ്മിങ്ങും ഉണ്ടാകാൻ മാത്രമേ ഇത് ഉപകരിക്കൂ. പ്രകൃതി സഹജമായ ശരീരഘടനകളെ ഒരു പ്രത്യേക അച്ചിലേക്ക് മാറ്റാൻ ശ്രമിക്കുന്നത് ക്രൂരതയാണ്. ​ആധുനിക അനാട്ടമിയും മെഡിക്കൽ ശാസ്ത്രവും വ്യക്തമായി തെളിയിച്ചിട്ടുള്ളത് ഓരോ മനുഷ്യന്റെയും വിരലടയാളം പോലെ വ്യത്യസ്തമാണ് സ്ത്രീകളുടെ ജനനേന്ദ്രിയങ്ങളുടെ ആകൃതിയും, വലുപ്പവും, നിറവും എന്നാണ്. Labiaയുടെവലിപ്പവ്യത്യാസമോ, ഇരുണ്ട നിറമോ ഒന്നും ഒരു പോരായ്മയല്ല, മറിച്ച് അത് തികച്ചും സ്വാഭാവികമായ ജനിതക ഘടനയാണ്. അതുപോലെ തന്നെ ജനനേന്ദ്രിയങ്ങൾക്ക് താമരപ്പൂവിന്റെയോ മല്ലികപ്പൂവിന്റെയോ മണമല്ല ഉണ്ടാകേണ്ടത്, ശരീരത്തിന്റെ സ്വാഭാവികമായ മണം മാത്രമാണതിനള്ളത്. കൃത്രിമ സുഗന്ധങ്ങൾ ഉപയോഗിക്കുന്നത് യോനിയിലെ സ്വാഭാവിക ബാക്ടീരിയൽ സന്തുലിതാവസ്ഥയെ (pH balance) തകിടം മറിക്കുകയും അണുബാധയ്ക്ക് കാരണമാവുകയും ചെയ്യും. ഈ ശാസ്ത്രീയ സത്യങ്ങളെ മറച്ചുവെച്ചാണ് പുരാതന ഗ്രന്ഥങ്ങളിലെ ഫാന്റസികൾ ഇന്നും എഴുന്നള്ളിക്കുന്നത്. ​"ഇന്ന ശരീര പ്രകൃതിയുള്ളവൾക്ക് ഇന്ന പുരുഷൻ മാത്രമേ പറ്റൂ" എന്ന തരത്തിലുള്ള ലൈംഗിക പൊരുത്ത സിദ്ധാന്തങ്ങൾ ശുദ്ധ അസംബന്ധമാണ്. ദാമ്പത്യത്തിലോ പ്രണയത്തിലോ ഉള്ള പൊരുത്തം എന്നത് രണ്ട് വ്യക്തികൾ തമ്മിലുള്ള പരസ്പര ബഹുമാനം, കൃത്യമായ ആശയവിനിമയം, സമ്മതം, പരസ്പരമുള്ള സ്നേഹം എന്നിവയെ അടിസ്ഥാനമാക്കിയുള്ളതാണ്; അല്ലാതെ പുരാതന പുസ്തകത്തിലെ അളവുതൂക്കങ്ങൾ നോക്കിയല്ല. ഇത്തരം വിവേചനപരമായ വർണ്ണനകളെ സാംസ്കാരിക പൈതൃകം എന്ന് പറഞ്ഞ് ഇന്നും ചുമന്നുകൊണ്ട് നടക്കുന്നത് നിർത്തണം. ശരീരത്തിന്റെ നിറവും ആകൃതിയും നോക്കി മനുഷ്യരെ ഗ്രേഡ് തിരിക്കുന്ന ഇത്തരം എഴുത്തുകൾ പുരോഗമന സമൂഹത്തിന് ചേർന്നതല്ല. പ്രകൃതി നൽകിയ വൈവിധ്യങ്ങളെ ഉൾക്കൊള്ളാനും, സ്വന്തം ശരീരത്തെ ആത്മവിശ്വാസത്തോടെ കാണാനുമാണ് നമ്മൾ പഠിക്കേണ്ടത്- chanakyan