വാഷിംഗ്ടൺ : അമേരിക്കയിലേക്കുള്ള കുടിയേറ്റ അപേക്ഷകളിലും വിസ പെറ്റീഷനുകളിലും ഒപ്പുകൾ രേഖപ്പെടുത്തുന്നതുമായി ബന്ധപ്പെട്ട ചട്ടങ്ങൾ യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (യുഎസ്സിഐഎസ്) കൂടുതൽ കർശനമാക്കി. വ്യാജ ഒപ്പുകൾ തടയുന്നതിനും സുതാര്യത ഉറപ്പാക്കുന്നതുമായി ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റി പുറപ്പെടുവിച്ച പുതിയ ഇന്ററിം ഫൈനൽ റൂൾ (താൽക്കാലിക അന്തിമ ചട്ടം) പ്രകാരം അപേക്ഷകളിൽ ഒപ്പിലെ പോരായ്മകൾ കണ്ടെത്തിയാൽ അവ നേരിട്ട് നിരസിക്കാൻ  ഇനി ഇമിഗ്രേഷൻ ഓഫീസർമാർക്ക് പൂർണ്ണ അധികാരമുണ്ടാകും. മുൻപ് ഒപ്പുകളിൽ എന്തെങ്കിലും ചെറിയ പിഴവുകൾ ഉണ്ടായാൽ അവ തിരുത്താൻ 'അഭ്യർത്ഥന കത്ത്' (Request for Evidence) അയയ്ക്കുന്ന രീതി ഉണ്ടായിരുന്നുവെങ്കിലും പുതിയ മാറ്റത്തോടെ അപേക്ഷകൾ നേരിട്ട് തള്ളിക്കളയാനുള്ള സാധ്യതയാണ് വർദ്ധിച്ചിരിക്കുന്നത്. അപേക്ഷ സ്വീകരിച്ച് പ്രൊസസിങ് ആരംഭിച്ച ശേഷമാണ് ഒപ്പിലെ അസാധുത കണ്ടെത്തുന്നതെങ്കിൽ, അപേക്ഷ നിരസിക്കുന്നതിനൊപ്പം അടച്ച വലിയ തുകയുള്ള ഫീസും യുഎസ്‌സിഐഎസ് തിരികെ നൽകില്ല.

ഒരു അപേക്ഷകനോ സ്പോൺസറോ സ്വന്തം കൈപ്പടയിൽ പേന ഉപയോഗിച്ച് ഒപ്പിട്ട രേഖകളോ (Wet-ink signature) അല്ലെങ്കിൽ അത്തരം ഒപ്പുകൾ അടങ്ങിയ രേഖകളുടെ വ്യക്തമായ സ്കാൻ കോപ്പികളോ ഫാക്സ് കോപ്പികളോ മാത്രമേ സാധുവായ ഒപ്പുകളായി പരിഗണിക്കുകയുള്ളൂ. വിവിധ ഡിജിറ്റൽ സോഫ്റ്റ്‌വെയറുകൾ (ഉദാഹരണത്തിന് DocuSign പോലുള്ളവ) വഴി ഇലക്ട്രോണിക് ആയി ജനറേറ്റ് ചെയ്യുന്ന ഒപ്പുകൾ, കമ്പ്യൂട്ടറിൽ ടൈപ്പ് ചെയ്ത് ചേർക്കുന്ന പേരുകൾ, ഒപ്പിന്റെ സ്റ്റാമ്പുകൾ, മുൻപ് ഒപ്പിട്ട രേഖകളിൽ നിന്നും ഒപ്പ് മാത്രം കട്ട് ചെയ്ത് പുതിയ ഫോമുകളിലേക്ക് കോപ്പി-പേസ്റ്റ് ചെയ്ത് ചേർക്കുന്ന രീതികൾ എന്നിവയെല്ലാം അസാധുവായ ഒപ്പുകളായി കണക്കാക്കും. എന്നാൽ യുഎസ്‌സിഐഎസിന്റെ വെബ്‌സൈറ്റ് വഴി ഓൺലൈനായി നേരിട്ട് ഫയൽ ചെയ്യുന്ന ചില പ്രത്യേക അപേക്ഷകളിലെ ഇലക്ട്രോണിക് ഒപ്പുകൾക്ക് ഇതിൽ ഇളവുണ്ടായിരിക്കും.

ഈ പുതിയ ചട്ടം 2026 ജൂലൈ 10 മുതൽ സമർപ്പിക്കുന്ന എല്ലാ കുടിയേറ്റ, തൊഴിൽ വിസ അപേക്ഷകൾക്കും ബാധകമായിരിക്കും. എച്ച്-1ബി, എൽ-1 വിസകൾക്ക് ജീവനക്കാരെ സ്പോൺസർ ചെയ്യുന്ന കമ്പനികൾക്കും ഗ്രീൻ കാർഡ്, തൊഴിൽ അനുമതി (ഇഎഡി) എന്നിവയ്ക്കായി അപേക്ഷിക്കുന്ന വ്യക്തികൾക്കും ഈ തീരുമാനം വലിയ തോതിൽ ബാധകമാകും. ഒപ്പുകളിലെ ചെറിയൊരു സാങ്കേതിക പിഴവ് കാരണം അപേക്ഷകൾ നിരസിക്കപ്പെട്ടാൽ വിസ അപേക്ഷകളുടെ മുൻഗണനാ തീയതികൾ നഷ്ടപ്പെടാനും, വിസ കാലാവധി കഴിഞ്ഞ് നിയമവിരുദ്ധമായി യുഎസിൽ തുടരേണ്ടി വരുന്ന സാഹചര്യങ്ങളിലേക്കും ഇത് നയിച്ചേക്കാം. അതിനാൽ അമേരിക്കൻ മലയാളി അപേക്ഷകരും ജീവനക്കാരെ സ്പോൺസർ ചെയ്യുന്ന തൊഴിലുടമകളും എച്ച്ആർ വിഭാഗങ്ങളും തങ്ങളുടെ അപേക്ഷാ നടപടികൾ കൃത്യമായി ഓഡിറ്റ് ചെയ്യണമെന്നും എല്ലാ ഫോമുകളിലും ശരിയായ രീതിയിലുള്ള ഒപ്പുകൾ ഉറപ്പാക്കണമെന്നും ഇമിഗ്രേഷൻ വിദഗ്ധർ മുന്നറിയിപ്പ് നൽകുന്നു.